Ekesote 30

Le aletale o kaloni

1E ke fai loa se aletale ke tutu ai a kaloni, e ke fai loa a ia ki le akasia. 2Ko lona loa ko le kau lima satimeta, ko lona laulasi ko le kau lima satimeta ; e tapa fa tatau loa a ia, ti e meta tasi loa lona taualuga. E ke fai loa ni tala ala e ulu mai mei le aletale. 3E ke aofi loa le aletale ki le aulo mea, mo lona tua aluga, mo ona fetuu i tafatafa, ti mo ona tala, ti e ke fai loa se tapatapa aulo i lona takatakai katoa. 4E ke fai loa ni kavei aulo e lua i lalo o le tapatapa o le aletale, o kaku ki ona tuliki e lua ; e ke fai loa i ona fetuu e lua, ke fakaulu ai a amo ala ke amo ai. 5E ke fai loa a amo ki le akasia, ti e ke aofi loa laua ki le aulo. 6E ke fakatuu loa le aletale i le tua lito, leia e tau i mua o le aleka o le fakamaoki, i mua o le nofoaga o le manava alofa leia e teki i aluga o le aleka o le fakamaoki, le ganea leia e kau felavei ai loa mo koe. 7E tutu loa e Alone le kaloni fakamanogi ; e tutu loa e ia i usu fuli, i le temi leia e fakamea ai e ia a malama. 8E toe tutu foki e ia le kaloni fakamanogi i le afiafi, i le temi leia e teuteui ai e ia a malama. Ti e tutu fenaaki loa o tuumau le kaloni fakamanogi i mua o le Eteleno i okoutou tautupu fuli. 9E leaise kotou momoli loa i le aletale se kaloni kese, pe ko se failaulau, pe ko se moliga, ti e leaise kotou liligi loa i ai se moliga vino. 10E tua tasi i le fetuu, e fai loa e Alone le fakamalie i tala o le aletale ki le toto o le failaulau fakamalie o le agasala ; e fai tua tasi loa e ia i le fetuu ni fakamalie ki le agasala i le aletale, i okoutou tautupu fuli. Ko se nea maokioki lasi a ia ki le Eteleno.

Le totogi o tagata taki toka tasi

11Na masau loa le Eteleno kia Moisese, o pati : 12Ka ke lau loa le api o fanau a Iselaele, e soli loa e le tagata taki toka tasi ki le Eteleno le totogi o lona mauli, o tupu ke aua na soko loa kiate ia se tautea i le temi lena e lau ai le kakai. 13Ko leinei le nea leia e soli loa e latou fuli ala e kau loa i le tosi : ko se vaeluai sikele, o mulimuli ki le sikele o le sagatualio, leia ko le kau lua kela ; ko le vaeluai sikele ko le nea alofa lena leia e soli loa ki le Eteleno. 14E totogi loa e tagata fuli ala e kau i le tosi, mei le fetuu kau lua o fai ki aluga, le nea alofa lena ki le Eteleno. 15E leaise totogi loa e le tagata mou koloa o fakalaka i le vaeluai sikele, ti e leaise totogi loa e le tagata mativa o ikiiki i le vaeluai sikele : e totogi loa e le tagata taki toka tasi ki le Eteleno le totogi leia kua fakatotonu ke fakamauli ai lona laumalie. 16E ke tali loa mei fanau a Iselaele le paaga o lolatou totogi, ti e ke fakaaoga loa a ia ki le gaoi o le falela tapu ; ko se tausi alofa loa lena ki fanau a Iselaele, i mua o le Eteleno, ki le totogi o olatou laumalie.

Le tanoa sila

17Na masau loa le Eteleno kia Moisese, o pati : 18E ke fai loa se tanoa sila, mo sona tuuaga sila, ki le fanofano. E ke fakatuu loa le tanoa i le vasa o le falela mo le aletale, ti e ke fakaapele loa a ia ki se vai, 19ti e fufulu loa e Alone mo ona vosa olatou lima mo olatou vae ki le vai lena. 20Ka lotou ulu loa ki le falela, e lotou fakamea loa ki le vai lena, o tupu ke aua na lotou mamate loa ; ti e toe tatau foki mo ka lotou fakafeofi loa ki le aletale o gaoi mo momoli ni sakilifisio ki le Eteleno. 21E lotou fakamea loa olatou lima mo olatou vae, o tupu ke aua na lotou mamate loa. Ko se lao lena ke tuu mau loa kia Alone, mo ona vosa, ti mo olatou sakoga.

Le lolo tapu mo le kaloni tapu

22Na masau loa le Eteleno kia Moisese, o pati : 23Too loa kiate koe a kaloni malilie tukupau : le mila, ko ni sikele e kau lelau lima o le mila leia e sali toka tasi ; mo le sinamome, ko ni sikele e kau lelau lua kau lima ; mo ni kanele manogi, ko ni sikele e kau lelau lua kau lima ; 24mo le kase, ko ni sikele e kau lelau lima, o mulimuli ki le sikele o le sagatualio ; mo se lolo olive, ko se ini e tasi. 25E ke fai loa ki nea ana se lolo ki le fakatapu, o mulimuli ki le poto o le tagata fai lolo. Ko le lolo pani tapu loa lena. 26E ke pani loa ki ai le falela mo le aleka o le fakapapau, 27mo le laupapa mo ona nea gaoi fuli, mo le tuuaga malama mo ona nea gaoi, mo le aletale o kaloni, 28mo le aletale o failaulau mo ona nea gaoi fuli, mo le tanoa sila mo lona tuuaga. 29E ke fakatapui loa a nea fuli ana, ti e lotou liliu loa o maokioki, ti ko nea fuli ala e lave loa ki ai e maokioki loa. 30E ke pani lolo loa Alone mo ona vosa, ti e ke fakatapui loa latou, o tupu ke lotou gaoi kiate au i le gaoi fakapelepitelo. 31E ke masau loa ki fanau a Iselaele, ti e ke pati loa : Ko le lolo pani tapu lena kiate aua, i okoutou sakoga. 32E leaise takai loa le tino o se tagata ki le lolo lena, ti e leaise kotou fai loa se lolo ke tatau mo ia, i ona fuafua ; e maokioki loa a ia, ti e maokioki loa a ia kia kotou. 33Ko leia e fai ia loa se lolo ofaipe le lolo lena, pe pani loa ki ai se tagata kese, e tuuti loa a ia mei lona kakai.

Le iseso : kole mo fakafetai

34Na pati loa le Eteleno kia Moisese : Too ni nea fakamanogi : se setakite, mo se onika, mo se kalipanume, ti mo se iseso mea, o fua fakatatau fuli latou. 35E ke fai loa ki nea ana se kaloni o mulimuli ki le poto o le tagata fai kaloni ; e konakona loa a ia, mo mea, mo maokioki. 36E ke tuki loa a ia ke fai pe se pauta, ti e ke tuku loa a ia ki mua o le aleka o le fakamaoki, i loto o le falela tapu leia e kau felavei ai loa mo koe. Ko se nea maokioki loa lena kia koutou. 37E leaise kotou fai ia loa se kaloni fenaaki kia koutou, i ona fuafua fuli ; e tapu loa a ia kia koutou, talie e tuku a ia ki le Eteleno toka tasi. 38Ko leia e fai ia loa se kaloni fenaaki ke sauga a ia ki ai, e tuuti loa a ia mei lona kakai.

Currently Selected:

Ekesote 30: FB2000

Highlight

Copy

Compare