Ekesote 25
25
Le Tapenakulo : moliga
1Na masau loa le Eteleno kia Moisese, o pati : 2Masau ki fanau a Iselaele. Ke lotou aumai kiate au se moliga ; e kotou tali loa a ia kiate au mei tagata fuli ala e fia fai ia se moliga kiate au i lona loto malie. 3Ko nei a nea ala e kotou tali loa meia latou ko ni moliga : ko le aulo, mo le siliva, mo le sila ; 4mo ni kie usi, mo ni kie kula fakapouli, mo ni kie kula malama, mo ni kie silika, ti mo se fului koti ; 5mo ni kilii ovi tagata kua pena kula, ti mo ni kilii kakaututuu ; mo ni papa akasia ; 6mo se lolo ki le malama tutu, mo ni laakau fakamanogi ki le lolo tapu mo le kaloni fakamanogi ; 7mo le onise ti mo ni iki ake a fatu mauiga ke teuteui ai le efote mo le peketolale. 8E lotou fau loa se sagatualio kiate au, ti e kau nofo loa i loto malie o latou. 9E kotou fai loa le tapenakulo mo ona nea gaoi fuli o fakatatau ki le paaki leia e kau fakasa atu loa kiate koe.
Le aleka o le sai
10E lotou fai loa se aleka ki le akasia, ko le loa o le aleka ko le meta e tasi mo satimeta e kau lua tupu lima, ko lona laulasi ko satimeta e kau fitu tupu lima, ti ko lona taualuga ko satimeta e kau fitu tupu lima. 11E ke aofi loa a ia ki se aulo mea, ti e ke aofi loa a ia i loto mo tafa, ti e ke fai loa mo se tapatapa aulo i le takatakai. 12E ke fai loa ni ona mama aulo e fa, ti e ke fakapikipiki loa latou ki ona potupotu e lua, ko ni mama e lua i le tasi a potu, ti ko ni mama e lua i le tasi a potu. 13E ke fai loa ni laakau amo e lua ki le akasia, ti e ke aofi loa laua ki le aulo. 14E ke fakaulu loa a amo i mama i potupotu o le aleka, ke amo ai le aleka. 15E tuku mau loa a amo i mama o le aleka, ti e leaise toe too loa laua mei ai. 16E ke tuku loa ki loto o le aleka le fakamaoki leia e kau soli atu loa kiate koe. 17E ke fai loa se tapono o le aleka ki le aulo mea ; ko lona loa ko le meta e tasi mo satimeta e kau lua tupu lima, ti ko lona laulasi ko satimeta e kau fitu tupu lima. 18E ke fai loa ni selupino aulo e lua, e ke fai loa laua ki le aulo tuki, i potupotu e lua o le nofoaga o le manava alofa ; 19fai se selupino e tasi i se tasi potupotu ti mo se tasi selupino e tasi i se tasi potupotu ; e kotou fai loa laua ke la ulu mei le nofoaga o le manava alofa, i ona potupotu e lua. 20E folasi loa e selupino ola kapakau i aluga, o malui le nofoaga o le manava alofa ki ola kapakau, ti e feagaaki loa ki loto a selupino, o tio ki le nofolaga o le manava alofa. 21E ke teki loa le nofoaga o le manava alofa ki le aleka, ti e ke tuku loa ki loto o le aleka le fakamaoki, leia e kau soli atu loa kiate koe. 22Ko lena le ganea leia e kau felavei ai loa mo koe ; i aluga o le nofolaga o le manava alofa, i le vasa o selupino e lua ala e tuu i aluga o le aleka, e kau tuku atu loa kiate koe aku fakatotonu fuli ki fanau a Iselaele.
Le laupapa o pane tapu
23E ke fai loa se laupapa ki le akasia ; ko lona loa ko le meta e tasi, ko lona laulasi ko satimeta e kau lima, ti ko lona taualuga ko satimeta e kau fitu tupu lima. 24E ke aofi loa le laupapa ki le aulo mea, ti e ke fai loa se tapatapa aulo ke takatakai ai. 25E ke fai loa ki ai se tapatapa takatakai, ko lona laulasi ko le alofilima e tasi ; ti e ke fai loa ki ai se tapatapa aulo ke takatakai ai. 26E ke fai loa ki le laupapa ni kavei aulo e fa, ti e ke fakapikipiki loa a kavei ki tifi e fa, ala e tuu i ona vae e fa. 27E tuu fakatautonu loa a kavei mo tapa, ke velo ai a amo ala ke amo ai le laupapa. 28E ke fai loa a amo ki le akasia, ti e ke aofi loa laua ki le aulo ; e amo loa ki ai le laupapa. 29E ke fai loa ona pa, mo ona ipu, mo ona kalise, ti mo ona ipu liliki ki le lolo ; e ke fai loa a nea ana ki le aulo mea. 30E ke tuku tuumau loa i oku mua, i aluga o le laupapa, a pane taputapu.
Le tuuaga malama aulo
31E ke fai loa se tuuaga malama aulo mea ; e fau loa le tuuaga malama lena ki le aulo tuki ; ko lona tafito, mo lona kuaga, mo ona ipu liliki, mo ona fuai pome, ti mo ona se, e fau loa ki se potu aulo e tasi. 32E mavae loa a laa e ono mei ona fetuu, ko laa e tolu i le tasi fetuu o le tuuaga malama, ti ko laa e tolu i leia ake fetuu o le tuuaga malama. 33E ke fai loa i le laa e tasi ni kalise e tolu ofaipe ni fuai amatie, mo ni fuai pome, mo ni se ; ti e toe fenaaki loa ki laa e ono o le tuuaga malama. 34I le kuaga o le tuuaga malama, e ke fau loa i ai ni kalise e fa ofaipe le fa amatie, mo ona fa pome, ti mo ona se. 35E i ai loa se fuai pome e tasi i lalo o laa e lua, ala e mavae mei le kuaga o le tuuaga malama ; ti mo se tasi fa fuai pome i lalo ake o iki a laa e lua, ti mo se tasi fa fuai pome i lalo o la ake a laa e lua ; e fenaaki loa ki laa e ono ala e mavae mei le tuuaga malama. 36E fai loa ki le potu aulo e tasi a fuai pome, mo laa o le tuuaga malama ; e fai katoa loa a ia ki le aulo mea kua tuki. 37E ke fai loa ona malama e fitu, o fakatuu i aluga, ke malama ki mua. 38E ke fai loa ki le aulo mea ona koti vavai mo ona tanakiaga mugalafu. 39E too loa se fa tenalio aulo mea e tasi ke fai ai le tuuaga malama mo ona nea gaoi fuli. 40Tio, ti ke fai a nea fuli o fakatatau ki lona fakatata leia na fakasa kiate koe i le mauga.
Currently Selected:
Ekesote 25: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
