Ekesote 19

Sai i le mauga o Sinai

1I le tolu o masina ki lolatou mavae mei le fenua o Esipito, na kaku loa fanau a Iselaele i le aso lena ki le toafa o Sinai. 2I lalatou mavae i Lefitimi, na lotou ulu loa ki le toafa o Sinai, ti na lotou fakatuu loa lolatou nofolaga i le toafa, o ofi ki le mauga o Sinai. 3Na pale loa Moisese ki le Atua : ti na kalaga loa le Eteleno kia Moisese mei aluga o le mauga, o pati : E ke masau feneeki loa ki le fale o Sakopo, ti e ke pati loa ki fanau a Iselaele : 4Kua kotou tio ki le nea leia na kau fai ki Esipito, ti kua kotou tio ki laku aumai koutou ki leinei, ki oku tafa, ofaipe se akuila leia e ave ia ona uviki i aluga o ona kapakau. 5I le aso nei, kapau e kotou fakalogo ki loku leo, ti kapau e kotou tausi laku fakapapau, e kotou liliu loa kiate au ko se kakai leia e mauiga kese ake i kakai fuli. Talie ko le malama nei katoa a aku, 6e kotou liliu loa kiate au ko se puleaga o tagata faisakilifisio, ko se puleaga maokioki ke tausi kiate au. Ke ke fakasa a masau ana ki fanau a Iselaele.

7Na toe liliu loa Moisese ki le nofolaga o fakatasii le kau matua o le kakai, ti na tuku loa e ia ki olatou mua a folafola fuli ala na fakatotonu ake e le Eteleno kiate ia. 8Na tali loa le kakai katoa : E motou fai loa a nea fuli ala kua pati ki ai le Eteleno. Ti na ave loa e Moisese a masau ana ki le Eteleno.

9Ti na pati loa le Eteleno kia Moisese : Ko leinei, e kau au loa kiate koe i se ao matotolu, o tupu ke logo malie le kakai i le temi leia e kau masau ai loa kiate koe, ti ke tui tuumau loa a ia kiate koe. Na toe fakasa loa e Moisese ki le Eteleno a masau a le kakai.

10Ti na pati loa le Eteleno kia Moisese : Toe liliu ki le kakai, ti ke pati kia latou ke lotou fakamea i le aso nei mo apogipogi, ti ke lotou fakamea olatou teu. 11Ke lotou nofo teuteu ki le tolu o aso, talie i le tolu o aso e ifo ai loa le Eteleno ki le mauga o Sinai, ti e tio mata loa le kakai katoa kiate ia. 12E ke fakatuu loa ki le kakai se koiga ke takatakai ia le mauga katoa, ti ke fakasa loa : ke aua na kotou pale loa ki le mauga, pe kotou fafa fua ki ai. Ko leia e lave loa ki le mauga, e tautea loa a ia ki le mate. 13E leaise fafa loa le lima ki ai, kae e tuki fatui loa a ia, pe kaloloi loa a ia ki ni gasau : manu pe tagata, e leaise mauli loa a ia. I le temi leia e pupusi ai loa le fakatagi pupusi, e lotou fakafeofi ake loa ki le mauga. 14Na ifo loa Moisese mei le mauga ki le kakai. Na fakamaokioki loa e ia le kakai, ti na lotou fakamea loa olatou kofu. 15Ti na pati loa a ia ki le kakai : Ke teuteu ki le tolu o aso. Ke aua na kotou momoe mo okoutou avaga.

16I le tolu o aso, i le mafoata, na i ai loa ni mana, mo ni uila, ti mo se ao matotolu, i le mauga ; ti na lotou logo loa ki le leo makeke fakaii o se fakatagi pupusi ; ti na lulu fuli loa le kakai katoa leia na nofo i le nofolaga. 17Na fakaulu loa e Moisese le kakai mei le nofolaga ki fafo, ke lotou felavei mo le Atua ; ti na lotou tutuu loa i lalo o le mauga. 18Na afu katoa loa le mauga o Sinai, talie na ifo loa le Eteleno ki ai i loto malie o se afi ; na malaga ake le afu lena ki aluga ofaipe se afu o se gutuumu kaka, ti na galulu le mauga katoa.

19Na asilisili makeke le gugulu o le fakatagi pupusi. Na masau loa Moisese, ti na tali loa le Eteleno kiate ia i se leo leia na makeke ofaipe le mana. 20Na ifo loa le Eteleno ki le mauga o Sinai, ki le tumutumu o le mauga. Na kalaga loa le Eteleno kia Moisese ke pale ki le tumutumu o le mauga. Ti na pale loa Moisese.

21Na pati loa le Eteleno kia Moisese : Ifo o toe fakamanatu ki le kakai e tapu mamafa le oso ke tio ki le Eteleno, talie na mate loa se toka api o latou. 22Ke toe fakamea foki le kau tagata faisakilifisio, ala e fakafeofi ki le Eteleno, talie ke aua na tamate latou e le Eteleno. 23Na pati loa Moisese ki le Eteleno : E leaise feala loa ke pale le kakai ki le mauga o Sinai, talie kua ke tuku mai kia matou le tapu mamafa leinei, o pati : fakatuu se koiga o takatakai ai le mauga, ti ke fakamaokioki le mauga. 24Na pati loa le Eteleno kiate ia : Ano, ifo ; ti ke toe pale mai loa mo Alone. Kae ke aua na pale mai loa kiate au le kau tagata faisakilifisio mo le kakai, talie ke aua na kau tautea loa latou ki le mate. 25Na ifo loa Moisese ki le kakai, o fakasa kia latou a nea ana.

Currently Selected:

Ekesote 19: FB2000

Highlight

Compare

Copy