Ekesote 15
15
Katiko a Moisese mo Iselaele
1Ti na sua loa e Moisese mo fanau o Iselaele le katiko leinei ki le Eteleno. Na lotou pati loa :
E kau sua loa ki le Eteleno, talie kua fakamapa e ia lona kololia ;
Kua laku e ia ki le tai le osi mo le tagata ekeosi.
2Ko le Eteleno ko loku makeke ti ko le tupuaga a ia o aku fakavikiviki ;
Ko ia leia na saofaki ia au.
Ko ia ko loku Atua : e kau fakavikiviki loa kiate ia ;
Ko ia ko le Atua o loku tamana : e kau fakasa loa lona mauiga.
3Ko le Eteleno ko se tagata tau toa a ia ;
Ko Eteleno ko lona igoa a ia.
4Kua ti e ia ki le tai a saliote a Falaone mo lana kau tau.
Kua folo e le tai Kula ana tagata tau makeke.
5Kua lotou malemo i le tai :
Kua lotou vivilo ki le takele o le tai ofaipe ni fatu.
6Kua fakasa e lou lima atamai, ei Eteleno ! lona makeke ;
Kua laliki e lou lima atamai, ei Eteleno ! le fili.
7Ki le lasi o lou mafimafi,
e ke laku ki le kele latou ala e agatuu kiate koe ;
E ke liligi lou sausau :
E tutu e ia latou ofaipe se mutie malo.
8I le tukumanava o ou pogoisu, na fakatuuga a vai,
Na tanaki a vaitafe ofaipe se kaua,
Na lotou fefeka i loto malie o le tai.
9Na pati le fili : E kau tuli loa, e kau maua loa,
E kau vae loa le koloa o le fili ;
E kau fakamakona loa loku fia lagavaka,
E kau tosoi loa le seleta, ti e maumaui loa latou e loku lima.
10Na ke pupusi lau tukumanava :
Ti na lotou lofia i le tai ;
Na lotou ogo ofaipe se potu pulu,
O kaku ki le takele o le moana.
11Eteleno, ko ai le atua e tatau mo koe ?
Ko ai e tatau mo koe leia e gigila i le maokioki,
Leia e gali mo fakavikiviki,
Leia e fai ia a nea fakamanamana ?
12Na ke falo lou lima atamai :
Ti na folo latou e le kele.
13Na ke saofaki lou kakai !
Ti na ke taki a ia i lou manava alofa,
Na ke taki a ia i lou makeke,
Ki le nofolaga o lou maokioki.
14E logo a kakai ki le nea lena,
Ti e lotou lulu :
E kaku le i ki le kau Filisitini ;
15Kua sevaia a pule o Etome ;
Kua lulu tagata tau o Moape ;
Kua manava veli kakai fuli o Kanaane.
16Kua mautoka latou e le lulu mo le i ;
I le makeke o lou lima,
E lotou liliu loa o gutu mate ofaipe ni fatu,
O kaku ki le fakalaka o lou kakai, Eteleno !
O kaku ki le fakalaka
O le kakai, leia na ke totogi.
17E ke aumai loa latou ti e ke fakanofo loa latou i le mauga o lou tofiga,
I le ganea leia na ke teuteui ko lou nofolaga, oi Eteleno !
I le sagatualio, Aliki ! leia na fakatuu e ou lima.
18E sau loa le Eteleno o lee gato !
19Talie kua ulu ki le tai a osi a Falaone, mo ana saliote, ti mo lana kau ekeosi,
Ti kua toe aumai e le Eteleno kia latou a vai o le tai ;
Kae na saele fanau a Iselaele i loto malie o le tai malo.
20Na too loa e Malia, ko le fafine polofeta, tuagaane o Alone, se nafa ikiiki i lona lima, ti na mulimuli loa iate ia a fafine fuli mo ni nafa liliki, o lotou mako loa.
21Na tali loa Malia ki fanau a Iselaele, o pati :
Kotou sua ki le Eteleno, talie kua fakasa e ia lona kololia ;
Na laku e ia ki le tai le osi mo le tagata ekeosi.
Ko vai o Mala
22Na ave loa e Moisese a Iselaele mei le tai Kula, ti na lotou too loa le ala ki le toafa o Suli. Ti na lotou fanoga loa i aso e tolu i le toafa, ti na leaise lotou maua loa se vai. 23Na lotou kaku loa ki Mala ; kae na leaise feala loa ke lotou inu le vai o Mala, talie na kona a ia. Koia leia na fakaigoa ai loa le ganea lena ko Mala. 24Na gugu loa le kakai kia Moisese, o pati : Kolea ka motou inu loa ? 25Na kalaga loa Moisese ki le Eteleno ; ti na fakasa loa e le Eteleno kiate ia se laakau, leia ke ti loa e ia ki le vai. Ti na liliu loa le vai o mami. Ko lena le ganea leia na soli ai loa e le Eteleno ki le kakai ni lao mo ni fakatotonu, ti ko lena le ganea leia na asiasii ai loa e ia le kakai. 26Na pati loa a ia : Kapau e ke tokaga malie ki le leo o le Eteleno lou Atua, kapau e ke fai le nea leia e totonu ki ona mata, kapau e fakalogo lou taliga ki ana fakatotonu, kapau e ke tausi ana lao fuli, ti e leaise kau tautea loa a koe ki se masaki i masaki ala na kau tautea ki ai le kau Esipito ; talie ko au ko le Eteleno leia e fakamauli ia a koe.
27Na lotou kaku loa ki Elimi, leia na tuu ai a matapuna vai e kau agafulu tupu lua mo palemie e kau fitu. Na lotou nonofo loa i ai, i tafa o le vai.
Currently Selected:
Ekesote 15: FB2000
Highlight
Share
Compare
Copy
Want to have your highlights saved across all your devices? Sign up or sign in
© Société Biblique de Genève, 2000-2020
