Ekesote 1
1
Mauli popula o Iselaele i Esipito
1Ko nei a igoa o vosa o Iselaele, ala na ifo loa ki Esipito mo Sakopo ti mo olatou famili taki tasi. 2Ko Lupeni, mo Simeone, mo Levi, mo Suta, 3mo Isakale, mo Sapulone, mo Pesamino, 4mo Tane, mo Nefetali, mo Kate, mo Asele. 5Ko latou fuli ala na ifo meia Sakopo ko le tino fitu. Na nofo Sosefo i le temi lena i Esipito. 6Ti na mate loa Sosefo, mo ona fetaina fuli ti mo le tautupu katoa lena.
7Na fanaunau loa fanau a Iselaele o lasi ai, ti na lotou liliu loa o makeke mo mauiga. Ti na apele loa le fenua ia latou.
8Na malaga ake loa i Esipito se sau foou, leia na leaise iloa ia Sosefo. 9Ti na pati loa a ia ki lona kakai : Ko leinei kua liliu fanau a Iselaele ko se kakai api mo makeke ake ia tatou. 10Ko leinei, ke tou tokaga kia latou ; ke tou fai ni puleaki ke aua na lotou lasi ake ia tatou, talie na soko loa se tau, ti lotou kau loa mo otatou fili o tau mai kia tatou, ti lotou mavae loa i le fenua. 11Ti na fakanofo loa ni pule gaoi, o tupu ke lotou fakamamae latou ki ni kavega mamafa. Koia na fakatuu ai loa a kolo o Pitomi mo Lamisese, ke tanaki ai a koloa o Falaone. 12Kae na logo ai lolatou fakamamae, na toe asilisili ake lolatou api mo lolatou makeke ; ti na toe asilisili veli ake le vesia ki fanau a Iselaele. 13Koia na fakapopulai fakaveliveli loa e le kau Esipito a fanau a Iselaele. 14Na lotou fakamamae lolatou mauli ki ni gaoi mamafa ki le kelepulu, mo le fau piliki, ti mo gaoi kesekese i faisaga. Ti na lotou fakamaua kia latou a gaoi fuli ana ki le aga tukipo.
15Ti na masau foki le sau o Esipito ki fafine faifanau a le kau Epeleo, ko le tasi na igoa ko Sifela, ti ko le tasi ko Pua. 16Na pati loa a ia kia laua : Ka kolua fakafanaui loa a fafine o le kau Epeleo, ti kapau e kolua tio loa i le vilo ake o le toe, ko se toe tagata, ti kolua tamate a ia, kae kapau ko se toe fafine, ti kolua tuku a ia ke mauli. 17Kae na i loa a fafine faifanau ki le Atua, ti na leaise la fakalogo loa ki le nea leia na pati ki ai le sau o Esipito ; kae na la tuku loa ke mauli a toe. 18Ti na kalagai loa e le sau o Esipito a fafine faifanau, o pati kia laua : Kolea na kolua fai fenaaki ai, kolea na kolua tuku ai ke mauli a toe ? 19Na tali loa a fafine faifanau kia Falaone : E tupu e leaise tatau a fafine a le kau Epeleo mo fafine a le kau Esipito ; e lotou makeke ti e lotou fanau i mua o le kaku atu a le fafine faifanau. 20Na tapuaki loa le Atua ki fafine faifanau ; ti na liuliuga loa le kau Iselaele, o liliu loa o toka api ai. 21Talie na i a fafine faifanau ki le Atua, na fakatupu loa e le Atua ola fale.
22Ti na tuku loa e Falaone le fakatotonu leinei ki lona kakai katoa : E kotou ti loa ki le vaitafe a toe tagata fuli ala e tupu loa, kae e kotou tuku loa ke mauli a toe fafine fuli.
Currently Selected:
Ekesote 1: FB2000
Highlight
Share
Compare
Copy
Want to have your highlights saved across all your devices? Sign up or sign in
© Société Biblique de Genève, 2000-2020
