Tetelonome 33
33
Tapuaki a Moisese ki Iselaele
1Ko leinei le tapuaki na tuku e Moisese, tagata a le Atua, i le aso leia na tapuaki ai a ia ki fanau a Iselaele, i mua o lona mate.
2Na pati a ia :
Na au le Eteleno mei le mauga o Sinai.
Na malaga ake a ia ki aluga o latou mei Seili,
Na gigila a ia mei le mauga o Palani,
Ti na au a ia mo le kau miliate maokioki,
Ti na too e ia i lona lima atamai le afi o le lao.
3Io, e alofa a ia ki puleaga ;
E nofo ana kau sagato fuli i lona lima.
E lotou tutuu i lalo o ou vae,
E lotou tali au folafola.
4Na tuku mai e Moisese kia matou le lao,
Tofiga o fanau a Sakopo !
5Na sau a ia i Iselaele,
I le aso leia na fakatasi ai a pule o le kakai
Ti mo faasiga fuli o Iselaele.
6Ke mauli Lupeni ti ke aua na mate a ia,
Ti ke toka api ona tagata !
7Ko leinei le nea na pati a ia o uiga mo Suta :
Eteleno, fakalogo mai ki le leo o Suta,
Ti ke toe fakaliliu mai a ia ki lona kakai.
Ke makeke ona lima ;
Ti ke ke tokoi kiate ia ki ona fili !
8Kia Levi, na pati a ia :
Na tuku a Tumini mo Ulimi ki le tagata maokioki,
Leia na ke asiasii i Masa,
Ti na ke fakamaaui i vai o Melipa.
9Na pati a Levi ki lona tamana mo lona tinana :
Na leaise kau tio kia laua !
E leaise fakamailoga kese e ia ona fetaina totonu,
E leaise iloa e ia ana fanau totonu.
Talie e lotou fai au folafola,
Ti e lotou taupau lau sai.
10E lotou ako au akonaki kia Sakopo,
Mo lau lao ki Iselaele ;
E lotou tuku le iseso ki ou pogoisu,
Mo le failaulau ki lou aletale.
11Tapuaki ki lona makeke, Eteleno !
Tali le gaoiaga o ona lima !
Fatii a ifiifi o latou e fesagai kiate ia,
Ti ke aua na lotou toe tuu ki aluga ona fili !
12Kia Pesamino, na pati a ia :
Ko le alofaaga a ia o le Eteleno,
E nofo fimalie loa a ia i ona tafa ;
E puipui loa a ia e le Eteleno, o lee gato,
Ti e nofo loa a ia i ona tuauma.
13Kia Sosefo, na pati a ia :
E tapuaki loa le Eteleno ki lona fenua,
Ti e maua loa e ia le alofa malie tukupau o le lagi, le sese,
Mo vai malilie o le lalo lagi,
14Mo fua malilie o le laa,
Mo fua malilie o masina taki tasi,
15Mo nea malilie o mauga afea,
Mo nea malilie o mauga liliki ala kua lau sekulo,
16Mo nea malilie e fakatupu e le kele, mo nea fuli e tapono e ia i loto.
Ko le kalasia o leia na sa i le ulu vao,
Ke au ki le ulu o Sosefo,
Ki le tumuaki o le ulu o le pule o ona fetaina.
17E maua e ia le mamalu o lana pipi tagata leia na uluaki tupu ;
Ko ona tala ko tala o le pipi vao,
Ti e tamate loa e ia ki ai a puleaga fuli,
O kaku ki potupotu o le kele :
Ko miliate latou o Efalaimi,
Ko tino afe latou o Manase.
18Kia Sapulone, na pati a ia :
Ke ke fiafia, Sapulone, i au fai koloa,
Ti mo koe, Isakale, i ou falela !
19E la kalagai loa a kakai ki le mauga ;
I ai, e lotou momoli loa ni sakilifisio o le faitotonu,
Talie e lotou mimiti loa a koloa o le tai,
Ti mo koloa fufu i le one.
20Kia Kate, na pati a ia :
Ke tapuaki leia e tuku ia a Kate ki le lau lasi !
E malolo a Kate ofaipe se laione fafine,
E kai e ia le vae o kaku ki le ulu.
21Na filifili e ia a uluaki fua o le fenua,
Talie i lena na fufu ai le tofiga o le pule o le lao ;
Na saele a ia i mua o le kakai,
Na fakasoko e ia le faitotonu a le Eteleno,
Mo ana fakatotonu ki Iselaele.
22Kia Tane, na pati a ia :
Ko Tane ko se laione muli,
Leia e sopo mei Pasani.
23Kia Nefetali, na pati a ia :
Kua makona Nefetali i kalasia
Ti kua apele a ia i tapuakina a le Eteleno ;
Ke ke too le potu uesite mo le potu saute !
24Kia Asele, na pati a ia :
Ke tapuakina Asele i fanau a Iselaele !
Ke malie a ia ki ona fetaina,
Ti ke ukui e ia lona vae ki le lolo !
25Ke ukamea mo kapa ou loka,
Ti ke tologa lou makeke ofaipe le tologa o lou mauli !
26E leaise tatau se tasi mo le Atua o Iselaele,
E amo a ia i le lagi ke au o tokoi mai kiate koe,
E amo a ia fakaalialiki a ia i aluga o ao.
27Ko le Atua o le lee gato ko se mumuniaga,
Ti e maua i lalo o ona lima lee gato se solaaga.
I ou mua na kapu e ia le fili,
Ti na pati a ia : ke tamate !
28E fimalie Iselaele i lona nofoaga,
E tuu kese le matapuna vai o Sakopo
I se fenua o le fulumeto mo le vino foou,
Ti e tufa e lona lagi le sese.
29Manuia a koe, Iselaele ! Ko ai e tatau mo koe ?
Ko se kakai na saofaki e le Eteleno,
Leia ko le paletau e puipui ia a koe,
Ti ko le seleta o lou kololia ?
E leaise tuu loa ou fili i ou mua,
Ti e ke takafi loa ki lou vae olatou ganea taualuga.
Currently Selected:
Tetelonome 33: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
