Tetelonome 31
31
Folafola fakamuli a Moisese
1Na toe tuku loa e Moisese a folafola anei ki Iselaele katoa : 2Na pati loa a ia kia latou : I le aso nei kua kau fetuu kau lelau kau lua, e leaise koi mafai loa ke kau ano ti mo kau au i mua o koutou, ti na pati mai loa le Eteleno kiate au : E leaise ke fakalaka loa i le Solotane leinei. 3E saele loa le Eteleno, lou Atua, i ou mua, ti e maumaui loa e ia a puleaga ana i ou mua, ti e ke too loa lolatou fenua meia latou. E fakalaka loa Sosue i ou mua, o mulimuli ki le pati a le Eteleno. 4E fai loa e le Eteleno ki puleaga ana le nea leia na fai e ia kia Sioni mo Oki, sau o le kau Amole, ala na maumaui e ia mo lolatou fenua. 5E tuku loa latou e le Eteleno kiate koe, ti e kotou fai loa kia latou o mulimuli ki fakatotonu ala na kau tuku atu kia koutou. 6Ke kotou fakamakeke ti ke kotou loto makeke ! Ke aua na kotou i ti ke aua na kotou lulu i olatou mua, talie e saele loa le Eteleno, lou Atua, mo koe ; e leaise mavae loa a ia meiate koe, e leaise tiaki loa e ia a koe. 7Na kalagai loa e Moisese a Sosue, o pati kiate ia i mua o Iselaele katoa : Ke ke fakamakeke ti ke ke loto makeke, talie e ke ulu loa mo le kakai leinei ki le fenua leia na fakapapau e le Eteleno ki olatou tamana ke tuku kia latou, ti ko koe leia e tufa ia loa kia latou olatou tofiga. 8E saele loa le Eteleno i ou mua, e leaise mavae loa a ia meiate koe, e leaise tiaki loa e ia a koe : Ke aua na ke i ti ke aua na ke loto gaegae !
Lau o le lao i fetuu fitu fuli
9Na tosi loa e Moisese le lao lena, o tuku ki le kau tagata faisakilifisio, vosa o Levi, ala na amo ia le aleka o le sai a le Eteleno, mo le kau fakamatuatua o Iselaele. 10Na tuku loa e Moisese le fakatotonu leinei kia latou : Ka oki loa ni fetuu e fitu, i le fetuu leia o le fakamolemole o maua, i le aso leia o Tapenakulo, 11i le aso leia e ano ai loa Iselaele katoa ki mua o le Eteleno, lou Atua, i le ganea leia e filifili loa e ia, e ke lau loa le lao leinei i mua o Iselaele katoa, o tupu ke lotou logo ki ai. 12E ke fakatasii loa le kakai, tagata, mo fafine, mo fanau, mo le matapule leia e nofo loa mo koe, o tupu ke lotou logo ti ke lotou iloa le fakaapaapa ki le Eteleno, lokoutou Atua, mo le tausi mo le fai o folafola fuli o le lao leinei. 13Ti ko olatou vosa ala e leaise iloa ia loa a ia, e logo loa ki ai, ti e lotou iloa loa le fakaapaapa ki le Eteleno, lokoutou Atua, i le temi katoa leia e kotou mauli ai loa i le fenua leia e kotou too loa, mo ka kotou fakalaka loa i le Solotane.
Fakasa o le aposetasia o Iselaele
14Na pati loa le Eteleno kia Moisese : ko leinei kua ofi loa le aso leia e ke mate ai loa. Ke ke kalagai loa Sosue, ti kolua ano loa o tuu i le falela tapu. Na ano loa Moisese mo Sosue o tuu i le falela tapu. 15Na sa loa le Eteleno i le falela, i se pou afu ; ti na tuu loa le pou afu i aluga o le uluaga o le falela tapu.
16Na pati loa le Eteleno kia Moisese : ko leinei ka ke mate loa. Ti ko le kakai leinei e malaga ake loa ki aluga o faiaga mo atua kese o le fenua leia ka ulu loa a ia ki ai. E tiaki loa e ia au ti e maumaui loa e ia laku sai, leia na kau fakamaoki mo ia. 17I le aso lena, e mu loa loku sausau kiate ia. E kau tiaki loa latou, ti e kau tapono loa oku mata kia latou. E kai loa a ia e atu puleaga, ti e soko loa kiate ia ni malaia lasi mo ni mamae veli. E pati loa a ia : Kua soko malaia anei kiate au talie e leaise nofo loku Atua mo au. 18Kae ko au, e kau fufu loa oku mata i le aso lena, o tupu ko le veli katoa leia na fai e ia, o ano ki ni atua kese. 19I le aso nei, ke ke tosi le katiko leinei. Ke ke ako a ia ki fanau a Iselaele, ke ke tuku a ia ki olatou gutu, ti ke liliu le katiko lena ko se fakamaoki kiate au i mua o fanau a Iselaele. 20Talie e kau fakaulu loa le kakai leinei ki le fenua leia na kau fakapapau ki olatou tamana ke soli kia latou, le fenua leia e sali ai le sua manu mo le meli. E kai loa le kakai leinei, ti e makona loa a ia, ti e peti loa a ia ; ti e maliu loa a ia ki ni atua kese o atolasio kia latou, kae e vesia loa a ia kiate au, ti e maumaui loa e ia laku sai. 21I le aso loa lena ka soko loa kiate ia ni malaia lasi mo ni mamae veli, e fakasa loa e le katiko lena ki le kakai leinei lona agaveli ofaipe se fakamaoki, talie e leaise toe galo loa a ia i le gutu o lona sakoga. E kau iloa a loto o le kakai leinei, ala foki kua kamata sa i le aso nei, kae e leikiaise kau fakaulu a ia ki le fenua leia na kau fakapapau ke soli kiate ia.
22I le aso lena, na tosi loa e Moisese le katiko lena ti na ako loa e ia a ia ki fanau a Iselaele.
23Na tuku loa e le Eteleno ana fakatotonu kia Sosue, vosa o Nune. Na pati loa a ia : Ke ke fakamakeke mo ke loto makeke, talie ko koe leia e fakaulu ia loa fanau a Iselaele ki le fenua leia na kau fakapapau ke soli kia latou ; ti e kau nofo totonu loa mo koe.
24I le oki o le tosi katoa e Moisese i se tosi a folafola o le lao lena, 25na tuku loa e ia le fakatotonu leinei ki le kau Levi ala na amo ia le aleka o le sai a le Eteleno : 26Ke kotou too le tosi leinei o le lao, ti ke kotou tuku a ia ki tafa o le aleka o le sai o le Eteleno, lokoutou Atua ; e tuku loa a ia i ai ofaipe se fakamaoki kiate koe. 27Talie e kau iloa lou loto fefeka, mo le fefeka o lou ua. Kapau na kotou fakafesagai ki le Eteleno i le temi leia na kau mauli ai mo koutou, e feaki ake loa i le oki o loku mate ! 28Ke kotou fakatasii mai ki oku mua a fakamatuatua fuli o okoutou faasiga, mo okoutou ofisa. E kau lau loa a folafola anei ke lotou logo ki ai ti e kau too ia loa le lagi mo le kele ke fakamaoki kia koutou. 29Talie e kau iloa i le oki o loku mate e kotou fai loa ni nea fakalumaluma, ti e kotou maliu kese loa i le ala leia na kau fakasa kia koutou ; ti e soko loa kia koutou le malaia i temi ka au, ala e kotou fai ai loa le nea leia e veli ki mata o le Eteleno, ke tupu ai lona sausau kia koutou.
30Na lau loa e Moisese a kupu fuli o le katiko leinei ki le fakatasi katoa o fanau a Iselaele.
Currently Selected:
Tetelonome 31: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
