Tetelonome 29
29
Fakafoou o le sai
1Ko nei a folafola o le sai leia na fakatotonu e le Eteleno kia Moisese ke fai mo fanau a Iselaele i le fenua o Moape, kae kese fai le sai leia na fai e ia mo latou i Olepe.
2Na tanaki loa e Moisese a Iselaele katoa, o pati kia latou : Kua kotou tio ki nea fuli ala na fai e le Eteleno i okoutou mata, i le fenua o Esipito, kia Falaone, mo ana tagata fakasausau, mo lona fenua katoa. 3Na tio okoutou mata ki asiasii lalasi ala na tuku e le Eteleno kia latou, mo milakulo, mo nea fakaofolele lalasi. 4Kae, o kaku mai ki le aso leinei, na leaise tuku e le Eteleno kia koutou se loto ke matala, mo ni mata ke tio, mo ni taliga ke logo. 5Na kau taki a koe i le toafa i le lolotoga o fetuu e kau fa : na leaise popo fua ou teu iate koe, ti na leaise popo fua lou taka i lou vae ; 6na leaise kotou kai se pane, ti na leaise kotou inu se vino pe ko se kava makeke, o tupu ke kotou iloa ko au ko le Eteleno, lokoutou Atua. 7Na kotou kaku mai loa ki le ganea leinei ; ti na au loa Sioni, sau o Eseponi, mo Oki, sau o Pasani, o fakafelavei mai kia tatou ke taui tatou, kae na tou malo loa ia latou. 8Na tou too loa lolatou fenua ti na tou tuku loa a ia ki le kau Lupeni, mo le kau Kate, mo le vaelua o le kau Manase. 9Koia ke kotou tausi loa a folafola o le sai leinei ti ke kotou fai loa latou, o tupu ke kotou malo i nea fuli ala e kotou fai loa.
10I le aso nei e kotou tutuu fuli loa i mua o le Eteleno, lokotou Atua, mo okoutou pule faasiga, mo okoutou fakamatuatua, mo okoutou ofisa, mo tagata fuli o Iselaele, 11mo okoutou fanau, mo okoutou fafine, mo le matapule leia e nofo i loto malie o lou nofolaga, mei leia e tuuti ia lau fafie o kaku ki leia e asu ia lau vai. 12E fai loa e le Eteleno, lou Atua, se sai mo koe i le aso nei, ti e fakaafe loa e ia a koe ke ke fakamaoki a ia ki sau fakapapau fakaalialiki, 13o tupu ke ke liliu i le aso nei ko lona kakai ti ke nofo a ia ko lou Atua, o fai ki lana pati atu kiate koe, mo lana fakapapau leia na fai ki ou tamana ko Apalaamo, mo Isaake, mo Sakopo. 14E leaise kau fai le sai leinei mo koutou fua, io, le sai leia kua fakamaoki ki se fakapapau. 15Kae e kau fai a ia mo latou fuli ala e tutuu i le aso nei i mua o le Eteleno, lotatou Atua, mo latou fuli ala e pupuli i leinei ia tatou i le aso nei.
Fua o le pati gataa
16Ke kotou iloa le temi leia na tou nonofo ai i le fenua o Esipito, ti mo le temi leia na tou fakalaka ai i loto malie o puleaga ala na tou saele ai i lolatou fenua. 17Na kotou tio ki taulaatua fakalialia fuli ala e atolasio ki ai a puleaga ana, ko ni atua ala e fau ki laakau mo fatu, ti e teuteu ki le paaga mo le aulo. 18Ke aua na maua loa ia koutou se tagata pe ko se fafine, pe ko se famili pe ko se faasiga, leia e veli lona loto ke maliu i le aso nei mei le Eteleno, lotatou Atua, o ano o tausi ki atua o puleaga ana. Ke aua na maua loa ia koutou se aka leia e fakatupu ia se au kona mo se kava kona. 19Ke aua na i ai loa se tasi, leia e oki loa lana logo ki folafola o le sai leinei, ti e fia nealasi loa lona loto, o pati : E kau maua loa le tokamalie, logo ai e kau mulimuli loa ki olioli o loku loto, ti e kau fakalasi loa le fia inu ki le kona. 20E leaise toe loto loa le Eteleno ke fakamolemole ki le tagata lena. Kae e mu loa le sausau mo le finenonofo o le Eteleno ki le tagata a ia, ti e vilo loa malaia fuli ala e tuu i le tosi leinei kiate ia, ti e soloi loa e le Eteleno lona igoa i lalo o le lagi. 21E tuku loa a ia e le Eteleno ki le malaia, o fakamavae oki loa a ia mei le kakai o Iselaele, o mulimuli ki malaia fuli o le sai leia e tuu i le tosi leinei o le lao. 22Ko tautupu ka au, okoutou vosa ala e tupu ake loa i muli o koutou, mo le matapule leia e au loa mei se fenua mamao, - i le tio ki malaia mo masaki ala e tautea loa ki ai e le Eteleno le fenua leinei, i le tio ki le sufele mo le patai, 23mo le vela katoa o le fenua leinei, leia e leaise maua loa i ai se pulapula, mo se fua, mo se mutie leia e somo, ofaipe le tutu o Sotoma mo Komola, mo Atema mo Sepoimi, ala na maumaui e le Eteleno i lona sausau mo lona finenonofo, - 24e pati loa puleaga fuli ana : Kolea na fai fenaaki ai e le Eteleno ki le fenua leinei ? Kolea kua veli fenaaki ai le sausau o le Eteleno ? 25Ti e tali loa : E tupu na lotou tiaki le sai leia na fakamaoki mo latou e le Eteleno, Atua o olatou tamana, i le aso leia na fakamavae ai e ia latou mei le fenua o Esipito. 26Ti e tupu na lotou ano o tausi ki ni atua kese ti mo atolasio kia latou, atua ala na leaise lotou iloa i mua ti na tapui e le Eteleno kia latou. 27Koia na mu ai loa le sausau o le Eteleno ki le fenua leinei, ti na kakau mai loa e ia kiate ia a malaia fuli ala e tuu i le tosi leinei. 28Na liligi loa e le Eteleno lona sausau kaka mo fakaii ki lona kakai, ti na taaki loa e ia a ia mei lona fenua, ti na kapu loa e ia a ia ki se fenua kese, leia e nofo ai i le aso nei.
29Ko nea ala koi munia a le Eteleno, lotatou Atua ; ko nea ala kua fakasa a tatou mo tou fanau, o lee gato, o tupu ke tou fai a folafola fuli o le lao leinei.
Currently Selected:
Tetelonome 29: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
