Tetelonome 27
27
Togi o le Lao ki ni fatu
i le mauga ko Epale
1Na tuku loa e Moisese mo le kau fakamatuatua o Iselaele le fakatotonu leinei ki le kakai : ke kotou tausi a folafola fuli ala e kau tuku atu kia koutou i le aso nei.
2Ka kotou ano loa o fakalaka i le Solotane, o ulu ki le fenua leia e soli atu loa kia koutou e le Eteleno, lou Atua, e ke fakatuu loa ni fatu lalasi ti e ke pena loa latou ki le lase. 3E ke tosi loa i fatu ana a folafola fuli o le lao leinei, mo ka ke ulu loa ki le fenua leia e soli atu loa kiate koe e le Eteleno, lou Atua, fenua leia e sali ai le sua manu mo le meli, o fai ki le pati atu kiate koe e le Eteleno, le Atua o ou tamana. 4Ka kotou fakalaka loa i le Solotane, e kotou fakatuu loa i aluga o le mauga ko Epale a fatu ala e kau fakatotonu atu kia koutou i le aso nei, ti e kotou pena loa latou ki le lase. 5I le ganea lena, e ke fai loa se aletale ki le Eteleno, lou Atua, ki ni fatu ala na leaise lave ki ai se ukamea. 6E ke fau loa ki ni fatu katoa le aletale o le Eteleno, lou Atua. Ti e ke momoli loa i aluga o le aletale lena ni failaulau ki le Eteleno, lou Atua. 7E ke momoli foki mo ni sakilifisio fakafetai, ti e ke kai loa i lena ti mo ke fakafiafia loa i mua o le Eteleno, lou Atua. 8E ke tosi loa i aluga o fatu ana a folafola fuli o le lao leinei, ti e ke togi loa latou ke mailoga malie.
9Na masau loa Moisese mo le kau Levi faisakilifisio mo Iselaele katoa, o pati : Iselaele, ke ke fakalologo o fakalogo mai ! I le aso nei kua ke liliu ko le kakai a le Eteleno, lou Atua. 10E ke fakalogo loa ki le leo o le Eteleno, lou Atua, ti e ke fai loa ana folafola mo ana lao ala e kau tuku kiate koe i le aso nei.
Tapuakina i le mauga ko Kalisimi ti mo malaia i le mauga ko Epale
11I le aso foki lena, na tuku loa e Moisese le fakatotonu leinei ki le kakai : 12Ka kotou fakalaka loa i le Solotane, e tuu loa Simeone, mo Levi, mo Suta, mo Isakale, mo Sosefo, mo Pesamino, i aluga o le mauga ko Kalisimi o tapuaki ki le kakai ; 13kae tuu loa Lupeni, mo Kate, mo Asele, mo Sapulone, mo Tane, mo Nefetali, i aluga o le mauga ko Epale o tuku le malaia.
14Ti e masau loa le kau Levi, o pati leo lasi ki Iselaele katoa :
15Ke malaia le tagata leia e fai ia loa se fakatata ta, pe ko se fakatata saka, o fakatuu a ia i se ganea fakapulipuli ! Talie e fakalialia le Eteleno ki le nea a ia, ki le nea leia na gaoi e lima o le tagata tufuga. Ti e tali loa le kakai katoa : Amene !
16Ke malaia le tagata leia e leaise fakaapaapa loa ki lona tamana mo lona tinana ! Ti e pati loa le kakai katoa : Amene !
17Ke malaia le tagata leia e fetogi ia loa a koiga o lona oloi ! Ti e pati loa le kakai katoa : Amene !
18Ke malaia le tagata leia e taki ia loa se tagata kivi ki se ala kese ! Ti e tali loa le kakai katoa : Amene !
19Ke malaia le tagata leia e fakasalai ia loa le fakamaau o se matapule, pe ko se fanau leia e sala tamana, pe ko se fafine leia e sala avaga ! Ti e pati loa le kakai katoa : Amene !
20Ke malaia le tagata leia e momoe loa mo le avaga o lona tamana, talie e sufegi e ia le kie kafu o lona tamana ! Ti e pati loa le kakai katoa : Amene !
21Ke malaia le tagata leia e momoe loa mo se manu ! Ti e pati loa le kakai katoa : Amene !
22Ke malaia le tagata leia e momoe loa mo lona tuagaane, taine o lona tamana totonu, pe taine o lona tinana totonu ! Ti e pati loa le kakai katoa : Amene !
23Ke malaia le tagata leia e momoe loa mo le tinana o lona avaga ! Ti e pati loa le kakai katoa : Amene !
24Ke malaia le tagata leia e taai fakafufu ia loa lona oloi ! Ti e pati loa le kakai katoa : Amene !
25Ke malaia le tagata leia e tali ia loa se moliga ke liligi ai le toto o le tagata mea ! Ti e pati loa le kakai katoa : Amene !
26Ke malaia le tagata leia e leaise fakalogo loa ki folafola o le lao leinei, ti e leaise fai ia loa latou ! Ti e pati loa le kakai katoa : Amene !
Currently Selected:
Tetelonome 27: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
