Tetelonome 13
13
Tautea o polofeta loi
1Kapau e malaga ake loa iate koe se polofeta pe ko se tagata fai kikite leia e fakasa ia kiate koe se fakamailoga pe ko se nea fakaofolele, 2ti kapau e soko loa le fakamailoga lena mo le nea fakaofolele lena o mulimuli ki le nea leia na fakasa e ia kiate koe, o pati : tou ano i muli o ni iki atua kese, ko ni atua ala e leaise ke iloa, ti tou tausi latou, 3ke aua na ke fakalogo loa ki masau a le polofeta lena pe ko le tagata fai kikite lena, talie ko le Eteleno, lokoutou Atua, lena e asiasii ia koutou ke iloa pe kotou alofa ki le Eteleno, lokoutou Atua, i lokoutou loto katoa mo lokoutou laumalie katoa. 4Ke kotou mulimuli loa i le Eteleno, lokoutou Atua, ti ke kotou i loa kiate ia ; ke kotou tausi loa ana folafola, ke kotou fakalogo loa ki lona leo, ke kotou tausi loa kiate ia, ti ke kotou pipiki loa kiate ia.
5Ke tautea loa ki le mate le polofeta lena pe ko le tagata fai kikite lena, talie na masau a ia ke fakafesagai ki le Eteleno, lokoutou Atua, leia na fakamavae ia a koe mei le fenua o Esipito, ti na saofaki ia koutou mei le fale o le popula, ti na loto a ia ke fakamaliu a koe mei le ala leia na fakatotonu e le Eteleno, lou Atua, ke ke saele ai. E ke too loa i ai le veli mei loto malie o lou kakai.
6Kapau e fakasekeseke fakafufu loa kiate koe lou taina, le vosa o lou tinana, pe ko lou vosa, pe ko lou taine, pe ko lau avaga totonu, pe ko lou soa leia e ke alofa ki ai ofaipe koe totonu, o pati atu : Ke ta ano o tausi ki ni iki atua kese ! ko ni atua ala e leaise ke iloa ti na leaise iloa foki e ou tamana ; 7kae ko ni atua o puleaga ala e takatakai ia koutou, pe ofi pe mamao, pe mei le potupotu o le malama nei ki le potupotu o le malama nei, 8ke aua ai na ke tali loa ti mo ke fakalogo loa ki ni masau fenaaki, ti ke aua na maua loa e lou mata se alofa ki le tagata lena, ti ke aua na ke fakamauli loa a ia pe ke ufiufi loa a ia. 9Kae ke ke tamate loa a ia : e uluaki siki loa lou lima, o tamate a ia, ti o siki loa le lima o le kakai katoa ; 10ke ke tuki fatui loa a ia ke mate, talie na faiga a ia ke ke mavae mei le Eteleno, lou Atua, leia na fakamavae ia a koe mei le fenua o Esipito, mei le fale o le popula. 11E fenaaki loa, o tupu ke logo ti ke i a Iselaele katoa, ti ke aua na toe fai loa se agaveli fenaaki iate koe.
Tautea o kolo e tausi ki taulaatua
12Kapau e ke logo loa i se aso, o uiga mo se kolo i kolo ala na soli atu kiate koe e le Eteleno, lou Atua, ke ke nofo ai, e pati : 13Na i ai se kau tagata noa leia na mavae meiate koe ti na fakasalai ia le kakai o le kolo lena o pati : tou ano, o tausi ki ni atua kese, ki ni atua ala e leaise kotou iloa, 14e ke fai loa ni afaafa totonu, o ke sivisivi loa ti mo ke vesivesili loa. Pe maoki le nea lena, pe na soko maoki a ia, pe na fai maoki le nea fakalialia lena i loto malie o ou ? 15Ti kapau e ke maua loa kua fai maoki le nea lena i loto malie o ou, ke ke tamate loa ki le seleta le kakai katoa o le kolo lena mo manu fuli, ti ke maumaui loa le kolo mo nea fuli ala e maua i ai. 16Ke ke tanaki loa le koloa katoa ki loto malie o le kolo, ti ke tutu katoa loa i le afi le kolo mo ona koloa fuli, i mua o le Eteleno, lou Atua : e tuu loa a ia ko se tuuga nea maumau, e leaise toe fakatuu loa a ia i se aso. 17Ke aua na ke too ia loa se nea i nea fuli ala kua tapui kiate koe, o tupu ke fimalie le sausau o le Eteleno, ti ke fakasa loa e ia lona manava alofa mo lona kalasia kiate koe, o fakaliliu loa a koe o api, o fai ki lana fakapapau ki ou tamana, 18mo kapau e ke fakalogo ki le leo o le Eteleno, lou Atua, o tausi ana folafola fuli ala e kau tuku atu kiate koe i le aso nei, ti mo fai le nea leia e malie ki mata o le Eteleno, lou Atua.
Currently Selected:
Tetelonome 13: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
