Tetelonome 1
1
Fakamanatu o folafola a le Eteleno
1Ko nei folafola ala na tuku loa e Moisese ki Iselaele katoa i le fetuu esite o le Solotane, i le toafa o Alapa, i mua o Sufi, i le vasa o Palani, mo Tofele, mo Lapane, mo Aseloti, mo Ti-Sasapi. 2Na aso kau agafulu tupu tasi le fanoga mei Olepe ki Katesi-Palenea, i le ala o le mauga ko Seili. 3I le kau fa fetuu mei le mavae mei Esipito, i le kau agafulu tupu tasi o masina, i le uluaki aso o le masina, na tuku loa e Moisese ki fanau a Iselaele a nea fuli ala na fakatotonu e le Eteleno ke fakasa kia latou. 4Na fai loa le nea lena i le oki o le malo a Moisese ia Sioni, sau o le kau Amole, leia na nofo i Eseponi, mo Oki, sau o Pasani, leia na nofo i Asetaloti mo Etelei. 5I le fetuu esite o le Solotane, i le fenua o Moape, na kamata loa e Moisese le ako o le lao a le Atua ki fanau a Iselaele, o pati :
6Na masau mai le Eteleno, lotatou Atua, kia tatou i Olepe, o pati : Kua feauga lakotou nofo i le mauga leinei. 7Kotou maliu, o ano ; kotou ano ki le mauga o le kau Amole, mo fenua ala e ofi ki ai, i le fenua laumalie, i le fenua o mauga liliki, i le fenua o le Solotane, i le fenua saute, i le fenua o le mata tai, i le fenua o le kau Kanaane mo le Lipane, o kaku ki le vaitafe lasi ko le Eufalate.
8Kotou tio, kua kau tuku le fenua ki okoutou mua ; kotou ano, ti kotou too le fenua leia na fakapapau e le Eteleno ke soli ki okoutou tamana, ko Apalaamo, mo Isaake, mo Sakopo, mo lolatou sakoga i muli o latou.
9I le temi lena, na kau pati atu loa kia koutou : e leaise kau mafai ia, e au toka tasi, le amo o koutou. 10Kua fakaliuliuga koutou e le Eteleno, lokoutou Atua, ti kua kotou api i le aso nei o tatau mo fetuu o le lagi. 11Ke alofa le Eteleno, le Atua o okoutou tamana, o fakaapi koutou ke liuga tua afe ti mo tapuakii koutou o mulimuli ki lana fakapapau ! 12Pe feaki loa laku amo ia, e au toka tasi, lokoutou tausi, mo lokoutou kavega, mo akoutou fakavisi ? 13Kotou too i okoutou faasiga ni tagata poto, mo atamai, mo iloa, ti e kau fakanofo loa latou ke takitaki kia koutou. 14Na kotou tali mai loa kiate au, o pati : e malie le nea leia e ke masau ki ai. 15Ti na kau too loa latou ala na pule ki okoutou faasiga, ko ni tagata poto, mo iloa, ti na kau fakanofo loa latou ke pule kia koutou, ko iki ki tino afe, ko iki ki tino lelau, ko iki ki tino lima, ti ko iki ki tino agafulu, ti na kau tuku loa ki iki ke leoleo ki okoutou faasiga. 16Na kau tuku loa, i le temi lena, le fakatotonu leinei ki okoutou tui fakamaau : ke kotou fakalogo ki okoutou fetaina, ti ke kotou fakamaaui i le faitotonu a visi a le tagata mo lona taina pe ko se tagata matapule. 17Ke aua na kotou tiotio tagata i se fakamaau ; ke kotou logo fakatatau ki leia e ikiiki mo leia e lasi ; ke aua na kotou i ki se tagata, talie e kotou fakamaaui i le suafa o le Atua. Ti kapau e faigataa loa se nea kia koutou, ke kotou aumai loa a ia kiate au, ke kau logo ki ai. 18I le temi lena, na kau fakasa fenaaki kia koutou a nea fuli ala e tonu ke kotou fai.
Pati gataa o Iselaele i Katesi-Palenea
19Na tou mavae loa i Olepe, ti na tou foli katoa loa i le toafa lasi mo fakaii leinei kua kotou iloa ; na tou too loa le ala leia e ano ki le mauga o le kau Amole, o mulimuli ki le fakatotonu a le Eteleno, ti na tou kaku loa ki Katesi-Palenea.
20Na kau pati loa kia koutou : Kua kotou kaku ki le mauga o le kau Amole leia e soli kia koutou e le Eteleno, lotatou Atua. 21Tio, e tuku e le Eteleno, lou Atua, le fenua ki ou mua. Pale, o too a ia, ofai ki le nea leia na fakasa kiate koe e le Eteleno, le Atua o okoutou tamana. Ke aua na ke i, ti ke aua na ke loto gaegae. 22Na kotou fakafeofi fuli mai loa kiate au, o pati : Ke tou kakau ni tagata i mua o tatou, ke tioi ia le fenua, ti ke fakasa mai kia tatou le ala leia e tonu ke tou pale ai mo kolo ala e tonu ke tou kaku ki ai. 23Na malie loa le manatu lena kiate au, ti na kau too loa ni tagata e tino agafulu tupu lua ia koutou, ko se fa tagata i le faasiga. 24Na lotou pale loa ki le mauga, ti na lotou kaku loa ki le fenua o Esekoli leia na lotou tioi loa. 25Na lotou too loa i olatou lima ni fuai laakau o le fenua, o aumai kia tatou. Na lotou fai loa kia tatou se fakamatala, o pati : Ko se fenua malie leia e soli mai kia tatou e le Eteleno, lotatou Atua. 26Kae na leaise kotou loto loa ke pale ki ai, ti na kotou agatuu loa ki le fakatotonu a le Eteleno, lokoutou Atua. 27Na kotou lalau loa i okoutou falela, o pati : E vesia le Eteleno kia tatou, koia leia na fakamavae ai e ia tatou mei le fenua o Esipito, o tupu ke tuku tatou ki lima o le kau Amole ti ke maumaui tatou. 28E tou ano loa kifea ? Kua fakagaegae otatou loto e otatou fetaina, o pati : Ko se kakai leia e makeke ake ti e lalasi ake ia tatou ; ko ni kolo ala e lalasi ti e a takatakai o kaku ki le lagi. Na lotou tio foki i ai ki ni fanau a Anake ! 29Na kau pati loa kia koutou : Ke aua na kotou loto gaegae, ti ke aua na kotou i kia latou. 30Ko le Eteleno, lokoutou Atua, leia e saele i mua o koutou, e tau loa kia koutou, ofaipe lana fai kia koutou i Esipito, i okoutou mua, 31ti mo le toafa, leia na ke tio ai ki le aga a le Eteleno, lou Atua, o amo a koe ofaipe se tagata leia e amo ia lona vosa, i le ala katoa leia na kotou fai o kaku mai ki le ganea leinei. 32Kae, i le temi lena, na leaise kotou fanaki ki le Eteleno, lokoutou Atua, 33leia na ano i mua o koutou i le ala, o afa se ganea leia ke fakatuu ai okoutou falela ; i le pouli i se afi ke fakasa ia le ala leia e tonu ke kotou saele ai ; i le ao i se pou afu ke fakamalumalu ai koutou.
34Na logo loa le Eteleno ki le logoa o akoutou masau. I lona sausau, na fakapapau loa a ia, o pati : 35e leaise tio loa se tagata e toka tasi o le tautupu agaveli leinei ki le fenua malie leia na kau fakapapau ke soli ki okoutou tamana, 36gato fai kia Kalepo, vosa o Sefune, e tio loa ki le fenua lena, ti e kau soli loa kiate ia mo ona vosa le fenua leia na saele ai a ia, talie na mulimuli katoa a ia i le ala o le Eteleno. 37Na sausaua foki le Eteleno kiate au, o tupu ko koutou, ti na pati loa a ia : Ko koe foki, e leaise ke ulu loa ki le fenua. 38Kae ko Sosue, vosa o Nune, leia e fakasausau kiate koe, e ulu loa ki le fenua. Fakamakekei a ia, talie ko ia leia e fakaulu ia loa Iselaele ki le fenua leia ko lona tofiga. 39Ti ko okoutou fanau liliki, ala na kotou pati ki ai : E lotou liliu loa ko le koloa o le fili malo ! Io, ko okoutou vosa, ala na leaise iloa ia le nea leia e malie mo le nea leia e veli i le aso lena, ko latou loa ala e ulu loa ki le fenua mo Sosue. 40Kae ko koutou, ke kotou maliu loa i le aso nei, o ano ki le toafa, i le ala ki le tai Kula.
41Na kotou tali loa, o pati mai kiate au : Kua motou agasala ki le Eteleno. Kae i le aso nei e motou pale loa ti e motou tau loa, o mulimuli ki le nea leia kua fakatotonu mai kia matou e le Eteleno. Ti na kotou tasi too ia loa ana masafu, o nonoa ki lona kilipipi, talie na kotou pati e faigaofie loa le too o le mauga. 42Kae na pati mai loa le Eteleno kiate au : pati kia latou : ke aua na kotou pale ki le mauga ti ke aua na kotou tau, talie e leaise kau nofo mo koutou, talie e kotou sosola loa i mua okoutou fili. 43Na kau masau kia koutou, kae na leaise kotou fakalogo. Na kotou fakafefeka loa ki fakatotonu a le Eteleno, ti na kotou fia nealasi loa, o pale ki le mauga. 44Ti na ifo ake loa kia koutou le kau Amole, ala na nofo i le mauga lena, ofaipe se mumuiga lago meli, o tamate koutou i Seili, ti mo kapu koutou o kaku ki Olama. 45I lakoutou toe liliu mai, na kotou tagi loa i mua o le Eteleno ; kae na leaise fakalogo loa le Eteleno ki lokoutou leo, ti na leaise tokaga loa a ia kia koutou.
46Koia na kotou nofo fualoa ai loa, io, o fualoa veli ai, i Katesi-Palenea.
Currently Selected:
Tetelonome 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
