Taniela 8

Tio o le ovi tagata mo le koti tagata

1I le tolu o fetuu o le sau ko Pelesatesale, ko au Taniela, na fakatio loa au e le Atua ki se nea, leia na kese ake i nea ala na kau tio ki ai i mua atu. 2I laku moe miti lena, na sakinake kiate au e kau nofo i Suse, le kolo mua o le fenua ko Elame ; i laku moe na kau tio loa e kau tuu i le laugutu o le vaitafe ko Ulai.

3Na kau tagaki loa ti na kau tio, ti ko leinei na tuu se ovi tagata i mua o le vaitafe. Na maua e ia ni ona tala loloa, ti ko le tala leia na somo fakamuli ake na taualuga ake i la ake a tala. 4Na kau tio loa ki le ovi tagata leia na ta ia ona tala ki le uesite, mo le noleto, ti mo le saute ; na leaise mafai e se manu e tasi ke tuu i ona mua, ti na leaise mafai e se tasi ke saofaki ia mei ona lima ; kae na fai e ia ki lona loto, ti na liliu loa a ia o makeke.

5Koi kau lolotoga fakakaukau ki ai, ko leinei, na au se koti tagata mei le potu uesite i fuga o le malama nei katoa, kae na leaise lave ona vae ki ai ; na maua e le koti tagata lena se tala lasi i le vasa o ona mata. 6Na kaku loa a ia ki le ovi tagata leia na maua ia ni tala, ti na kau tio e tuu a ia i mua o le vaitafe, ti na makape loa a ia kiate ia i lona makeke katoa. 7Na kau tio loa kiate ia kua fakafeofi ki le ovi tagata, o itaita kiate ia ; na taai loa e ia le ovi tagata, o fatii ona tala e lua, kae na leaise maua loa e le ovi tagata se makeke ke tuu i ona mua. Na ti loa e ia le ovi tagata ki le kele, o takatakafi a ia, ti na leaise tasi ke saofaki ia a ia. 8Na liliu loa le koti tagata o makeke lasi ; kae i lana kaku o makeke, na fati loa lona tala. Na malaga ake loa a tala lalasi e fa o fetogi a ia, i fetuu matagi e fa o le lagi.

9Mei se tasi o tala ana, na somo ake loa se ga tala ikiiki, leia na tupu ake loa o lasi ki le saute, mo le esite, mo le fenua o le manuia. 10Na malaga loa a ia o kaku ki le kau tau o le lagi, ti na fakavilo loa e ia ki le kele se potu o le kau tau lena mo fetuu, ti na takatakafi loa e ia latou. 11Na malaga loa a ia o kaku ki le pule o le kau tau, ti na too loa e ia le failaulau o aso taki tasi meiate ia, kae fakakelekele loa e ia le sagatualio. 12Na tuku loa kiate ia le kau tau mo le failaulau o aso taki tasi, o tupu ko le agasala ; na ti loa e le tala le maoki ki le kele, ti na manuia loa ana gaoi fuli. 13Na kau logo loa ki le masau a se aselo, ti na tali loa se tasi ake aselo ki leia na masau : Pe fualoa loa le temi leia e soko ai le tio ki le sakilifisio o aso taki tasi, mo le agasala o le tagata maumau ? Pe kaku loa kiafea le takatakafi o le sagatualio mo le solia o le lagi ? 14Ti na pati mai loa a ia kiate au : Ko afiafi mo usu e lua afe kau lelau tolu ; ti e mea loa le sagatualio.

15Ko au Taniela, na kau maua ia le tio lena, ti na kau afa ke kau matala ki ai, ti ko leinei, na tuu se tasi leia na faipe se tagata i oku mua. 16Ti na kau logo loa ki le leo o se tagata i loto malie o le vaitafe ko Ulai ; na kalaga loa a ia, o pati : Kapeliele, fakamatala kiate ia le tio. 17Ti na au loa Kapeliele ki le ganea leia na kau nofo ai ; ti na kau i i lana fakafeofi mai kiate au, ti na kau punou loa, o fakatuu oku mata ki le kele. Na pati mai loa a ia kiate au : Tokaga, ei vosa o le tagata, talie e uiga le tio mo se temi leia e liliu loa ko le temi fakaoki. 18I le lolotoga o lana masau mai kiate au, na kau fakapulou oku mata ki le kele, ofaipe se tasi kua mata fakapouli. Ti na fafa mai loa a ia kiate au, ti na fakatuu loa e ia au ki aluga i le ganea leia na kau nofo ai. 19Ti na pati mai loa a ia kiate au : E kau fakasa atu loa kiate koe le nea leia ka soko loa i le oki o le sausau o le Atua, talie e i ai se temi leia kua fakamailoga ki le fakaoki. 20Ko le ovi tagata leia na ke tio ki ai, ti na maua ia ni tala, ko sau ana o le kau Meti mo le kau Pelesi. 21Ko le koti tagata, ko le sau a ia o Sava. Ko le tala lasi i vasa o ona mata, ko le uluaki sau a ia. 22Ko tala e fa ala na malaga ake o fetogi le tala lasi lena kua fati, ko puleaga ana e fa ala e sosomo ake loa o fetogi le puleaga lena, kae e leaise lotou maua loa le makeke o le uluaki puleaga. 23I le oki o lalatou pule, mo ka maumaui loa le kau agasala, e malaga ake loa se sau matasoka mo poto kaka. 24E tupu loa lona makeke o lasi, kae e leaise ko lona makeke totonu o ona ; e fai loa e ia ni maumau fakaii, ti e manuia loa ana gaoi, ti e maumaui loa e ia le kau lalasi mo le kakai o le kau sagato. 25O tupu ko le lasi o lona koloa ti mo le manuia o ana kaka, e maua loa e ia i lona loto le fia nealasi, ti e tamate loa e ia ni tagata i ala na mauli fimalie, ti e malaga loa a ia ki le Aliki o aliki ; kae e fatii loa a ia, sala mo se tokoi a se lima. 26E maoki le tio o afiafi mo usu. Kiate koe, taupau fakafufu le nea leia na ke tio ki ai, talie ko se nea o uiga mo ni temi koi mamao.

27Ko au Taniela, na kau gaegae veli ai ti na kau masaki loa i ni aso e mauke ; ti oki, na kau tuu loa ki aluga ti na kau tokaga loa ki gaoi a le sau. Na kau punamauli i le nea leia na kau tio ki ai, ti na leaise iloa a ia e se tasi.

Currently Selected:

Taniela 8: FB2000

Highlight

Copy

Compare