Taniela 1
1
Taniela mo ona kaukaunea
1I le fetuu tolu a le sau ko Sosakimi, sau o Suta, na au loa a Nepukatenesale, sau o Papilone, o taui Selusalemi. 2Na tuku loa e le Aliki ki ona lima Sosakimi, sau o Suta, mo se potu o nea gaoi o le fale tapu o le Atua. Na ave loa e Nepukatenesale a nea gaoi ki le fenua o Sinea, ki le fale o lona atua, ti na tuku e ia a nea gaoi ki le fale koloa o lona atua.
3Na tuku loa e le sau le fakatotonu kia Asipenasi, pule o le kau enuke, ke aumai ni iki i fanau o Iselaele, ala e kau i le sakoga fakasau pe ko ni famili aliki, 4ni tama tupulaga lee mele fakatino, mo mata fulumalie, mo poto, mo atamai, ti na malie lolatou ako, ti na mafai ke gaoi i le fale o le sau, ti ke ako loa kia latou le faitosi mo le masau a le kau Kaletea. 5Na fakatotonu loa e le sau ke tuku kia latou i aso taki tasi se vaega mei nea kai o lona laupapa ti mo le vino leia e inu e ia. Na loto le sau ke ako latou i ni fetuu e tolu. I le oki o fetuu ana, e lotou ulu loa o tausi ki le sau. 6Na nofo ia latou, mei vosa o Suta, a Taniela, mo Anania, mo Misaele ti mo Asalia.
7Na soli loa e le pule o le kau enuke ni igoa kia latou, kia Taniela le igoa ko Pelesatesale, kia Anania leia ko Satalake, kia Misaele leia ko Mesake, kia Asalia leia ko Apeteneko.
8Na fakapapau loa Taniela i lona loto ke aua na fakakelekele a ia ki nea kai a le sau mo le vino leia e inu e ia, ti na kolekole loa a ia ki le pule o le kau enuke ke aua na fakamaua kiate ia ke fakakelekele a ia. 9Na fakatupu loa e le Atua i le loto o le pule o le kau enuke se loto malie mo se alofa kia Taniela. 10Ti na pati loa le pule o le kau enuke kia Taniela : E kau i ki loku aliki sau, leia na fakatotonu ia le nea leia e tonu ke kotou kai mo inu ; kolea e tio ai loa a ia ki okoutou mata e mamae ake i mata o la ake kau tupulaga leia e fetuu tasi mo koutou ; e teiteiki loa loku ulu o tupu ko koutou. 11Ti na pati loa Taniela ki le tagata leia na fakatotonu e le pule o le kau enuke ke tokaga kia Taniela, mo Anania, mo Misaele ti mo Asalia : 12Ke ke asiasii au tagata fakasausau i ni aso e kau agafulu, o ke soli mai kia matou ni magiti ata ke motou kai ti mo se vai ata ke motou inu ; 13ti e ke tioi loa omatou mata mo mata o le kau tupulaga leia e kai ki nea kai a le sau, ti e ke fai loa ki au tagata fakasausau o mulimuli ki le nea leia e ke tio loa ki ai. 14Na tali loa e ia lalatou kole, ti na asiasii loa e ia latou i ni aso e kau agafulu. 15I le oki o aso e kau agafulu, na lotou mata fiafia ake mo pepeti ake i le kau tupulaga fuli leia na kai ki nea kai a le sau. 16Ti na ave loa e le tagata leia na tausi kia latou a nea kai mo le vino leia na tonu ke soli kia latou, kae na soli loa e ia kia latou ni magiti ata.
17Na soli loa e le Atua ki tupulaga ana e toka fa le poto, mo le atamai i faasiga faitosi fuli ti mo le poto ; ti na fakamatala loa e Taniela a tio fuli mo moe miti fuli. 18I le kaku ki le temi leia na fakatuutuu e le sau ke avake ai latou kiate ia, na ave loa latou e le pule o le kau enuke ki mua o Nepukatenesale. 19Na masau loa le sau mo latou ; ti na leaise tasi fua i le kau tupulaga fuli lena, na tatau mo Taniela, mo Anania, mo Misaele ti mo Asalia. Na lotou ulu loa o tausi ki le sau. 20I nea fuli ala na aoga ki ai se poto mo se atamai, ti mo nea fuli ala na fakavesilii latou ki ai e le sau, na maua loa e le sau ia latou e lotou popoto lasi ake o tua kau agafulu i le kau fai nea fakatalatupua mo le kau sivi o le temi, ala na maua i lona puleaga katoa. 21Na fenaaki loa le mauli o Taniela o kaku ki le uluaki fetuu a le sau ko Silusi.
Currently Selected:
Taniela 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
