Lua tosi ki le kau Kolinto 12

E fakasa le makeke o le Atua i le gaegae o le tagata

1E tonu ke fakakololia… E leaise malie le nea lena. Kae e kau fia masau i le temi nei ki nea ala na kau tio ki ai mo logo ki ai ti na fakasa mai e le Aliki kiate au.

2E kau iloa se tagata ia Kilisito, kua sili ki ai ni fetuu e kau agafulu tupu fa, na ave a ia ki le tolu o lagi (pe na ave a ia i lona tino, e leaise kau iloa, pe sala i lona tino, e leaise kau iloa, ko le Atua e iloa ia). 3Ti e kau iloa ko le tagata lena (pe na soko i lona tino pe sala i lona tino, e leaise kau iloa, ko le Atua e iloa ia) 4na ave loa a ia ki le Palatiso ti na logo loa a ia ki ni masau fulumalilie ai ala e leaise taga ki se tagata ke fakasa ia.

Kafo o Paulo i lona tino

5E kau fakakololia loa ki se tagata fenaaki, kae kiate au totonu e leaise kau fakakololia loa, e kau fakakololia fai i oku gaegae. 6Kapau e kau loto ke kau fakakololia, e leaise kau fai loa pe se vale, talie e kau fakasa loa le maoki ; kae e leaise kau fai le nea lena, o tupu ke aua na maua e se tasi se manatu kiate au leia e taualuga ake i le nea leia e tio a ia ki ai iate au pe ko le nea leia e logo a ia ki ai meiate au.

7Tie talie ke aua na kau makita i le fia nealasi i nea malilie ala na fakatio au e le Atua ki ai, kua tuku e ia ki loku tino se maimoa mamae ai, ko se aselo o Satana leia ke ta ia au ti mo taofi ia au ke aua na kau fia nealasi. 8Ti na tua tolu laku kole ki le Aliki ke fakamamao le nea lena iate au, 9kae na pati mai a ia kiate au : e feauga loku kalasia kiate koe, talie e fakasoko loku makeke i le gaegae. Koia e kau fakakololia tafito loa i oku gaegae, o tupu ke nofo le makeke o Kilisito iate au. 10Koia e kau fiafia i oku gaegae, mo oku lauvelii, mo oku mativa, mo oku fakavelivelii, mo oku mamae, o tupu ko Kilisito ; talie ka kau gaegae, ti e kau makeke loa.

5) Fakatokaga a Paulo

11Kua kau valea : Na kotou eke au ke kau fenaaki. Ko kotou ala na tonu ke puipui ia au, talie na leaise kau taulalo fua i se nea i apositolo lalasi, logo ai e leai soku uiga. 12Kua fakasa a fakamaoki o laku gaoi fakaapositolo ia koutou i le kataki fualoa i asiasi fuli, mo ni fakamailoga, mo ni nea fakamanamana, ti mo ni milakulo. 13Pe na i ai se nea leia na kau fai fakaikiiki kia koutou i la ake Ekelesia ? Pe ko laku leaise fakaamo kia koutou loku taupau ? Kotou fakamolemole mai ki le sala lena !

14Ko leinei, ko le tua tolu leinei o laku tokamalie ke kau natu kia koutou, ti e leaise kotou taupau loa kiate au ; talie e leaise kau afa okoutou koloa, kae ko koutou totonu : E leaise gali ke tanaki a fanau ki olatou matua, kae ko matua ki olatou fanau. 15Kiate au, e kau fiafia lasi loa i le soli o nea fuli ala e kau maua mo loku mauli totonu o tupu ko okoutou laumalie. Pe kotou alofa ikiiki loa kiate au, mo kapau e kau alofa lasi kia koutou ?

16Io ! Na leaise kau liliu ko se kavega kia koutou ; kae, pe se tagata kaka, na kau tapo koutou ki se masele ! 17Pe na kau maua ia se nea meia koutou i se tasi o latou ala na kau kakau atu kia koutou ? 18Na kau kole kia Tito ke natu kia koutou, ti na kau kakau atu mo ia le taina leia na kau masau atu ki ai. Pe na kole fakamakeke e Tito se nea kia koutou ? Pe na leaise ma saele i se laumalie e tasi ti mo se ala e tasi ?

19Lagi kua fualoa lakotou pati e ma fakamatatonu ia maua i okoutou mua. E ma masau atu i mua o le Atua, ia Kilisito : ti ko nea fuli ana, alofaaga, e ma fakasa atu o tupu ke lagai ai koutou ki aluga. 20Talie e kau i na leaise kau maua koutou, i laku tau atu, ofaipe le nea leia e kau loto ki ai, ti ke kotou maua au ofaipe le nea leia e leaise kotou loto ki ai. E kau tuania na i ai ni fefele, mo ni finenonofo, mo ni masau lalasi, mo ni fefiliaki, mo ni fatufatu, mo ni lauveli, mo ni fia nealasi, ti mo ni maveuveu. 21E kau tuania, i laku tau atu, na toe fakataulaloi au e loku Atua i mua o koutou, ti ke kau tagi loa ki se toka api o latou ala na agasala i mua, ti na leikiaise fakasemala ki le aga fakakelekele, mo le fai feauaki, ti mo nea fakalialia fuli ala na lotou fai.

Currently Selected:

Lua tosi ki le kau Kolinto 12: FB2000

Highlight

Copy

Compare