Uluaki tosi ki le kau Tesalonika 5
5
Le saele fakakilisiteano
1Ki le nea o uiga mo temi ti mo lakaga, e leaise aoga, fetaina, ke kau fai tosi atu ki ai. 2Talie kua kotou iloa papau e koutou totonu ko le aso o le Aliki e au loa ofaipe se tagata kaia i le pouli. 3I le temi leia e pati ai loa a tagata : Tokamalie mo fimalie ! I le temi loa lena e fakamauatoka loa latou e se tuutamaki fakapunamauli, ofaipe mamae o le temi fanau ala e fakamauatoka ia le fafine faitoe ; ti e leaise lotou sao loa i ai.
4Kae ko koutou, fetaina, e leaise kotou nofo i le fakapouli, ke fakamauatoka koutou e le aso lena ofaipe se tagata kaia ; 5ko ni fanau fuli koutou o le malama ti mo le ao. E leaise tou kau i le pouli pe i le fakapouli. 6Koia aua na tou momoe ofaipe latou ake ala, kae tou alaala ti mo tou fakapotopoto. 7Talie ko latou ala e momoe, e momoe i le pouli, ti ko latou ala e konana, e konana i le pouli. 8Kae ko tatou ala e kau i le ao, tou fakapotopoto, tou kofu le kofu tau o le tui mo le alofa, ti tou too le puloga tau o le amanaki malie o le fakamauli. 9Talie na leaise fakatuutuu tatou e le Atua ki le sausau, kae ki le maua o le fakamauli i lotatou Aliki ko Sesu-Kilisito, 10leia na mate kia tatou, o tupu ke tou mauli fakatasi mo ia, pe ke tou alaala, pe ke tou momoe. 11Koia, kotou fefakapelepeleaki ia koutou ti kotou fefaufauaki ia koutou, o fai foki pe le nea leia e kotou fai maoki.
Fakatotonu fakamuli
12E motou kole atu kia koutou, fetaina, kotou fakaapaapa kia latou ala e gaoi kia koutou, mo takitaki ia koutou i le Aliki, ti mo ako ia koutou. 13Kotou maua kia latou se loto alofa lasi, o tupu ko lalatou gaoi. Kotou nonofo i le tokamalie ia koutou.
14E motou kole atu foki kia koutou, fetaina, ke kotou fakatonutonu latou ala e mauli maveuveu, mo kotou fakapelepelei latou ala e mamae, mo kotou tokoi kia latou ala e gagae, ti mo kotou kataki fualoa ki tagata fuli.
15Kotou tokaga ke aua na totogi e se tasi le veli ki le veli, kae ke kotou afa tuumau le malie i okoutou vasaa ti mo tagata fuli.
16Kotou fiafia tuumau.
17Kotou faikole sosoko. 18Kotou fakafetai i nea fuli, talie ko le finegalo a ia o le Atua ia Sesu-Kilisito kia koutou.
19Aua na kotou tamate le Laumalie. 20Aua na kotou fakanoai a kikite. 21Kae kotou sivisivi a nea fuli ; kotou taofi le nea leia e malie ;
22kotou fakamamao mei nea fuli e veli.
23Ke alofa le Atua o le tokamalie o fakamaokioki koutou, mo taupau koutou katoa, le loto, mo le laumalie, ti mo le tino, ke lee mele i le aso o le toe liliu mai o lotatou Aliki ko Sesu-Kilisito. 24E agatonu leia na kalagai ia koutou, ti ko ia leia e fai ia loa le nea lena.
25Fetaina, kotou ulufaki matou.
26Fakaalofa atu ki fetaina fuli i se sogi maokioki.
27E kau kole mamae atu kia koutou i le Aliki, ke lau le tosi leinei ki fetaina fuli.
28Ke nofo le kalasia o lotatou Aliki ko Sesu-Kilisito mo koutou !
Currently Selected:
Uluaki tosi ki le kau Tesalonika 5: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
