Uluaki tosi ki le kau Kolinto 9

Faifaitakiaga o Paulo i lana gaoi fakaapositolo

1Pe leaise kau lauatea ? Pe leaise ko se apositolo au ? Pe na leaise kau tio kia Sesu lotatou Aliki ? Pe leaise ko laku gaoiaga koutou i le Aliki ? 2Kapau ki ni iki e leaise ko se apositolo au, kae e kau apositolo maoki kia koutou ; talie ko le fakamaoki koutou o laku gaoi fakaapositolo i le Aliki. 3Ko lena laku fakasa kia latou ala e fakamaaui ia au. 4Pe leaise tonu ke ma tali ia se nea kai mo se nea inu ki lama gaoi ? 5Pe leaise tonu ke ma ave ia ni tuagaane ko ni oma avaga, ofaipe la ake apositolo, mo fetaina o le Aliki, ti mo Sefasi foki. 6Pe ko maua fua mo Palenapa ala e tonu ke ma gaoi ki oma mauli ? 7Ko ai leia e ano o tau, kae totogi e ia a ia totonu ? Ko ai leia e to ia se vite, kae e leaise kai a ia ki lona fua ? Ko ai leia e tausi ia se kau manu, kae e leaise inu a ia ki le sua u o le kau manu ?

E tonu ke mauli i le Evaselio latou e gaoi ki le Evaselio

8Ko nea anei e kau masau ki ai, pe maua fua latou i le fai a tagata ? Pe leaise fakasa foki latou e le lao ? 9Talie e tosi i le lao a Moisese : E leaise ke fakagutu loa le pipi mo ka takatakafi e ia le fulumeto. Pe tokaga fua le Atua ki pipi, 10pe masau foki a ia o tupu ko tatou ? Io, e tupu ko tatou leia kua tosi ai : ko leia e gaoi kele e tonu ke gaoi mo le amanaki malie, ti ko leia e takatakafi ia le fulumeto e tonu ke takatakafi mo le amanaki malie e maua loa e ia lona vaega. 11Kapau kua ma muluki ia koutou a koloa fakalaumalie, pe leaise taga ke ma maua se ganea fakaikiiki fua i okoutou koloa fakamalama ? 12Kapau e maua e ni iki a nea ana, pe leaise ko maua ala e tonu ke maua ia latou ? Kae na leaise ma fakaaoga le faigamalie lena ; talie, e ma kataki a nea fuli, o tupu ke aua na i ai se nea leia e fakavisi ki le Evaselio a Kilisito.

13Pe leaise kotou iloa ko latou ala e fai ia a gaoi tapu e fagai e le fale tapu, ti ko latou ala e tausi i le aletale e kau ki nea o le aletale ?

14E toe fenaaki foki, kua fakatotonu e le Aliki kia latou ala e fakasa ia le Evaselio ke mauli mei le Evaselio.

15Kiate au, na leaise kau fakaaoga fua a nea ana, ti e leaise kau tosi atu latou o tupu ke fai mai latou kiate au ; talie e kau malie ia ake loa loku mate i laku tuku loa ke too iate au le fakakololiaaga lena. 16Kapau e kau fakasa le Evaselio, e leaise tonu ke kau fakakololia i ai, talie kua tuku mai a ia kiate au, ti e malaia kiate au mo kapau e leaise kau fakasa le Evaselio ! 17Kapau e kau fai a ia i le loto malie, e kau maua loku totogi ; kae kapau e kau fai a ia logo ai ko au, ko se kavega a ia kua tuku mai kiate au. 18Kolea loa loku totogi ? Ko le momoli noa o le Evaselio leia e kau fakasa, kae leaise fakaaoga loku uiga ko le tagata fakamafola Evaselio.

19Talie, e logo ai loku lauatea mei tagata fuli, kae kua kau liliu ko se tagata fakasausau ki tagata fuli, o tupu ke maua ai se kakai toka api ake. 20I le kau Sutea, na kau faipe se Sutea, o tupu ke maua ai le kau Sutea ; ia latou ala e nonofo i le lao, na kau faipe se tagata leia e nofo i le lao, (logo ai e leaise kau nofo a au totonu i le lao), o tupu ke maua ai latou ala e nonofo i le lao ; 21i latou ala e leaise nofo i le lao a Moisese, na kau faipe se tagata leia e leaise nofo i le lao, (logo ai i mua o le Atua e leaise kau nofo sala lao, talie e kau nofo i le lao a Kilisito), o tupu ke maua ai latou ala e leaise nonofo i le lao a Moisese. 22Na kau gaegae mo le kau gagae, o tupu ke maua ai le kau gagae. Na kau fakatatau i nea fuli ki tagata fuli, o tupu ke kau saofaki ai ni iki. 23E kau fai a nea fuli o tupu ko le Evaselio, o tupu ke kau kau ki ona koloa.

Lekula o le makape fakakilisiteano

24Pe leaise kotou iloa ko latou ala e makape i le malae fai manogi e makape fuli, kae ko le toka tasi fai leia e maua ia le totogi ? Kotou makape o tupu ke kotou maua a ia ! 25Ko latou fuli ala e fai manogi e fakamaua latou ki sesunio kesekese fuli, ti e lotou fai a ia ke maua ai se pala popo, kae ko tatou, e tou fai a ia ki se pala lee popo. 26Tie kiate au, e kau makape, kae leaise fai noa ; e kau vusu, kae e leaise ta aele. 27Kae e kau fai fakaveliveli loku tino, ti e kau pulei fakamakeke a ia, o tupu na tiaki loa au i le oki o laku fakasa ia le Evaselio ki le kakai.

Currently Selected:

Uluaki tosi ki le kau Kolinto 9: FB2000

Highlight

Copy

Compare