Uluaki tosi ki le kau Kolinto 11

1Kotou faifaitaki mai kiate au, ofaipe laku faifaitaki foki kia Kilisito.

Teu o le fafine i le Ekelesia

2E kau fakavikiviki kia koutou, i lakotou manatui au i nea fuli, ti mo lakotou tausi aku akonaki ofaipe laku kua tuku atu latou kia koutou.

3Kae e kau loto ke kotou iloa ko Kilisito ko le pule a ia o tagata fuli ; ti ko le tagata ko le pule a ia o le fafine ; ti ko le Atua ko le pule a ia o Kilisito. 4Ko le tagata fuli e faikole pe kikite, kae puloui lona ulu, e fakalumai e ia lona pule. 5Ti ko le fafine fuli e faikole pe kikite, kae leaise puloui lona ulu, e fakalumai e ia lona pule : E tatau le fafine lena mo leia kua tele lona ulu. 6Talie kapau e leaise pulou se fafine, ke koti foki lona lauulu. Kae, kapau e fakalumaluma ki se fafine ke koti lona lauulu pe tele lona ulu, ke pulou a ia. 7E leaise tonu ke puloui e le tagata lona ulu, talie ko le paaki a ia o le kololia o le Atua, kae ko le fafine ko le kololia a ia o le tagata. 8Talie na leaise too le tagata mei le fafine, kae ko le fafine leia na too mei le tagata ; 9ti na leaise fakatupu le tagata o tupu ko le fafine, kae na fakatupu le fafine o tupu ko le tagata. 10Koia e tonu ai ke teki e le fafine ki lona ulu se fakamailoga o le pule leia e fakalogo a ia ki ai, o tupu ko le kau aselo. 11Kae ko leinei, i le Aliki, e leai le fafine sala mo le tagata, ti e leai le tagata sala mo le fafine. 12Talie, ofaipe le fafine na too mei le tagata, e tupu foki le tagata mei le fafine, ti e au nea fuli mei le Atua. 13Kotou sivisivi mua e kotou totonu : Pe malie ke faikole se fafine ki le Atua sala pulou ? 14Pe leaise ako mai e le natula totonu kia tatou ko se luma ke lauulu le tagata, 15kae ko se kololia ke lauulu le fafine, talie kua soli le lauulu kiate ia ofaipe se pulou ? 16Kapau e fia fakavisi ki ai se tasi, ke iloa e ia : e leaise ko se agamasani a ia ia matou, ti e toe tatau i Ekelesia fuli o le Atua.

Fai o le kai a le Aliki

17I le tuku atu o le valoki leinei, e leaise kau viki koutou, talie ka kotou fakatasi, e leaise tupu ke kotou liliu o asilisili malilie, kae ke kotou liliu o asilisili veveli oki. 18Ti ko le uluaki nea, e kau logo, ka kotou fakatasi fakaekelesia, e i ai ni fakavaevaega ia koutou, ti e kau teitei tui ki ai, 19talie e tonu ke i ai foki ni magai lotu ia koutou, o tupu ke iloa ai latou ala kua fakamaoki ia koutou. 20Koia ka kotou fakatasi ai, e leaise ko le kai a le Aliki leia e kotou too ; 21talie, ka soko le kai, e tasi kamata kai e le tagata lana nea kai, ti e fia kai le tasi, kae e kona le tasi. 22Pe leai ni okoutou fale ke kotou kai ai mo inu ai ? Pe kotou nukinuki ki le Ekelesia o le Atua, ti mo kotou fakalumai latou ala e leaise maua ia se nea ? Kolea ke kau pati loa kia koutou ? Pe kau vikiviki loa kia koutou ? I le nea lena e leaise kau vikiviki ai kia koutou.

23Talie kua kau tali mei le Aliki le nea leia na kau ako atu kia koutou ; ko le Aliki Sesu, i le po leia na fakatau ai a ia, na too ia loa le pane, 24ti i le oki o lana fakafetai, na tofitofi loa e ia a ia, o pati : ko loku tino leinei, leia kua tofitofi o tupu ko koutou ; kotou fai le nea leinei o fakamanatu kiate au. 25Ti na fenaaki foki, i le oki o le kai, na too loa e ia le ipu, o pati : Ko le ipu leinei o le sai foou i loku toto ; kotou fai le nea leinei ko se fakamanatu kiate au, i temi fuli ala e kotou inu ai loa a ia. 26Talie i faiaga fuli ala e kotou kai ai le pane leinei mo inu ai le ipu leinei, e kotou fakasa ia le mate o le Aliki, o kaku ki lana toe saele mai.

27Koia ko leia e kai ia loa le pane mo inu ia loa le ipu o le Aliki, mo se lee fakaapaapa, e sala loa a ia ki le tino mo le toto o le Aliki. 28Koia e malie ai ke tasi asiasii e le tagata a ia totonu, ti ke kai loa e ia le pane mo inu loa e ia le ipu ; 29talie ko leia e kai mo inu kae e leaise fakaapaapa a ia ki le tino o le Aliki, e kai mo inu e ia se malaia kiate ia totonu.

30Koia leia e gagae ai mo masasaki ai se toka api ia koutou, ti kua mamate ai foki se toka api. 31Kapau e tou asiasii tatou totonu, e leaise tautea loa tatou. 32Kae e fakamaaui tatou, ti e tautea tatou e le Aliki, o tupu ke aua na tou malaia fakatasi mo le malama nei. 33Koia, ei oku fetaina, ka kotou fakatasi ki le kai, kotou fetataliaki ia koutou. 34Kapau e fia kai se tasi, ke kai a ia i lona kaiga ; talie ke aua na kotou fakatasi ki le malaia. Koi kau fakatonutonu loa a la ake a nea mo ka kau kaku atu loa.

Currently Selected:

Uluaki tosi ki le kau Kolinto 11: FB2000

Highlight

Copy

Compare