Uluaki tosi ki le kau Kolinto 1
1
Fakaalofa
1Ko au Paulo, leia na kalagai ke liliu ko le apositolo a Sesu-Kilisito i le finegalo o le Atua, mo le taina ko Sositene, 2ki le Ekelesia o le Atua i Kolinito, kia latou ala kua vaei kese ia Sesu-Kilisito, ti kua kalagai ke maokioki, ti mo latou fuli ala e too ia i potu kesekese le suafa o lotatou Aliki ko Sesu-Kilisito, ko lolatou Aliki ti ko loma Aliki foki. 3Ke soli atu le kalasia mo le tokamalie kia koutou e le Atua ko lotatou Tamana ti mo le Aliki ko Sesu-Kilisito !
Fakafetai
4E kau fakafetai tuumau ki le Atua o uiga mo koutou, o tupu ko le kalasia o le Atua leia kua tuku atu e ia kia koutou ia Sesu-Kilisito, 5Talie iate ia kua kotou mou koloa i nea fuli o uiga mo le folafola ti mo le iloa, 6ofaipe le fakamaoki o Sesu-Kilisito leia kua tuu makeke ia koutou : 7Koia e leaise koi puli fua ia koutou se nea alofa, koutou ala e talitali ki le fakasa o lotatou Aliki ko Sesu-Kilisito. 8Ko ia foki leia e fakatuu makeke ia loa koutou o kaku ki le fakaoki, o tupu ke kotou saosaoa i le aso o lotatou Aliki ko Sesu-Kilisito. 9E agatonu le Atua, leia na kalagai ia koutou ki le komunio o lona Alo, ko Sesu-Kilisito lotatou Aliki.
Fakavaevaega i le Ekelesia o Kolinito
10Koia, fetaina, e kau kole mamae atu kia koutou i le suafa o lotatou Aliki ko Sesu-Kilisito, ke kotou masau fuli ki se masau e tasi, ti ke aua na maua ni fakavaevaega ia koutou, kae ke kotou pipiki tasi i se loto e tasi, ti mo se fakakaukau e tasi. 11Talie, ei oku fetaina, kua kau logo o uiga mo koutou, mei ni iki o le fale o Koloe, e maua ni veliveli ia koutou. 12E kau fia masau i leinei, e kotou tasi pati feneeki : Ko au, o Paulo au ! - ti ko au, o Apolosio ! - ti ko au, o Sefasi ! - ti ko au, o Kilisito ! 13Pe na mavaevae koia Kilisito ? Pe na kulusifiko koia Paulo o tupu ko koutou, pe na papitema koia koutou i le igoa o Paulo ? 14E kau fakafetai ki le Atua, na leaise kau papitema ia se tasi ia koutou, gato fai kia Kilisipusi mo Kaiusi ; 15Talie ke aua na pati loa se tasi kua papitema koutou i loku igoa. 16Ti na kau papitema foki le famili o Setefano, ti e leaise kau toe iloa pe na kau toe papitema se tasi kese ake.
Poto o le malama nei ; poto o le Atua
17Talie na leaise kakau mai au e Kilisito ke fai papitema, kae ke fakasa ia le Evaselio, ti ko le nea lena sala mo le poto o le masau, o tupu ke aua na fakaliliu o noa le koluse o Kilisito. 18Talie ko le akonaki o le koluse ko se valea a ia kia latou ala e malaia, kae kia tatou ala kua saofaki, ko se makeke a ia o le Atua.
19Talie kua tosi :
E kau maumaui loa le poto o le kau poto,
Ti e kau fakaliliu loa o noa le atamai o le kau atamai.
20Kofea le poto ? Kofea le sekelipa ? Kofea le tagata fakavisi o le malama nei ? Pe na leaise fakamaoki le Atua ko se valea le poto o le malama nei ? 21Talie i lona poto na leaise iloa e le malama nei le Atua, kae na malie ki le Atua i lona poto ke saofaki latou ala e tui ki le valea o le akonaki. 22E kole e le kau Sutea ni milakulo, ti e afa e le kau Keleka le poto, 23Kae ko maua, e ma fakasa Kilisito na tutuki i le koluse, ko le tukiaaga ki le kau Sutea, ti ko le valea ki le kau pagani, 24kae ko se makeke o le Atua mo se poto o le Atua kia latou ala kua kalagai, i le kau Sutea mo le kau Keleka. 25Talie ko le valea o le Atua e poto ake i tagata, ti ko le gaegae o le Atua e makeke ake i tagata.
26Kotou fakatiotio mua, fetaina, kia koutou ala kua kalagai : E leaise api ni poto i le fakatino, ti e leaise api ni tagata makeke, ti e leaise api foki ni aliki. 27Kae kua filifili e le Atua a nea valelea o le malama nei ke fakalumai ai le kau poto ; ti kua filifili e le Atua a nea gagae o le malama nei ke fakalumai ai le kau makeke ; 28ti kua filifili e le Atua a nea veveli o le malama nei, mo nea vesiainai, mo nea noa, ke maumaui ai a nea ala e mauiga ki le malama nei, 29o tupu ke aua na fakakololia se tagata kiate ia totonu i mua o le Atua. 30Kae kua fakapipiki koutou kia Sesu-Kilisito, leia i le finegalo o le Atua, kua liliu kia tatou ko le poto, mo le faitotonu, mo le maokioki, ti mo le totogi,
31ofaipe lona tuu i le tosi :
Ko leia e fakakololia
Ke fakakololia a ia i le Aliki.
Currently Selected:
Uluaki tosi ki le kau Kolinto 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
