Wulo 8

Sunsum nu ngoane

1Zɔhane ati bɛdabɛ mɔɔ bɛ nee Kelaese Gyisɛse le ko la ɛnlɛ ndeanlɛ biala. 2Ɔluakɛ Sunsum ne mɛla ne mɔɔ Kelaese Gyisɛse ati ɔmaa yɛ ngoane la ɛye me ɛvi ɛtane nee ewule mɛla ne abo. 3Mɔɔ nwonane ne bɛtɛɛyɛlɛ ti mɛla ne angola anyɛ la, Nyamenle ɛyɛ. Yemɔ a le kɛ, ɔzoanle ɔdaye ɔ Ra ne ɔmanle ɔvale sonla nwonane ɛtane ɛhye bie ɔrale na ɔradeanle ɛtane ne mɔɔ de sonla nu la. 4Nyamenle yɛle ɛhye, amaa yɛdayɛ mɔɔ yɛde Nyamenle Sunsum ne anu na yɛnde nwonane nu la, mɛla ne ngyehyɛlɛ fɔɔnwo ne ali munli wɔ yɛ nu. 5Bɛdabɛ mɔɔ bɛde nwonane nu la adwenle wɔ nwonane nu ninyɛne ɛyɛlɛ zo. Bɛdabɛ noko mɔɔ bɛtɛnla kɛmɔ Sunsum ne kile bɛ la adwenle wɔ Sunsum nu nyɛleɛ zo. 6Saa ɛmaa nwonane nu adwenleadwenle keda ɛ nwo zo a, ɔwie ewule; yɛɛ saa ɛmaa Sunsum nu adwenleadwenle keda ɛ nwo zo a, ɔwie ngoane nee anzonudwolɛ. 7Yemɔti mɔɔ maa nwonane nu adwenleadwenle keda ɔ nwo zo la le Nyamenle kpɔvolɛ; ɔluakɛ ɔnli Nyamenle mɛla ne azo, yɛɛ ɔdi zo bɔbɔ a ɔnrɛyɛ boɛ; 8ɔboalekɛ bɛdabɛ mɔɔ bɛdi bɛ sonlabaka ne atiakunluwɔzo nzi la ɛngola ɛnzɔ Nyamenle anye.

9Na bɛmɛ, bɛnde bɛmmaa bɛ sonlabaka ne, na saa Nyamenle Sunsum ne wɔ bɛ nu a, ɛnee noko bɛde bɛmaa Sunsum ne. Mɔɔ ɛnlɛ Kelaese Sunsum ne bie wɔ ye nu la ɛnle Kelaese ɛdeɛ. 10Na saa Kelaese de bɛ nu a, ɛnee saa ɛtane ti bɛwu nwonane nu bɔbɔ a, Sunsum ne anu bɛlɛ ngoane, ɔboalekɛ bɛlie bɛ bɛmaa bɛzɔ Nyamenle anye. 11#1 Kɔl 3.16 Na saa Nyamenle Sunsum ne, mɔɔ dwazole Gyisɛse vile ewule nu la de bɛ nu a, ɛnee noko mɔɔ dwazole Gyisɛse vile ewule nu la bamaa bɛdabɛ noko bɛ sonlabaka ye mɔɔ wu la ngoane wɔ ye Sunsum ne mɔɔ wɔ bɛ nu la ati.

12Zɔhane ati, me mediema, ɛzonle la yɛ nwo zo kɛ ɔnle kɛ yɛtɛnla yɛmaa yɛ sonlabaka ne. 13Ɔluakɛ saa bɛtɛnla bɛmaa bɛ sonlabaka ne a, bɛbawu; na saa bɛtɛnla bɛmaa Sunsum ne a, bɛbahu nyɛleɛ ɛtane ne mɔɔ wɔ bɛ nu la, na bɛanyia ngoane. 14Bɛdabɛ mɔɔ Nyamenle Sunsum ne yɛ bɛ tataa la le Nyamenle amra. 15#Mak 14.36; Gal 4.6 Ɔluakɛ Sunsum ne mɔɔ Nyamenle ɛva ɛmaa bɛ la ɛnyɛ bɛ ahanra, na ɔmmaa bɛnyɛ avoanvoanle. Sunsum ne maa bɛyɛ Nyamenle amra, na ɔlua Sunsum ne tumi zo yɛkola yɛfɛlɛ Nyamenle kɛ, “Egya! Me Papa.” #Gal 4.5-7 16Nyamenle Sunsum ne nee yɛ ɛdeɛ ne bɔ nu maa yɛkola yɛka kɛ yɛle Nyamenle amra. 17Na saa yɛle ɔ mra a, ɛnee yɛdi agya, yɛɛ ye ɛlolɛ ne mɔɔ yeva yezie ɛkɛ yemaa ɔ mra la yɛbanyia bie, na yɛ nee Kelaese ava mɔɔ Nyamenle ɛva ɛzie ɛkɛ ɛmaa ye la, ɔluakɛ saa yɛ nee Kelaese di nyane a yɛ nee ye kɛnyia ye anyunlunyia ne.

Kenlebie anyunlunyia

18Menea a amaneɛ mɔɔ yɛlɛnwu ye ɛke la kpole ɛnrɛdo kenlebie anyunlunyia mɔɔ yɛbanyia ye la. 19Abɔdeɛ muala ɛlɛkendɛ anwolɔlɛ kpole nu kɛ Nyamenle kɛye ɔ mra kɛhile. 20Ɔluakɛ abɔdeɛ muala mgbane mɔɔ ɛyɛ la, tɛ ɔdaye ye ɛhulolɛ zo ɔ, na Nyamenle ngyehyɛlɛ ɔ. Noko anyelazo ɛhye wɔ ɛkɛ ne kɛ 21kenle ko dedee bɛbaye abɔdeɛ muala bɛavi ɛkpɔlɔlɛ akɛlɛzonlenlɛ nu na yeanyia anyunlunyia fanwodi ne mɔɔ Nyamenle amra lɛ ye la. 22Ɔluakɛ yɛze kɛ toonwo mɔɔ yeradwu ɛnɛ la abɔdeɛ muala ɛlɛte nyane kɛ asɛɛ yevo awolɛ zo. 23#2 Kɔl 5.2-4 Na tɛ abɔdeɛ ngome; yɛdayɛ noko mɔɔ yɛnyia Sunsum ne kɛ Nyamenle ahyɛlɛdeɛ mɔɔ lumua la, yɛte nyane wɔ yɛ nu, wɔ mekɛ mɔɔ yɛlɛkendɛ Nyamenle kɛ ɔkɛyɛ yɛ ɔ mra na ɔkɛlie yɛ sonlabaka ne la. 24Anyelazo ɛhye azo yɛɛ ɔlua mɔɔ bɛlie yɛ ngoane a. Na yemɔ a le kɛ, awie ɛmmaa ɔ nye ɛnla debie mɔɔ ɔ nye gyi nwolɛ la azo. Na nwane bɔbɔ yɛɛ kɛmaa ɔ nye kɛla debie mɔɔ ɔ nye gyi nwolɛ la azo a? 25Saa yɛmaa yɛ nye da debie mɔɔ yɛ nye ɛngyi nwolɛ la azo a, yɛɛ yɛfa abotane yɛkendɛ ye ɛnyianlɛ a.

26Zɔhane ala yɛɛ kɛmɔ yɛnlɛ anwosesebɛ la, Sunsum Nwuanzanwuanza ne baboa yɛ a. Ɔluakɛ yɛnze nzɛlɛlɛ yɛ, kɛmɔ ɔwɔ kɛ yɛyɛ la. Sunsum ne ɔdaye a ɔsɛlɛ Nyamenle ɔmaa yɛ wɔ nyanedelɛ nee ɛkponlenlɛ mɔɔ ɛnloanlɛ ɛnrɛhola ye ka la anu a. 27Nyamenle mɔɔ neɛnlea menli kɔsɔɔti ahonle nu la ze sunsum nu adwenleadwenle biala kɛ si de la, ɔluakɛ Sunsum ne kpa ye menli ti kyɛlɛ, ɔsɛlɛ, kɛmɔ Nyamenle ɛhulolɛdeɛ ne de la.

28Yɛze kɛ wɔ debie biala anu, Nyamenle maa debie biala yɛ kpalɛ maa bɛdabɛ mɔɔ bɛkulo ye la, meka bɛdabɛ mɔɔ yevɛlɛ bɛ, kɛmɔ ye ngyehyɛlɛ ne de la. 29Bɛdabɛ mɔɔ Nyamenle ɛkpa nu ɛye bɛ la, yeva bɛ yezie ahane kɛ bɛbayɛ kɛ ɔ Ra ne la, amaa Ralɛ ne ayɛ mediema dɔɔnwo adiema kpanyinli. 30Yemɔti bɛdabɛ mɔɔ Nyamenle ɛkpa nu ɛye bɛ la yɛɛ ɔfɛlɛ bɛ na ɔdielie bɛ ɔmaa bɛsɔ ɔ nye, na ɔ nee bɛ tɛnla anyunlunyia nu a.

Nyamenle ɛhulolɛ wɔ Kelaese Gyisɛse ati

31Saa ɔle zɛhae ɛdeɛ a, ɛnee akee kɛ yɛzi yɛha ye ɛ? Saa Nyamenle gyi yɛ nzi a nwane a kɛhola yɛ a? 32Nea, yeanva ɔ Ra ne yeanyɛ yɛ abokɛ na yeva ye yebɔ azu wɔ yɛ muala yɛ ti! Na saa yeva ɔ Ra ne yemaa wɔ yɛ ti a, ɛnee fane nyɛ yɛɛ akee ɔnrɛva ninyɛne muala ɔnrɛboka ɔ Ra ne anwo ɔnrɛmaa yɛ a? 33Nwane a kɛhola kɛdo Nyamenle menli ne mɔɔ yekpa nu yeye bɛ la ɛzonle a? Nyamenle ɔdaye yebua bɛ benle! 34Nwane a kɛhola kɛbua bɛ fɔlɛ a? Asoo Kelaese Gyisɛse, mɔɔ wule, na bɛdwazole ye bɛrale ngoane nu, na ɔde Nyamenle asa fema zo ɛlɛsɛlɛ Nyamenle amaa yɛ la ɔ? 35Nwane a kɛhola kɛhwe yɛ kɛvi Kelaese ɛhulolɛ ne anwo a? Amaneɛnwunlɛ anzɛɛ anwongyelelɛ, kpɔdekpɔdeyɛlɛ anzɛɛ ɛhɔne, ehyia, anwubɛnyunlu anzɛɛ ewule? 36#Edw 44.22 Nyamenle Edwɛkɛ ne se,

“Bɛdabɛ bɛ ti yɛgyi ewule avinli

alehyenlɛ muala;

na bɛyɛ yɛ kɛ mboane mɔɔ

bɛ nee bɛ ɛlɛkɔ ahunleɛ.”

37Kyɛkyɛ, wɔ ninyɛne ɛhye mɔ kɔsɔɔti anu, yɛlua mɔɔ hulole yɛ la anwo zo yɛdi konim! 38Ɔluakɛ meze ye wienyi kɛ debie biala ɛnrɛhola ɛnrɛkpɔkye yɛ ɛnrɛvi Kelaese ɛhulolɛ ne anwo; ewule o, ngoane o, Nyamenle soanvolɛma o, anzɛɛ awozinli nu tumivolɛma biala, wɔ ɛnɛ edwɛkɛ mɔɔ bazi anzɛɛ kenlebie ɛdeɛ mɔɔ bara la anu, 39yɛɛ tumi anzɛɛ debie biala ɛnle ewiade ye anu, anwuma anzɛɛ azɛlɛ ti anu, anzɛɛ ewiade ye anu debie biala ɛnle ɛkɛ mɔɔ kɛhola kɛkpɔkye yɛ kɛvi Nyamenle ɛhulolɛ ne mɔɔ ɔlua yɛ Awulae Kelaese Gyisɛse anwo zo yɛnyia ye la anwo.

Currently Selected:

Wulo 8: NB

Highlight

Copy

Compare