Wulo 13

Maanle mgbanyima nwo ɛzonlelilɛ

1Ɔwɔ kɛ awie biala bu mgbanyima mɔɔ ɛlɛbu maanle ne la, ɔboalekɛ tumi biala ɛnle ɛkɛ mɔɔ Nyamenle ɛnze nu a, yɛɛ mgbanyima mɔɔ wɔ zo kɛkala la, Nyamenle a ɛva bɛ ɛzie ɛkɛ a. 2Zɔhane ati mɔɔ kɛtia mgbanyima mɔɔ wɔ zo la, ɛtia menli mɔɔ Nyamenle ɔdaye yeye bɛ kɛ bɛbu maanle ne la, na mɔɔ kɛyɛ ye zɔ noko la twe ndeanlɛ maa ɔ nwo. 3Ɔluakɛ ɔnle kɛ awie biala mɔɔ di boɛ la sulo menli mɔɔ maanlebulɛ ne wɔ bɛ sa nu la kyesɛ menli mɔɔ di ɛtane la ala. Bɛmkpondɛ kɛ bɛsulo sonla mɔɔ tumi wɔ ɔ sa nu la ɔ? Ɛnee bɛbɔ ɛbɛla kpalɛ, na ɔkɛhanvo bɛ. 4Ɔluakɛ ɔle Nyamenle sonvolɛ mɔɔ ɛlɛyɛ ye gyima wɔ bɛ kpalɛ ti a. Noko saa ɛdi ɛtane ɛdeɛ a, ɛnee sulo ye, ɔluakɛ ɔlɛ tumi, yɛɛ kɛmɔ ɔle sonvolɛ mɔɔ ɛlɛyɛ ye Nyamenle gyima la, ɔkola ɔtea menli mɔɔ di ɛtane la. 5Ɛhye ati ɔwɔ kɛ bɛtie na bɛyɛ mɔɔ menli mɔɔ tumi anzɛɛ maanlebulɛ ne wɔ bɛ sa nu la kɛze bɛ la, tɛ kɛ Nyamenle kɛdea bɛ la ati ɔ, na bɛ adwenle nu te wienyi la ati ɔ.

6 # Mat 22.21; Mak 12.17; Luk 20.25 Zɔhane ati yɛɛ ɔwɔ kɛ bɛtua bɛ maanle adwule noko a, ɔluakɛ saa mgbanyima ne mɔ mɔɔ di zɛhae gyima la yɛ bɛ gyima ne adenle kpalɛ zo a, ɛnee bɛlɛyɛ bɛ Nyamenle gyima. 7Yemɔti, mɔɔ ɔwɔ kɛ bɛtua la, bɛdua; bɛdua bɛ maanle adwule ngakyile ne mɔ amuala, bɛbu mgbanyima ne mɔ na bɛli bɛ muala eni.

Gyima mɔɔ yɛyɛ yɛmaa yɛ nwo ngoko la

8Bɛmmadi awie biala anwo ɛzonle, ɛzonle mɔɔ yɛdi la a le kɛ yɛkɛhulo yɛ nwo ngoko ngoko. Mɔɔ kulo ɔ gɔnwo dasanli la ɛli Mosisi mɛla ne azo ɛwie. 9#Ade 20.13-15,17; Mɛla 5.17-19,21; Sɛlɛ 19.18 Mɛla ne mɔɔ se, “Mmafa awuvolɛ, mmayɛ kɔdiawu, mmawua, mmayɛ anyebolo” nee mɔɔ ɛha la amuala, bɛbɔ ye kpɔkɛ ko kɛ, “Kulo ɛ gɔnwo kɛ ɛdawɔ ɛ nwo la.” 10Saa ɛlɛ ɛhulolɛ a, ɛnrɛyɛ ɛ gɔnwo ɛtane. Yemɔti ɛhulolɛ a sɔ Mosisi mɛla ne amuala anloa a.

11Ɛhye mɔ amuala anzi, ɔwɔ kɛ bɛnwu kɛ mekɛ ɛdwu mɔɔ ɔwɔ kɛ bɛfi nafelɛ nu bɛdwazo a. Ɔluakɛ ngoanelielɛ mekɛ ne ɛbikye ɛdɛla kɛmɔ yɛzuzule ye wɔ mekɛ mɔɔ yɛlumuale yɛnyianle diedi ne la. 12Aledwolɛ ne asɛɛ ɛze, alehyenlɛ ɛbikye; zɔhane ati bɛmaa yɛgyakyi awozinli nu nyɛleɛ ne mɔ, na yɛva wienyi nu konle tɛladeɛ mɔɔ bamaa yɛahola ko la yɛwula. 13Bɛmaa yɛli yɛ nwo eni, na yɛbɔ yɛ ɛbɛla kpalɛ kɛ menli mɔɔ wɔ alehyenlɛ nu la, mɔɔ anwondɛlɛ mgbane mgbane, nzabolɛ, adwɔmanebɔlɛ, anzɛɛ huhunli ɛbɛla ɛbɔlɛ, konle anzɛɛ nungule ɛhwenlɛ biala ɛnle nu a. 14Na bɛva Awulae Kelaese bɛyɛ konle tɛladeɛ bɛwula, na bɛzi nwonane nu adwenle ɛvalɛ nee ye atiakunluwɔzo aze.

Currently Selected:

Wulo 13: NB

Highlight

Copy

Compare