Ɛdi 8
8
Ahɛnlaneɛ ne mɔ ɛziezielɛ
1 #
Ade 25.31-40; 37.17-24 Ɛdɛnkɛma zele Mosisi kɛ, 2“Ka kile Aalɔn kɛ, saa ɔsosɔ ahɛnlaneɛ nsuu ne mɔ a anrɛɛ ɔva ɔziezie kɛnlaneɛ baka ne azo ɔmaa bɛ nye ɛhɔ kɛnlaneɛ baka ne anyunlu.” 3Na Aalɔn noko yɛle ye zɔhane; ɔsosɔle ahɛnlaneɛ ne mɔ ɔmanle bɛ nye hɔle kɛnlaneɛ baka ne anyunlu, kɛmɔ Ɛdɛnkɛma zele Mosisi la. 4Na kɛ bɛzile bɛyɛle kɛnlaneɛ baka ne la ɛne: ɔvi ɔ bo ne toonwo mɔɔ kɔdwu ye anwuma ndotolo ne mɔ, bɛvale ezukoa nvutuke mɔɔ bɛva hamenle bɛbolo la a bɛyɛle a. Bɛyɛle ye kɛmɔ Ɛdɛnkɛma hilele Mosisi ala la.
Livaema ɛnluanlɛ nee bɛ Ɛdɛnkɛma asa anu ɛduwulalɛ
5Ɛdɛnkɛma zele Mosisi kɛ, 6“Ye Livaema fi Yizilayɛma avinli na nua bɛ. 7Na kɛ ɛbazi wɔanlua bɛ la ɛne: Fa ɛnluanlɛ nzule ne kponde bɛ nwo, maa bɛkpa bɛ nwo enrinli biala, na bɛkpo bɛ nwo ninyɛne, na bɛ nwo kɛde. 8Akee maa bɛva ɛnlankɛ nyinli edonraa ko nee ma azubɔdeɛ mɔɔ bɛhakyi ye esamo na bɛva nwole bɛfɔtɔ la na bɛva ɛnlankɛ nyinli ko noko bɛyɛ ɛtane azubɔdeɛ. 9Akee maa Yizilayɛma kɔsɔɔti ɛyia na maa Livaema ne ɛgyinla Ɛdɛnkɛma Ndanlɛ Sua ne anyunlu. 10Saa ɛfa Livaema ne ɛba Ɛdɛnkɛma anyunlu a, Yizilayɛma bava bɛ sa agugua Livaema ne ati zo, 11na Aalɔn adu bɛ amaa Ɛdɛnkɛma kɛ Yizilayɛma ehono azubɔdeɛ, amaa bɛayɛ Ɛdɛnkɛma gyima ne. 12Akee Livaema bava bɛ sa agugua nlankɛ nyinli ne mɔ ati zo na wɔava ko wɔayɛ ɛtane azubɔdeɛ na wɔava ko noko wɔayɛ ɛyelalɛ azubɔdeɛ wɔamaa Ɛdɛnkɛma, wɔava wɔayɛ mgbɔdalɛ nzɛlɛlɛ wɔ Livaema ne ati.
13“Fa Livaema ne yɛ ehono azubɔdeɛ maa Ɛdɛnkɛma na maa bɛzonle Aalɔn nee ɔ mra mrenya ne mɔ. 14Adenle ɛhye anu yɛɛ ɛbalua wɔaye Livaema ne wɔavi Yizilayɛma anu a, amaa bɛayɛ me ɛdeɛ. 15Saa ɛnua Livaema ne ɛwie na ɛfa bɛ ɛbɔ ehono azu ne a, akee bɛbahɔ Ndanlɛ Sua ne anu bɛahɔyɛ gyima. 16Ɔluakɛ bɛye bɛ bɛvi Yizilayɛma anu bɛdu bɛ bɛzie ahane bɔkɔɔ bɛmaa me. Meva bɛ mezie Yizilayɛma belamunli mralɛ mrenya ne mɔ agyakɛ anu, yemɔti bɛle me ɛdeɛ bɔkɔɔ. 17#Ade 13.2 Ɔluakɛ mɔɔ mengunle Yigyibitima belamunli mralɛ mrenya muala la, mendule Yizilayɛ mbusua ekpunli biala anu belamunli ralɛ nrenya biala nee ayɛmoa biala ara mɔɔ ɔlumuale ɔwole ye la menziele ɛkɛ memanle me nwo. 18Kɛkala, meva Livaema mezie Yizilayɛma belamunli mralɛ mrenya agyakɛ anu. 19Meye Livaema mevi Yizilayɛma anu meva bɛ mehyɛ Aalɔn nee ɔ mra mrenya kɛ bɛyɛ gyima bɛmaa Yizilayɛma ne wɔ Ndanlɛ Sua ne anu, amaa saa ngyengyene nu bie menli ne bikye Ɛleka Nwuanzanwuanza ne a, bɛayɛ mgbɔdalɛ nzɛlɛlɛ bɛakpa ewulenzane mɔɔ anrɛɛ kɛra bɛ nwo zo la bɛagua.”
20Yemɔti Mosisi, Aalɔn, nee Yizilayɛma kɔsɔɔti dule Livaema ne manle Nyamenle, kɛmɔ Ɛdɛnkɛma zele Mosisi la. 21Livaema ne nluanle bɛ nwo na bɛkpole bɛ ninyɛne, na Aalɔn dule bɛ manle Ɛdɛnkɛma kɛ ehono azubɔdeɛ. Eza ɔyɛle bɛ ti mgbɔdalɛ nzɛlɛlɛ na ɔvale ɔdele bɛ nwo. 22Nzinlii, Livaema ne nee Aalɔn nee ɔ mra mrenya ne mɔ hɔle Ɛdɛnkɛma Ndanlɛ Sua ne anu hɔyɛle bɛ gyima ne, kɛmɔ Ɛdɛnkɛma zele Mosisi la.
23Ɛdɛnkɛma zele Mosisi kɛ, 24“Mɔɔ Livaema bayɛ la ɛne: Livaenli biala mɔɔ ɛli ɛvolɛ abulanwiɔ nee nnu mɔɔ kɔ la bahɔ Ndanlɛ Sua ne anu ahɔyɛ gyima. 25Bɛdabɛ mɔɔ bɛkɛli ɛvolɛ abulanlu la bagyakyi gyima ne, 26noko bɛbahola bɛaboa bɛ mediema Livaema ne wɔ bɛ gyima ne ɛyɛlɛ nu wɔ Ɛdɛnkɛma Ndanlɛ Sua ne anu, ɔnle kɛ bɛmaa bɛ gyima kɛ bɛyɛ. Ɛnee kɛ ɛbazi wɔahyehyɛ Livaema gyima ne la ɛne.”
Currently Selected:
Ɛdi 8: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
