Ɛdi 20
20
Edwɛkɛ mɔɔ sisile Keedɛhye la
(Ade 17.1-7)
1Siane ne mɔɔ lumua la anu Yizilayɛma kɔsɔɔti hɔle Zen fienemgbole ne anu na bɛyɛle azokoɛleɛ wɔ Keedɛhye. Ɛkɛ ne yɛɛ Meleam wule na bɛziele ye a.
2Ɛleka mɔɔ bɛyɛle azokoɛleɛ ne la, ɛnee nzule ɛnle ɛkɛ, yemɔti menli ne bɔle yiale Mosisi nee Aalɔn 3na bɛhehanle ɛtane ɛtane bɛtietiale bɛ kɛ, “Saa yɛ nee yɛ mediema Yizilayɛma wule Ɛdɛnkɛma Ndanlɛ Sua ne anyunlu a anrɛɛ ɔle kpalɛ. 4Duzu ati a bɛva Ɛdɛnkɛma menli ye nee yɛ nyɛmoa bɛragua fienemgbole ye anu, bɛmaa yɛawu a? 5Duzu ati a bɛye yɛ bɛvi Yigyibiti bɛ nee yɛ ɛra munzule azɛlɛ ɛhye azo a? Ɔnle azɛlɛ bɔbɔ mɔɔ fifi ma, anzɛɛ feege, anzɛɛ vanye, anzɛɛ ma mɔɔ le kɛ akutue la; yɛɛ yɛnnyia nzule yɛnno.” 6Mosisi nee Aalɔn hwenle bɛ nwo vile menli ne avinli na bɛhɔgyinlanle Ndanlɛ Sua ne anlenkɛ ne anloa. Bɛdule bɛguale bɛbutubutule bɛ nye aze, na Ɛdɛnkɛma anyunlunyia ne dale bɛ nwo zo.
7Ɛdɛnkɛma zele Mosisi kɛ, 8“Fa kpɔma ne na ɛ nee ɛ diema Aalɔn bɛboɔboa menli ne anloa. Wɔ bɛ nye zo ɛkɛ ne, ka kile bodane ne mɔɔ la bɛ nyunlu ɛkɛ ne la kɛ ɔkpu nzule, na nzule vi nuhua bara na wɔanyia nzule wɔamaa menli ne nee bɛ nyɛmoa anlo.” 9Na kɛmɔ Ɛdɛnkɛma hanle la, Mosisi vale kpɔma ne.
10Mosisi nee Aalɔn boɔboale ɛlɔne ne anloa wɔ bodane ne anwo na bɛzele bɛ kɛ, “Bɛmɛ atuadelɛma, bɛdie! Yɛmaa nzule ɛvi bodane ɛhye anu ɛrɛla ɛmaa bɛ ɔ?” 11Akee Mosisi manle ɔ sa zo na ɔvale ye kpɔma ne ɔfinle bodane ne fane nwiɔ, na nzule vi nuhua rale dɔɔnwo manle menli ne nee bɛ nyɛmoa ne mɔ nlonle bie.
12Na Ɛdɛnkɛma zele Mosisi nee Aalɔn kɛ, “Kɛmɔ bɛanlie me bɛanli, bɛammaa Yizilayɛma annwu me kpoleyɛlɛ ne bɛdabɛ bɛ nye zo la, bɛnrɛli menli ɛhye mɔ ati bɛ nee bɛ ɛnrɛdwu azɛlɛ ne mɔɔ meva memaa bɛ la azo.”
13Ɛhye zile wɔ Mɛleba; ɛkɛ ne a Yizilayɛma dendɛle tiale Ɛdɛnkɛma na ɔhilele bɛ kɛ ɔle nwuanzanwuanza a.
Yidɔm belemgbunli ne tu ɔ gye kɛ ɔnrɛmaa Yizilayɛma adenle
14Mosisi zoanle menli wɔ Yidɔm belemgbunli ne ɛkɛ manle bɛhɔzele ye kɛ, “Nrɛlaleɛ ɛhye vi ɛ mediema Yizilayɛma ɛkɛ. Ɛze anwubɛnyunlu mɔɔ ɛdo yɛ, 15kɛ ɔzile mɔɔ yɛ mgbanyima ne mɔ hɔle Yigyibiti, na yɛdɛnlanle Yigyibiti ɛvolɛ dɔɔnwo la. Yigyibitima hilele yɛ mgbanyima nee yɛdayɛ nyane kpalɛ. 16Yɛzunle yɛzɛlɛle Ɛdɛnkɛma moalɛ, na ɔzoanle Nyamenle soanvolɛ ɔmanle ɔrayele yɛ ɔvile Yigyibiti. Na kɛkala, yɛradwu Keedɛhye, suakpole mɔɔ wɔ wɔ maanzinli ne ɛweɛne zo la. 17Nana, yɛsɛlɛ wɔ, maa yɛ adenle maa yɛraze wɔ azɛlɛ ne azo yɛhɔ. Yɛdua ademgbole ne ala anu. Yɛnrɛze egyinli anzɛɛ vanye ɛya biala anu, bula nu nzule bɔbɔ, yɛnrɛnlo bie. Yɛnrɛmakyi bɛne anzɛɛ fema toonwo yɛkɛpɛ nu wɔ maanzinli ne anu.”
18Na Yidɔm belemgbunli ne buale ye kɛ, “Bɛmmafa bɛ gyakɛ bɛtia azɛlɛ ye azo, anrɛɛ menwɔva konle menwɔyia bɛ adenle.”
19Yizilayɛma hanle kɛ, “Yɛbava ademgbole ne ala anu. Saa yɛdayɛ anzɛɛ yɛ nyɛmoa no bɛ nzule bɔbɔ a, yɛkɛdua ye kakɛ, mɔɔ yɛkpondɛ ala la a le kɛ yɛkɛze wɔ azɛlɛ ne azo.”
20Yidɔmma ne zile zolɛ kɛ, “Yɛmkponle, bɛnva ɛke bɛnze!” Na bɛvale ɛlɔnema mɔɔ anwo yɛ se kpalɛ la bɛraduale Yizilayɛma adenle. 21Kɛmɔ Yidɔmma ammaa Yizilayɛma adenle bɛammaa bɛanze bɛ maanzinli ne anu la ati, bɛziale bɛhɔpenle ɛleka fofolɛ.
Aalɔn ewule ne
22Yizilayɛma kɔsɔɔti vile Keedɛhye hɔle Hɔɔ Boka, 23mɔɔ wɔ Yidɔm ɛweɛne zo la. Na ɛkɛ ne yɛɛ Ɛdɛnkɛma zele Mosisi nee Aalɔn kɛ, 24“Aalɔn ɛnrɛvo azɛlɛ ne mɔɔ meva memaa Yizilayɛma la azo, ɔbawu, ɔluakɛ bɛ mu nwiɔ bɛbulule me mɛla zo wɔ Mɛleba azule ne anloa. 25Fa Aalɔn nee ɔ ra nrenya Ɛlieza bɛla Hɔɔ Boka ye azo. 26Yeye Aalɔn sɛlɛvolɛ adɛladeɛ ne mɔ fa wula ɔ ra Ɛlieza, na Aalɔn bawu ɛkɛ.” 27Mosisi yɛle mɔɔ Ɛdɛnkɛma zele ye la. Bɛvole Hɔɔ Boka ne azo wɔ menli ne kɔsɔɔti anye zo. 28#Ade 29.29; Ɛdi 33.38; Mɛla 10.6 Mosisi yeyele Aalɔn sɛlɛvolɛ adɛladeɛ ne mɔ na ɔvale ɔwulale ɔ ra nrenya Ɛlieza. Na Aalɔn wule boka ne azo. Akee Mosisi nee Ɛlieza vi boka ne azo tolole rale. 29Na mɔɔ menli ne nwunle kɛ Aalɔn ɛwu la, bɛ kɔsɔɔti bɛzunle ye toonwo kenle kɔkɔlɛ abulasa.
Currently Selected:
Ɛdi 20: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
