Ɛdi 17
17
Aalɔn baka ne
1Ɛdɛnkɛma zele Mosisi kɛ, 2“Ka kile Yizilayɛma ne kɛ bɛmaa wɔ mbaka bulu nee nwiɔ, abusua ekpunli biala abusua kpanyinli ne ɛdeɛ ko. Kɛlɛ awie biala duma wɔ ye baka ɛdeɛ ne anwo 3na kɛlɛ Aalɔn duma wɔ baka ne mɔɔ gyi Livae agyakɛ anu la anwo. Abusua kpanyinli biala baka ko. 4Fa kɔ Ɛdɛnkɛma Ndanlɛ Sua ne anu kɔgua bɛ wɔ Ngyekyeleɛ Ɛlɛka ne anyunlu, ɛleka mɔɔ me nee wɔ yia la. 5Na sonla ne mɔɔ menlea nu meye ye la baka ɛdeɛ ne bafifi. Ɔlua adenle ɛhye azo, mebadua Yizilayɛma mɔɔ tendɛ tia wɔ dahuu la.”
6Yemɔti Mosisi hanle edwɛkɛ ne hilele Yizilayɛma ne, na bɛ mgbanyima ne mɔ vale bɛ mbaka ne mɔ manle Mosisi, abusua kpanyinli biala ɛdeɛ ko, bɛ muala bɛle bulu nee nwiɔ. Aalɔn baka ɛdeɛ ne boka nwolɛ. 7Akee Mosisi vale mbaka ne mɔ hɔguale Ɛdɛnkɛma Ngyekyeleɛ Ɛlɛka ne anyunlu wɔ Ndanlɛ Sua ne anu.
8 #
Hib 9.4
Aleɛ hyenle na Mosisi hɔle Ndanlɛ Sua ne anu la, ɔnwunle kɛ Aalɔn baka ɛdeɛ ne mɔɔ gyi ɛkɛ maa Livae abusua ekpunli ne la ɛfifi. Baka ne ɛfefɛ nya, ɛbɔ ndotolo na yezo alemɔn ma, bɔbɔ bɛbolo. 9Mosisi vale mbaka ne mɔ kɔsɔɔti vindele na ɔvale ɔhilele Yizilayɛma ne. Bɛdabɛ bɛnwunle mɔɔ ɛzi la, na abusua kpanyinli biala yele ye baka ɛdeɛ ne. 10Ɛdɛnkɛma zele Mosisi kɛ, “Fa Aalɔn baka ɛdeɛ ne sia kɔdo Ngyekyeleɛ Ɛlɛka ne anyunlu. Bɛva bɛzie bɛmaa ɔyɛ kɔkɔbɔlɛ ɔmaa Yizilayɛma mɔɔ te atua la kɛ, saa bɛangyakyi bɛ ɛdendɛlɛ mɔɔ bɛtendɛ bɛtia me la a, bɛbawu.” 11Na Mosisi yɛle mɔɔ Ɛdɛnkɛma zele ye kɛ ɔyɛ la.
12Yizilayɛma ne hanle hilele Mosisi kɛ, “Kɛkala ɛdeɛ, yɛ awieleɛ ne ala ɛne! 13Awie biala mɔɔ kɛbikye Ɛdɛnkɛma Ndanlɛ Sua ne bɔbɔ la bawu. Asoo ɔwɔ kɛ yɛ muala yɛ bo zo minli ɔ?”
Currently Selected:
Ɛdi 17: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
