Ɛdi 15
15
Azubɔlɛ nwo mɛla
1Ɛdɛnkɛma zele Mosisi kɛ, 2“Ka kile Yizilayɛma kɛ, saa bɛdwu azɛlɛ ne mɔɔ melɛfa meamaa bɛ kɛ bɛdɛnla zolɛ la azo, 3na bɛfa ɛnlankɛ anzɛɛ boane kɛ bɛyela ye bɛabɔ azu, anzɛɛ bɛfa bɛaye ɛwɔkɛ, anzɛɛ bɛfa bɛayɛ ahunlunyele azubɔdeɛ, anzɛɛ ɛvoyialilɛ azubɔdeɛ bɛamaa Ɛdɛnkɛma a, amaa yeazɔ ɔ nye la, 4-5ɔwɔ kɛ ahenle ne mɔɔ fa azubɔdeɛ ne arɛlɛ Ɛdɛnkɛma la fa esamo kilo ko mɔɔ bɛva ɔlivi nwole litili ko bɛfete la boka nane ne anwo kɛ ɔle ma azubɔdeɛ, na ɔfa nwanye litili ko ɔboka nwolɛ ɔbɔ azu ne ɔmaa Ɛdɛnkɛma. 6Saa ɔfa boane nyinli a, ɔwɔ kɛ ɔfa esamo mɔɔ bɛva ɔlivi nwole litili ko nee foa bɛfete la kilo nwiɔ ɔmaa Ɛdɛnkɛma kɛ ma azubɔdeɛ, 7na ɔfa nwanye litili ko nee foa ɔyɛ nza azubɔdeɛ ɔboka nwolɛ. Azubɔlɛ ɛhye mɔ sɔ Ɛdɛnkɛma anye. 8Saa bɛfa ɛnlankɛ nyinli azubɔdeɛ bɛba kɛ ɛyelalɛ anzɛɛ bɛfa bɛaye ɛwɔkɛ anzɛɛ anzonudwolɛ azubɔdeɛ a, 9ɔwɔ kɛ bɛfa esamo kpalɛ kilo nsa mɔɔ bɛva ɔlivi nwole litili nwiɔ bɛfete la bɛyɛ ma azubɔdeɛ bɛmaa Ɛdɛnkɛma, 10na bɛfa nwanye azubɔdeɛ litili nwiɔ bɛboka nwo. Azubɔlɛ ɛhye sɔ Ɛdɛnkɛma anye.
11“Ninyɛne ɛhye mɔ a bɛva bɛboka ɛnlankɛ nyinli, boane nyinli, boane ralɛ nyinli anzɛɛ abɔnkye nwo a. 12Dodo biala mɔɔ bɛkɛva la, ɔwɔ kɛ bɛnea nwolɛ bɛsesa ninyɛne ne mɔ dodo mɔɔ fɛta la. 13Ekulomeni biala fa ɛyelalɛ azubɔdeɛ ara a ɔwɔ kɛ ɔyɛ ɛhye; ye ɛyelalɛ ne evuanlɛ sɔ Ɛdɛnkɛma anye. 14Saa ɛyɛvolɛ wɔ bɛ avinli, ɔ nee bɛ de kpɔkpɔ anzɛɛ ɔpɛ nuhua yeaze, na ɔkulo kɛ ɔfa ɛyelalɛ azubɔdeɛ ɔmaa Ɛdɛnkɛma a, ɔwɔ kɛ ɔdi ngyehyɛlɛ ko ne ala azo. Ye ɛyelalɛ ne evuanlɛ sɔ Ɛdɛnkɛma anye. 15Ngyehyɛlɛ ko ye ala wɔ ɛkɛ maa awolɛndoazo mɔɔ bara la amuala, bɛdabɛ nee nyɛvolɛ mɔɔ de bɛ avinli la, ɔluakɛ wɔ Ɛdɛnkɛma anyunlu, bɛ muala bɛle menli ko. 16Mɛla ko yɛɛ ngyehyɛlɛ ko ala a wɔ ɛkɛ maa bɛdabɛ nee nyɛvolɛ mɔɔ nee bɛ de la a.”
17Ɛdɛnkɛma zele Mosisi kɛ, 18“Ka kile Yizilayɛma kɛ, saa bɛdwu azɛlɛ ne mɔɔ melɛfa bɛ meahɔ zolɛ la azo, 19na bɛdi aleɛ mɔɔ bɛkɛnyia ye wɔ azɛlɛ ne azo la bie a, ɔwɔ kɛ bɛfa bie bɛbɔ azu bɛmaa Ɛdɛnkɛma. 20Saa bɛbu abɛlɛ na ɛdɔkɛ mɔɔ bɛkɛlumua bɛkɛva bɛkɛyɛ la, bɛloa bie bɛyɛ azubɔdeɛ bɛmaa Ɛdɛnkɛma kɛ ɔvi ma ɛwozolɛ ɛleka ne. 21Awolɛndoazo mɔɔ bara la amuala ɛva bɛ ɛdɔkɛ mɔɔ bɛkɛlumua bɛkɛyɛ la ɛyɛ azubɔdeɛ ɛmaa Ɛdɛnkɛma.
22“Na saa bɛfo na bɛanli mɛla ɛhye mɔ mɔɔ Ɛdɛnkɛma ɛva ɛmaa Mosisi la bie azo, 23yɛɛ saa bɛanli mɔɔ Ɛdɛnkɛma ɛlua Mosisi anwo zo ɛha ɛhile bɛ la amuala azo, ɔvi mekɛ mɔɔ Ɛdɛnkɛma vale mɛla ne manle la azo toonwo wɔ awolɛndoazo ne mɔ anu a, 24ɛnee kɛmɔ bɛnze la ati, ɔwɔ kɛ bɛfa ɛnlankɛ nyinli bɛyɛ ɛyelalɛ azubɔdeɛ, azubɔdeɛ mɔɔ ye ɛyelalɛ ne evuanlɛ sɔ Ɛdɛnkɛma anye la, nwolɛ ma azubɔdeɛ kpalɛ, yɛɛ nwanye azubɔdeɛ bɛmaa Ɛdɛnkɛma. 25Sɛlɛvolɛ ne bayɛ mgbɔdalɛ nzɛlɛlɛ yeamaa Yizilayɛma kɔsɔɔti, na bɛava bɛ ɛtane bɛahyɛ bɛ, ɔboalekɛ tɛ bɛ nye fuu ɔ, yɛɛ eza bɛ nvonleɛ ne ati, bɛva bɛ azubɔdeɛ mɔɔ bɛyela ye bɛabɔ azu nee bɛ ɛtane azubɔdeɛ bɛrɛlɛ Ɛdɛnkɛma. 26Na bɛbava Yizilayɛma kɔsɔɔti nee nyɛvolɛ mɔɔ de bɛ avinli la ɛtane bɛahyɛ bɛ, ɔboalekɛ awie biala boka nwo a nvonleɛ ne rale a.
27 #
Sɛlɛ 4.27-31
“Saa sonla ko anye ɛnla nwo na ɔyɛ ɛtane a, ɔbava abɔnkye belɛ mɔɔ ɛli ɛvolɛ ko la yeayɛ ɛtane azubɔdeɛ. 28Sɛlɛvolɛ ne bayɛ mgbɔdalɛ nzɛlɛlɛ wɔ Ɛdɛnkɛma anyunlu yeamaa ahenle, na bɛava ye ɛtane bɛahyɛ ye. 29Mɛla ko ne ala wɔ ɛkɛ maa awie biala, Yizilayɛnli anzɛɛ ɛyɛvolɛ mɔɔ de bɛ avinli mɔɔ anye ɛnla nwo na ɔkɛyɛ ɛtane la.
30“Na awie biala, saa ɔle ekulomeni anzɛɛ ɛyɛvolɛ, na ɔ nye fuu anzosesebɛ nu ɔyɛ ɛtane a, ɛnee yedindi Ɛdɛnkɛma anyunlu. Ɔwɔ kɛ bɛku sonla zɔhane. 31Ɔboalekɛ yebulu Ɛdɛnkɛma edwɛkɛ zo na yedo ye mɛla ne. Ɔwɔ kɛ bɛku sonla zɔhane, yɛɛ ɔdaye ye munzule zo ye.”
Nrenya ne mɔɔ donle Ɛnwomenlelielɛ Kenle mɛla ne la
32Mekɛ bie, mɔɔ ɛnee Yizilayɛma tɛbɔ fienemgbole ne anu la, bɛnwunle kɛ nrenya bie ɛlɛsesa ɛyɛne wɔ Ɛnwomenlelielɛ Kenle ne. 33Bɛdabɛ mɔɔ bɛnwunle ye la hyele ye hɔmanle Mosisi, Aalɔn nee Yizilayɛma amuala. 34Bɛmanle menli zinzale ye, ɔluakɛ ɛnee bɛtɛnwunle deɛ mɔɔ ɔwɔ kɛ bɛfa bɛyɛ ye la. 35Na Ɛdɛnkɛma zele Mosisi kɛ, “Ɔwɔ kɛ bɛku nrenya ne; bɛmaa menli ne kɔsɔɔti ɛzi ye awolɛ, ɛhu ye wɔ azokoɛleɛ ne kandiba lɔ.” 36Yemɔti menli ne vale ye hɔle azokoɛleɛ ne kandiba lɔ na bɛzile ye awolɛ bɛhunle ye, kɛmɔ Ɛdɛnkɛma hanle la.
Nyɛma fufutuu ɛnwonlɛ nwo mɛla
37Ɛdɛnkɛma zele Mosisi kɛ, 38#Mɛla 22.12 “Ka kile Yizilayɛma kɛ bɛnwo nyɛma fufutuu na bɛva nyɛma buluwu bɛkyekye ɔ ti nee ɔ ti bɛmaa ɔyɛ kɛ asɛɛ bɔlo la na bɛva bɛsosɔ bɛ adɛladeɛ ne ayiazo ne mɔ azo. Awolɛndoazo kɔsɔɔti ɛyɛ ɛhye. 39Nyɛma fufutuu ne mɔ bayɛ ngakyelɛ debie mɔɔ mekɛ biala mɔɔ bɛkɛnwu bɛ la, bɛbahakye me mɛla ne mɔ na bɛali zolɛ; na bɛangakyi bɛ nzi bɛanzi me, bɛanyɛ mɔɔ bɛdabɛ bɛkulo la.
40“Yemɔti bɛhakye na bɛli me mɛla ne mɔ kɔsɔɔti azo, na bɛdu bɛ nwo bɛzie ahane bɛmaa me. 41Medame a mele Ɛdɛnkɛma bɛ Nyamenle ne mɔɔ yele bɛ vile Yigyibiti azɛlɛ zo la kɛ mele bɛ Nyamenle. Medame a mele Ɛdɛnkɛma bɛ Nyamenle ne a.”
Currently Selected:
Ɛdi 15: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
