Mak 3

Nrenya ne mɔɔ asa ko ɛdwe la

(Mat 12.9-14; Luk 6.6-11)

1Gyisɛse ziale hɔle nyianu sua ne anu bieko. Nrenya bie mɔɔ asa ko ɛdwe la wɔ ɛkɛ ne. 2Menli bie dɛle Gyisɛse nleanle saa ɔkɛyɛ nrenya ne ayile wɔ Ɛnwomenlelielɛ Kenle ne a ɛnee bɛahɔdoa ye. 3Gyisɛse zele nrenya ne mɔɔ asa ko ɛdwe la kɛ, “Dwazo bagyinla yɛ nyunlu ɛke.” 4Akee ɔbizale menli ne kɛ, “Duzu yɛɛ yɛ mɛla ne maa nwolɛ adenle kɛ yɛyɛ wɔ Ɛnwomenlelielɛ Kenle ne a? Ɔmaa adenle kɛ yɛyɛ nyele anzɛɛ yɛli ɛtane? Yɛlie sonla ngoane anzɛɛ yɛzɛkye ye?”

Na bɛambuke bɛ nloa. 5Gyisɛse vale ɛya na ɔnleanle bɛ nyunlu ɔyiale, noko eza ɔlile bɛ nwo nyane, ɔluakɛ bɛle menli mɔɔ ɛzua anyetele na bɛ ti yɛ se a. Yemɔti ɔzele nrenya ne kɛ, “Tenrɛ ɛ sa ne anu.” Nrenya ne denrɛle ɔ sa ne mɔɔ ɛdwe la anu, na ɔyɛle kpalɛ bieko. 6Zɔhane ati Falasiima ne vile nyianu sua ne anu vindele, na ndɛndɛ ne ala bɛ nee Belemgbunli Hɛlɔdo eku ne anu amra ne mɔ hɔvale adwenle kɛ bɛku ye.

Menli dɔɔnwo ne mɔɔ yiale tandane ne anloa la

7Gyisɛse nee ye ɛdoavolɛma ne hwenle bɛ nwo hɔle Galeli Tandane ne anloa, na menli dɔɔnwo kpalɛ doale ye. Bɛvi Galeli nee Dwudiya, 8Gyɛlusalɛm nee azua mɔɔ wɔ Ayedumia maanzinli nu nee Dwɔdan sunvoa mɔɔ di kɔ aduduleɛ la, nee ɛleka ɛleka mɔɔ bikye azuamgbole Taya nee Saedɛn la. Menli dɔɔnwo ɛhye rale Gyisɛse ɛkɛ, ɔluakɛ bɛde ninyɛne mɔɔ ɔlɛyɛ la nganeɛ. 9#Mak 4.1; Luk 5.1-3 Menli mɔɔ hɔle la zonle bo zo; yemɔti Gyisɛse zele ye ɛdoavolɛma ne mɔ kɛ bɛkpondɛ ɛlɛne bɛmaa ye, amaa menli ne anfofo ɔ nwo zo. 10Ɛnee yeyɛ menli dɔɔnwo ne ala ayile, zɔhane ati bɛdabɛ mɔɔ bɛnde kpɔkɛ la pelele kɛ bɛkɛbikye ye na bɛkɛva bɛ sa bɛkɛha ye bɔbɔ. 11Sunsum ɛtane ne mɔ nwu Gyisɛse a, bɛtu bɛgua ɔ nyunlu na bɛtea nu kɛ, “Wɔmɔ a ɛle Nyamenle Ara ne a!”

12Gyisɛse duale bɛ kpunli kɛ bɛmmaka zɔhane edwɛkɛ ne bɛkile ye sonlazule.

Gyisɛse kpa nu aye ɛzoanvolɛma bulu nee nwiɔ

(Mat 10.1-4; Luk 6.12-16)

13Akee Gyisɛse hɔle boka bie azo na ɔvɛlɛle menli mɔɔ ɔkpondɛ bɛ la. Bɛrale la 14ɔkpale nu ɔyele bɛ nuhua bulu nee nwiɔ na ɔvɛlɛle bɛ ye ɛzoanvolɛma na ɔzele bɛ kɛ, “Mekpa nu meye bɛ kɛ bɛ nee me ɛdɛnla. Mebazoa bɛ meamaa bɛahɔbɔ Edwɛkpa ne nolo, 15na mebamaa bɛ tumi meamaa bɛahola bɛadu mbɔnsam.”

16Menli bulu nee nwiɔ ne mɔɔ Gyisɛse vɛlɛle bɛ la a le ɛhye mɔ: Saemɔn mɔɔ Gyisɛse manle ye duma bieko kɛ bɛfɛlɛ ye Pita la, 17Gyemise nee ɔ diema Dwɔn, mɔɔ le Zɛbɛdi amra ne mɔ mɔɔ Gyisɛse vɛlɛle bɛ “Bowanɛgyize” la, (Bowanɛgyize abo a le Ɛsɛnlɛmanye Mralɛ.) 18Andelu, Felepe, Baatɔlomiyu, Mateyu, Tɔmase, Alefiyɛse ara Gyemise, Tadease, Saemɔn mɔɔ le Maanle Kulovolɛ ne, 19yɛɛ Dwudase Yesekaleɔto mɔɔ yele Gyisɛse manle la.

Gyisɛse nee Biyɛlezɛbɛle

(Mat 12.22-32; Luk 11.14-23; 12.10)

20Akee Gyisɛse hɔle sua nu na menli dɔɔnwo rayiale ye ɛkɛ ne bieko mɔɔ ɛnee akee ɔ nee ye ɛdoavolɛma ne mɔ bɛnnyia adenle bɛnli debie bɔbɔ a. 21Ɔ nli nee ɔ mediema ne mɔ dele la, bɛrale kɛ bɛbava ye bɛahɔ, ɔluakɛ menli ɛlɛkeha kɛ, “Yezɛ!”

22 # Mat 9.34; 10.25 Mɛla kilehilevolɛma bie mɔɔ vi Gyɛlusalɛm rale la hanle kɛ, “Mbɔnsam kpanyinli ne mɔɔ bɛfɛlɛ ye Biyɛlezɛbɛle la wɔ ɔ nwo, na yemɔ yɛɛ ɔmaa ye tumi mɔɔ ɔfa ɔtu mbɔnsam a.”

23Ɛhye ati Gyisɛse vɛlɛle menli ne mɔ, na ɔbule bɛ mrɛlɛ ɛhye mɔ kɛ, “Asoo Seetan kola tu Seetan? 24Saa maanle ko anu amra kyɛ bɛ nwo nu na bɛko bɛtia bɛ nwo a, maanle ne ɛngyinla, 25yɛɛ saa awuke ko anu amra kyɛ bɛ nwo nu na bɛko bɛtia bɛ nwo a, awuke ne ɛngyinla. 26Yemɔti saa Seetan ɛdwazo ɔ ngome ɔ nwo zo na ye nuhua ɛhyɛ nwiɔ a, ɛnee ɔnrɛhola gyinla, na ye awieleɛ ɛbikye.

27“Awie biala ɛngola ɛmbu katakyie sua, ɔnwua ye, kyesɛ ɔdumua ɔkyekye katakyie ne kolaa na yeahola yeasesa ye sua ne anu ninyɛne.

28“Bɛhakye ɛhye! Ɛtane biala ɛnle ɛkɛ mɔɔ sonla kɛyɛ anzɛɛ munzule edwɛkɛ biala ɛnle ɛkɛ mɔɔ sonla kɛha, mɔɔ bɛnrɛva bɛnrɛhyɛ ye a. 29#Luk 12.10 Noko awie biala mɔɔ kɛdendɛ ɛtane kɛtia Sunsum Nwuanzanwuanza ne la ɛnrɛnyia fakyɛ ɛlɛ, ɔluakɛ yeyɛ ɛtane mɔɔ ɛnlɛ awieleɛ.” 30(Gyisɛse hanle ɛhye, ɔluakɛ bie mɔ hanle kɛ, “Sunsum ɛtane wɔ ɔ nwo.”)

Gyisɛse ɔ nli nee ɔ mediema

(Mat 12.46-50; Luk 8.19-21)

31Gyisɛse ɔ nli nee ɔ mediema ne mɔ rale ragyinlanle sua ne anzi na bɛzoanle kɛ bɛvɛlɛ ye bɛmaa bɛ. 32Ɛnee menli dɔɔnwo dede ɔ nwo ɛkɛ ne, na bɛzele ye kɛ, “Yɛmenle, ɛ nli nee ɛ mediema mraalɛ nee mrenya ne mɔ gyi sua ye anzi lɔ, bɛse bɛkpondɛ wɔ.”

33Gyisɛse buale bɛ kɛ, “Me nli a le nwane? Me mediema a le nwane mɔ?” 34Na ɔnleanle bɛdabɛ mɔɔ bɛdede ɔ nwo ɛkɛ ne la ɔyiale na ɔhanle kɛ, “Me nli nee me mediema a le bɛdabɛ mɔɔ bɛyia ɛke la. 35Me diema nrenya nee me diema raalɛ nee me nli a le awie biala mɔɔ yɛ mɔɔ Nyamenle kpondɛ la.”

Currently Selected:

Mak 3: NB

Highlight

Copy