Mat 27
27
Bɛva Gyisɛse bɛhɔmaa Paelɛte
(Mak 15.1; Luk 23.1-2; Dw 18.28-32)
1Aleɛ hyenle nwonlomɔ mangyee ne la, sɛlɛvolɛ mgbanyinli ne mɔ amuala nee Dwuu mgbanyima ne mɔ bɔle kpɔkɛ kɛ bɛmaa bɛahu Gyisɛse. 2Bɛguale ye anga na bɛvale ye bɛhɔmanle Paelɛte mɔɔ le Wulomu amɛnlado ne.
Dwudase ewule
(Gyi 1.18-19)
3 #
Gyi 1.18-19
Mɔɔ Dwudase mɔɔ yele ye manle la nwunle kɛ bɛbu Gyisɛse ewule fɔlɛ la, ɔnlunle ɔ nwo na ɔvale dwɛtɛ fufule abulasa ne ɔhɔmanle sɛlɛvolɛ mgbanyinli ne nee mgbanyima ne mɔ 4na ɔzele bɛ kɛ, “Meyɛ ɛtane kɛ meye sonla mɔɔ ɛnze nwolɛ bie la memaa kɛ bɛhu ye a!”
Bɛbuale ye kɛ, “Na ɛhye fane yɛ nwo ɔ? Ɛdawɔ wɔ edwɛkɛ ɔ!”
5Dwudase vuandinle ezukoa ne guale Ɛzonlenlɛ Sua ne anu na ɔhɔle ɔhɔzɔle ɔ kɔme nyɛma.
6Sɛlɛvolɛ mgbanyinli ne mɔ sesale ezukoa ne na bɛhanle kɛ, “Ɛhye le mogya ezukoa, yɛɛ ɔtia yɛ mɛla ne kɛ yɛkɛva yɛkɛgua Ɛzonlenlɛ Sua ne gya ne anu.” 7Yemɔti bɛdwenlenle nwolɛ na bɛvale ezukoa ne bɛhɔdɔle azɛlɛ mɔɔ awie bie nwo ye mbuakɛ nee ɛyɛba wɔ zo la, bɛvale bɛyɛle nyɛvolɛ azie. 8Na ɛnɛ nee ɛnɛ ala, bɛfɛlɛ ye “Mogya Azɛlɛ.”
9 #
Zɛk 11.12-13
Ɛhye manle edwɛkɛ ne mɔɔ Nyamenle kpɔmanvolɛ Gyɛlɛmaya hanle la yɛle nɔhalɛ kɛ, “Bɛvale dwɛtɛ fufule abulasa ne, mɔɔ le ɔ ti ezukoa ne, mɔɔ Yizilayɛma bie mɔ ɛkponle zo ɛva ɛdɔ ye la 10bɛdɔle azɛlɛ bɛvile awie bie mɔɔ nwo mbuakɛ nee ɛyɛba wɔ zo la ɛkɛ, kɛmɔ Awulae hanle hilele me ala la.”
Paelɛte bizebiza Gyisɛse edwɛkɛ
(Mak 15.2-5; Luk 23.3-5; Dw 18.33-38)
11Bɛvale Gyisɛse bɛraziele amɛnlado ne anyunlu na amɛnlado ne bizale ye kɛ, “Wɔmɔ a ɛle Dwuuma belemgbunli ne la ɔ?”
Gyisɛse buale ye kɛ, “Yemɔ ne ala a wɔha la.” 12Na mɔɔ sɛlɛvolɛ mgbanyinli ne nee mgbanyima ne mɔ toɔdoa ye la, yeandɛ ɔ nloa anu.
13Yemɔti Paelɛte zele ye kɛ, “Ɛnde mɔɔ bɛlɛkeha bɛatia wɔ la ɔ?”
14Na Gyisɛse ambua ye, yɛɛ yeanye ndoanlɛ ko bɔbɔ anloa, na ɔzinle amɛnlado ne anwo kpole.
Bɛbu Gyisɛse ewule fɔlɛ
(Mak 15.6-15; Luk 23.13-25; Dw 18.39—19.16)
15Akpabɛnwo Ɛvoyia ne dwu zo a, amɛnlado ne ta ye pilizanli ko mɔɔ menli ne kɛbiza la maa bɛ. 16Mekɛ ne anu ɛnee pilizanli maamɔvo ko wɔ ɛkɛ ne. Bɛfɛlɛ ye Gyisɛse Balabase. 17Yemɔti mɔɔ menli ne yiale la, Paelɛte bizale bɛ kɛ, “Boni a bɛkulo kɛ meye ye memaa bɛ a, Gyisɛse Balabase anzɛɛ Gyisɛse ne mɔɔ bɛfɛlɛ ye Kelaese ne la?” 18Ɔluakɛ Paelɛte ze ye wienyi kɛ ɛkpɔlɛ ti yɛɛ menli ne ɛva Gyisɛse ɛrɛlɛ ye a.
19Eza mɔɔ ɛnee Paelɛte de ye ndɛnebualɛ ebia ne anu la, ɔ ye dole ye nrɛlaleɛ kɛ, “Mmayɛ nrenya ne ɛhwee na ɔnze nwolɛ bie. Ɔlua yemɔ ɔ ti, menwu ɛzulolɛ kpole ɛnɛ nɔe wɔ ɛlalɛ nu.”
20Sɛlɛvolɛ mgbanyinli ne nee mgbanyima ne mɔ lile wulale menli ne kɛ bɛbiza bɛlie Balabase na bɛmaa bɛhu Gyisɛse. 21Paelɛte bizale bɛ bieko kɛ, “Menli nwiɔ ɛhye, boni a bɛkulo kɛ meye ye memaa bɛ a?”
Bɛbuale ye kɛ, “Balabase ɔ!”
22Paelɛte bizale bɛ kɛ, “Na kɛ menyɛ Gyisɛse ne mɔɔ bɛfɛlɛ ye Kelaese ne la ɛ?”
Na bɛ muala bɛhanle kɛ, “Bɔ ye meanubaka nu!”
23Paelɛte bizale bɛ kɛ, “Kɛmɔti ɛ, duzu ɛtane a yeyɛ a?” Na bɛdeɛdeanle nuhua kpole kɛ, “Bɔ ye meanubaka nu!”
24 #
Mɛla 21.6-9
Mɔɔ Paelɛte nwunle kɛ ɔyɛ nwolɛ bie ala a ɔnrɛyɛ boɛ, na ɔlua zo nzaka kpondɛ ara la, ɔvale nzule ɔnrinzinle ɔ sa anwo wɔ menli ne amuala anyunlu ɛkɛ ne na ɔzele kɛ, “Menze sonla ɛhye ewule ne anwo bie; menli nwolɛ ɛzonle! Bɛdabɛ bɛ edwɛkɛ ɔ!”
25Na bɛ muala bɛdeanle nu bɛzele kɛ, “Maa ye mogya ɛgua yɛdayɛ nee yɛ mra ati zo!”
26Akee Paelɛte yele Balabase manle bɛ; ɔmanle bɛbilale Gyisɛse empele na ɔyele ye ɔmanle bɛ kɛ bɛhɔbɔ ye meanubaka nu.
Sogyama golo Gyisɛse anwo
(Mak 15.16-20; Dw 19.2-3)
27Paelɛte sogyama ne vale Gyisɛse hɔle amɛnlado ne suakunlu ɛkɛ ne, na bɛvɛlɛle bɛ ekpunli ne anu amra bɛmanle bɛrayiale. 28Bɛkpolokpolole ye adɛladeɛ ɛdeɛ ne mɔ na bɛvale tɛladeɛ kɔkɔlɛ bie mɔɔ arelemgbunli ala a wula la bɛwulale ye. 29Bɛvale evileni bɛnwonle abɔtile bɛkpolole ɔ ti, na bɛvale baka bɛwulale ɔ sa fema ne anu; akee bɛhotole ɔ nyunlu ɛkɛ ne na bɛzile ye amgbu bɛhanle kɛ, “Dwuuma Belemgbunli, nyi kyɛ!” 30Bɛtotole nyɛlɛ ɔ nyunlu na bɛliele baka ne ɔ sa nu bɛvale bɛbɔle ɔ ti zo. 31Bɛgolole ɔ nwo bɛwiele la, bɛyele arelemgbunli tɛladeɛ kɔkɔlɛ ne ɔ nwo na bɛvale ye adɛladeɛ ɛdeɛ ne mɔ bɛwulale ye na akee bɛvale ye bɛhɔle kɛ bɛkabɔ ye meanubaka nu.
Bɛbɔ Gyisɛse meanubaka nu
(Mak 15.21-32; Luk 23.26-43; Dw 19.17-27)
32Bɛzile nu mɔɔ bɛkɔ la, bɛ nee nrenya bie mɔɔ bɛfɛlɛ ye Saemɔn mɔɔ vi Saelini maanle nu la yiale, na bɛhyele ye mialera nu bɛmanle ɔzoale Gyisɛse meanubaka ne. 33Bɛrale ɛleka bie mɔɔ bɛfɛlɛ ye Hibulu aneɛ nu “Gɔlogɔta” la; (ɔ bo a le Etile Kanrɛlɛ Ɛleka) 34#Edw 69.21 bɛvale nwanye mɔɔ bɛva bɔnyema bɛkpoto nu la bɛmanle ye kɛ ɔnlo; na ɔbɔle zolɛ la, yeanno.
35 #
Edw 22.18
Bɛbɔle ye meanubaka nu na akee bɛguale nzeleba bɛhyɛle ye adɛladeɛ ne mɔ bɛvale. 36Nzinlii bɛdɛnlanle aze na bɛzinzale ye. 37Bɛhɛlɛle deɛ mɔɔ ɔlua zo mɔɔ yemɔti bɛhunle ye la bɛbɔle ye meanubaka ne azo anwuma kɛ, “Ɛhye a le Gyisɛse, Dwuuma Belemgbunli ne.” 38Bɛbɔle nwule nwiɔ noko meanubaka nu bɛbokale Gyisɛse anwo; ko wɔ ye fema zo yɛɛ ko wɔ ye bɛne zo.
39 #
Edw 22.7; 109.25 Bɛdabɛ mɔɔ bɛpɛle nuhua ɛkɛ ne la zile Gyisɛse amgbu, bɛyɛle ye aholoba kɛ, 40#Mat 26.61; Dw 2.19 “Wɔmɔ ɛdawɔ ɛse ɛkola ɛbubu Ɛzonlenlɛ Sua ne na ɛfa kenle nsa ɛsi! Saa wɔmɔ a ɛle Nyamenle Ara ne a, die ɛ nwo ɛ! Ɛvi meanubaka ne azo dwu aze!”
41Sɛlɛvolɛ mgbanyinli ne nee mɛla kilehilevolɛma ne nee mgbanyima ne mɔ noko zile ye amgbu kɛ, 42“Ɔdie awie mɔ ngoane, noko ɔngola ɔnlie ɔ nwo ngoane! Tɛ yemɔ a ɔle Yizilayɛma belemgbunli ne la ɔ? Ɔvi meanubaka ne azo ɔdwu aze kɛkala na yɛkɛlie ye yɛkɛli. 43#Edw 22.8 Ɔfa ɔ rɛle ɔwula Nyamenle nu na ɔka kɛ ɔle Nyamenle Ara. Akee bɛmaa yɛnlea saa Nyamenle kɛlie ye ngoane kɛkala a!”
44Nwule ne mɔ mɔɔ bɛbɔle bɛ nee ye meanubaka nu la, bɛdabɛ bɛyɛle ye aholoba zɔhane ala.
Gyisɛse ewule
(Mak 15.33-41; Luk 23.44-49; Dw 19.28-30)
45Mɔɔ ɔdwule sɛnzɛngyinla la awozinli vale azɛlɛ ye kɔsɔɔti azo toonwo dɔnehwele nsa. 46#Edw 22.1 Mɔɔ dɔne nsa asɛɛ ɛbɔ la, Gyisɛse deanle nuhua hanle ye Hibulu aneɛ nu kɛ, “Yilae, Yilae, lɛma sabaketani?” Ɔ bo a le, “Me Nyamenle, me Nyamenle, duzu ati a wɔkpo me ɛ?”
47Menli mɔɔ gyigyi ɛkɛ ne la bie mɔ dele na bɛzele kɛ, “Ɔlɛfɛlɛ Yilaegya!” 48#Edw 69.21 Ɛkɛ ne ala bɛ nuhua ko nriandile hɔvale emiane bɔle nza nvinli nu vale duale baka ti na ɔvale ɔmanle ye kɛ ɔnlo.
49Na bie mɔ zele kɛ, “Bɛgyinla, bɛmaa yɛnlea, saa Yilaegya kɛralie ye a!” [Na ko noko vale atwɛ wɔle ɔ nvenle, na ɔhwinle mogyanzule.]#27.49 Na ko noko vale atwɛ wɔle ɔ nvenle, na ɔhwinle mogyanzule: Ɛhye wɔ mbuluku dɛba ne bie mɔ anu.
50Na Gyisɛse deanle nu kpole bieko na ɔwule.
51 #
Ade 26.31-33
Ɛkɛ ne ala Ɛzonlenlɛ Sua ne anu mgbɛnu ɛdanlɛ ne dele ebule nwiɔ, ɔvi anwuma ɔpenle aze. Azɛlɛ kpusule, awolɛ kpukekpukele, 52sɛka zo bukebukele, na bɛdwazole Nyamenle menli ne mɔɔ ɛwu la anu dɔɔnwo bɛrale ngoane nu. 53Mɔɔ Nyamenle dwazole Gyisɛse vile ewule nu la, bɛdabɛ noko bɛvile bɛ nla ne mɔ anu bɛvindele na bɛhɔle Suakpole Nwuanzanwuanza Gyɛlusalɛm azo, na bɛyele bɛ nwo bɛhilele menli dɔɔnwo.
54Mɔɔ sogyama ne nee bɛ kpanyinli ne mɔɔ ɛnee ɛlɛsinza Gyisɛse la nwunle azɛlɛ ɛkpusulɛ ne nee ninyɛne mɔɔ sisile la, bɛzulole kpole na bɛzele kɛ, “Amgba, nrenya ne le Nyamenle Ara!”
55 #
Luk 8.2-3
Ɛnee mraalɛ dɔɔnwo bie wɔ ɛkɛ ne, bɛgyinlanle amozi moa moa na bɛnleanle mɔɔ ɛlɛkɔ zolɛ la. Bɛdoale Gyisɛse bɛ nee ye vi Galeli na bɛzonlenle ye. 56Bɛ nuhua bie mɔ a le Mɛle mɔɔ vi Magedala la, Mɛle mɔɔ le Gyemise nee Dwosefi bɛ nli ne, yɛɛ Zɛbɛdi amra ne mɔ bɛ nli ne.
Gyisɛse ɛzielɛ
(Mak 15.42-47; Luk 23.50-56; Dw 19.38-42)
57Mɔɔ aleɛ ne hɔle bie la, sukoavolɛ bie mɔɔ vi Arelematia la rale; bɛfɛlɛ ye Dwosefi, na ɔdaye noko ɔle Gyisɛse ɛdoavolɛ. 58Ɔhɔle Paelɛte anyunlu ɔhɔzɛlɛle Gyisɛse funli ne. Na Paelɛte manle bɛhɔyele funle ne bɛmanle ye. 59Yemɔti Dwosefi vale funli ne, ɔkyekyele ye wɔ kisane nu, 60na ɔziele ye wɔ ɔdaye ye nla fofolɛ mɔɔ yemaa bɛpɛ wɔ bolɛ bie anu la anu. Akee ɔhundole bolɛ kpole bie ɔnyinle nla ne anloa na ɔhɔle. 61Mɛle mɔɔ vi Magedala la nee Mɛle ɛhendeɛ ne wɔ ɛkɛ ne bie, bɛdede aze na bɛ nye gyi sɛka ne anwo.
Gyisɛse sɛka ne anwo sinzavolɛma
62Aleɛ hyenle la, kenle ne le Ɛnwomenlelielɛ Kenle, sɛlɛvolɛ mgbanyinli ne nee Falasiima ne mɔ yiale Paelɛte, 63#Mat 16.21; 17.23; 20.19; Mak 8.31; 10.33-34; Luk 9.22; 18.31-33 na bɛzele ye kɛ, “Yɛmenle, yɛkakye kɛ mekɛ mɔɔ adalɛ ne de aze la, ɔhanle kɛ, ‘Ye kenle nsa ne azo bɛbadwazo me bɛara ngoane nu.’ 64Yemɔti maa adenle maa bɛzinza sɛka ne kpalɛ ɔhɔkpula kenle nsa ne, amaa ye ɛdoavolɛma ne angɔnwua ye, na bɛaraha bɛahile menli kɛ, ‘Bɛdwazo ye bɛvi ewule nu.’ Saa ɛhye si a, adalɛ ɛhye kɛdɛla alumua ɛdeɛ ne bɔkɔɔ.”
65Paelɛte zele bɛ kɛ, “Bɛva sinzavolɛma bɛmaa bɛhɔzinza sɛka ne, kɛmɔ bɛdabɛ bɛkpondɛ la.”
66Yemɔti bɛhɔle bɛhɔzɔle nla ne anloa na bɛmanle sogyama zinzale.
Bible in Nzema © Bible Society of Ghana, 1998.