Mat 25
25
Mbɛlɛra bulu ne anwo ɛrɛlɛ
1 #
Luk 12.35
“Mekɛ ne anu Anwuma Belemgbunlililɛ ne bayɛ kɛ mbɛlɛra bulu bie mɔɔ kenle ko vale bɛ ahɛnlaneɛ kɛ bɛkayia atɔfolɛ nrenya ne ade la. 2Bɛ nuhua nnu le ahɔnwɔne, yɛɛ nnu noko ze nrɛlɛbɛ. 3Ahɔnwɔne ne mɔ vale bɛ ahɛnlaneɛ la bɛanva nwole bɛanzia bɛ nwo, 4na nrɛlɛbɛvolɛma ne, bɛmɛ bɛvale bie. 5Kɛmɔ atɔfolɛ nrenya ne hyɛle la ati, mbɛlɛra ne mɔ bɔle ngɔsɔkɛ na bɛlafele.
6“Arɛlevilɛ nu ala, wɔ alevinli mu nwiɔ avinli, bɛdele ɛnelɛ kɛ, ‘Atɔfolɛ nrenya ne ɛne! Bɛrɛla bɛrayia ye!’ 7Mbɛlɛra bulu ne dunwuele na bɛhanle bɛ ahɛnlaneɛ ne mɔ anu. 8Na ahɔnwɔne ne mɔ zele nrɛlɛbɛvolɛma ne kɛ, ‘Bɛmaa yɛ bɛ nwole ne bie na yɛ ahɛnlaneɛ ne mɔ ɛlɛnu.’ 9Nrɛlɛbɛvolɛma ne zele bɛ kɛ, ‘Kyɛkyɛ, yɛnlie yɛnli kɛ nwole ne kɛza yɛ nee bɛdabɛ. Bɛhɔ bɛhɔdɔ bie.’ 10Yemɔti bɛhɔle kɛ bɛkadɔ nwole ne bie; na mɔɔ bɛhɔle la yɛɛ atɔfolɛ nrenya ne rale a. Na bɛdabɛ mɔɔ bɛwɔ ɛkɛ ne nee nrɛlɛbɛvolɛma nnu ne mɔɔ ɛnee bɛmɛ bɛnyia nwolɛ la nee ye hɔle atɔfolɛlielɛ ne abo, na bɛdole anlenkɛ ne anu.
11 #
Luk 13.25
“Nzinlii ahɔnwɔne ne mɔ rale rabɔle nu kɛ, ‘Yɛmenle, yɛmenle, buke yɛ!’ 12Na atɔfolɛ nrenya ne zele bɛ kɛ, ‘Kyɛkyɛ! Nɔhalɛ, meka meahile bɛ, menze bɛ.’ ”
13Na Gyisɛse dwulale ye edwɛkɛ ne kɛ, “Yemɔti bɛzinza, ɔboalekɛ bɛnze kenle ko ne anzɛɛ dɔnehwele ko ne mɔɔ Awulae bara la.”
Sonvolɛma nsa ne anwo ɛrɛlɛ
(Luk 19.11-27)
14 #
Luk 19.11-27
Gyisɛse vale zɔle zolɛ kɛ, “Mekɛ ne anu Anwuma Belemgbunlililɛ ne bayɛ kɛ nrenya bie mɔɔ ɛlɛtu adenle la; ɔvɛlɛvɛlɛle ye sonvolɛma ne mɔ na ɔvale ye agyadeɛ ne ɔmanle bɛ. 15Ɔmanle biala debie, kɛmɔ bɛ anwosesebɛ si de la. Ɔmanle ko nzunza apenle nnu, ko noko ɔmanle ye apenle nwiɔ, yɛɛ mɔɔ tɔ zo nsa la, ɔmanle ye apenle ko na ɔhɔle. 16Sonvolɛ ne mɔɔ bɛmanle ye nzunza apenle nnu ne la vale ye ɛdeɛ ne hɔlile gua na ɔnyianle nzunza apenle nnu nvasoɛ wɔ nwolɛ. 17Mɔɔ bɛmanle ye apenle nwiɔ ne la yɛle ye zɔhane ala na ɔnyianle nvasoɛ nzunza apenle nwiɔ wɔ nwolɛ. 18Mɔɔ bɛmanle ye nzunza apenle ne la hɔvunle kuma na ɔvale ɔ menle ne ezukoa ne ɔveale nu.
19“Ɔhyɛle kpalɛ na bɛ menle ne ara; na ɔ nee bɛ rayɛle mgbonda. 20Mɔɔ nyianle nzunza apenle nnu la rayele ye ezukoa ne nee nwolɛ nvasoɛ apenle nnu ne na ɔzele kɛ, ‘Yɛmenle, ɛmanle me apenle nnu. Menyia nwolɛ nvasoɛ apenle nnu na yemɔ ɛne!’ 21Ɔ menle ne zele ye kɛ, ‘Mo, wɔbɔ mɔdenle bɔkɔɔ; ɛle sonvolɛ kpalɛ mɔɔ di nɔhalɛ a! Wɔbɔ mɔdenle wɔnlea ezukoa ekyi ye azo boɛ, yemɔti mebava wɔ meazie ninyɛne mgbole nloa. Bɛla balie ɛ nye wɔ me nwo ɛke!’
22“Sonvolɛ ne mɔɔ bɛmanle ye nzunza apenle nwiɔ la rale na ɔzele kɛ, ‘Yɛmenle, ɛmanle me nzunza apenle nwiɔ. Menyia nwolɛ nvasoɛ apenle nwiɔ na yemɔ ɛne!’ 23Ɔ menle ne zele ye kɛ, ‘Mo, wɔbɔ mɔdenle somaa; ɛle sonvolɛ mɔɔ di nɔhalɛ a! Wɔbɔ mɔdenle wɔnlea ezukoa ekyi ye azo boɛ, yemɔti mebava wɔ meazie ninyɛne dɔɔnwo anloa. Bɛla na balie ɛ nye wɔ me nwo ɛke!’
24“Akee sonvolɛ ne mɔɔ bɛmanle ye nzunza apenle ko ne la rale na ɔrazele ɔ menle ne kɛ, ‘Yɛmenle, meze wɔ kɛ ɛ ti yɛ se, ɛbu bɛyɔba wɔ ɛleka mɔɔ wɔanlua debie la, na ɛkuohua aleɛ wɔ ɛya mɔɔ wɔanlua ma wɔ nu la anu. 25Menzulole la ati, menvunle wɔ ezukoa ne menyɛle. Yemɔti wɔ ezukoa ne ɛne!’
26“Na ɔ menle ne zele ye kɛ, ‘Ɛle sonvolɛ mgbovonle, amumuyɛ kpalɛ! Wɔmɔ ɛze me kɛ mebu bɛyɔba wɔ ɛleka mɔɔ meanlua debie la, na mekuohua aleɛ wɔ ɛya mɔɔ meanlua ma nu la anu? 27Wɔdendɛ boɛ! Na kɛmɔti a wɔanva me ezukoa ne wɔangɔndo bange ɛ? Anrɛɛ mera la, nvasoɛ ɛra zolɛ, na meahɔlie me ezukoa ɔ nli ne nee nvasoɛ ne amuala. 28Bɛza ye bɛlie mɔɔ ɔlɛ la na bɛva bɛmaa sonvolɛ ne mɔɔ lɛ nzunza apenle bulu ne la. 29#Mat 13.12; Mak 4.25; Luk 8.18 Ɔluakɛ mɔɔ lɛ bie la, bɛkɛmaa ye bie dɔɔnwo bɛkɛboka nwolɛ, na ɔkɛnyia ye molozo; na mɔɔ ɛnlɛ bie dɔɔnwo la, ekyi ne bɔbɔ mɔɔ ɔlɛ la, bɛkɛlie ye ɔ sa nu. 30#Mat 8.12; 22.13; Luk 13.28 Akee sonvolɛ mgbane ɛhye, bɛvuandi ye bɛdo alie nwo lɔ awozinli kpole ne anu; ɛkɛ ne yɛɛ menli bazu adedɛ bɛ nwo bonrane nu a!’
Ndɛnebualɛ mɔɔ li amozi la
31 #
Mat 16.27; 19.28 “Mekɛ mɔɔ medame Sonla Ra, menwɔra kɛ Belemgbunli, mɔɔ ɛnee me soanvolɛma ne amuala wɔ me nwo ɛkɛ ne la, mebadɛnla me anyunlunyia belemgbunli ebia ne anu, 32na meaboɔboa aleɛabo amra amuala anloa wɔ me nyunlu ɛkɛ ne. Na mebahyɛ bɛ nuhua nwiɔ, kɛmɔ mboaneneavolɛ ye mboane fi mbɔnkye avinli la. 33Mebakpa mboane ne mɔ meagua me sa fema zo, na meagua mbɔnkye ne mɔ me sa bɛne zo. 34Na akee meaze menli mɔɔ wɔ me sa fema zo la kɛ, ‘Bɛmɛ mɔɔ Egya ɛyila bɛ a, bɛrɛla! Bɛ nee me ɛrali belemgbunli. Egya hyehyɛle manle bɛ kolaa na bɛabɔ ewiade ye. 35Ɔluakɛ ɛhɔne hunle me na bɛmanle me aleɛ, nzuhɔne hunle me na bɛmanle me nzule, menyɛle ɛyɛvolɛ na bɛliele me wɔ bɛ azua nu, 36me nwo lale zo na bɛmanle me ɛdanlɛ, me nwo dole me na bɛnleanle me, yɛɛ menlale efiade na bɛrakpɔlale me.’
37“Na menli kpalɛ ɛhye mɔ babua kɛ, ‘Awulae, kenlenzu a yɛnwunle wɔ kɛ ɛhɔne ɛlɛku wɔ mɔɔ yɛmanle wɔ aleɛ, anzɛɛ nzuhɔne ɛlɛku wɔ mɔɔ yɛmanle wɔ nzule a? 38Kenlenzu a ɛyɛle ɛyɛvolɛ ɛrazokoɛle yɛ mɔɔ yɛliele wɔ wɔ yɛ azua nu, anzɛɛ ɛ nwo lale zo na yɛmanle wɔ ɛdanlɛ a? 39Kenlenzu a yɛnwunle wɔ kɛ ɛnde kpɔkɛ anzɛɛ ɛlale efiade mɔɔ yɛrakpɔlale wɔ a?’ 40Na mebabua bɛ kɛ, ‘Nɔhalɛ, meka meahile bɛ kɛ, suzuamgba ala mɔɔ bɛyɛle ɛhye mɔ bɛmanle me mediema ɛhye mɔ mɔɔ anwo ɛngyia la anu bie la, bɛyɛle bɛmanle me.’
41“Akee mebaze bɛdabɛ mɔɔ bɛwɔ me sa bɛne zo la kɛ, ‘Bɛvi me nwo ɛke bɛhɔ, munzule menli! Bɛhɔ senle ne mɔɔ ɛnnu ɛlɛ, mɔɔ ɔvi ewiade abobɔlɛ bɛhua bɛmaa Abɔnsam nee ye soanvolɛma la anu! 42Ɔluakɛ ɛhɔne hunle me na bɛammaa me aleɛ, nzuhɔne hunle me na bɛammaa me nzule, 43menyɛle ɛyɛvolɛ na bɛanlie me wɔ bɛ azua nu, me nwo lale zolɛ na bɛammaa me ɛdanlɛ, me nwo dole me yɛɛ menlale efiade na bɛamkpo me bo zo.’
44“Na bɛdabɛ noko bɛbabua kɛ, ‘Awulae, kenlenzu yɛɛ yɛnwunle wɔ kɛ ɛhɔne ɛlɛku wɔ anzɛɛ nzuhɔne ɛlɛku wɔ, ɛyɛle ɛyɛvolɛ anzɛɛ ɛ nwo lale zolɛ, ɛ nwo dole wɔ, ɛlale efiade, mɔɔ yɛamboa wɔ a?’ 45Na mebabua bɛ kɛ, ‘Nɔhalɛ, meka meahile bɛ kɛ, suzuamgba ala mɔɔ bɛkpole kɛ bɛnrɛboa menli ɛhye mɔ mɔɔ anwo ɛngyia la anu ko bɔbɔ la, bɛkpole kɛ bɛnrɛboa medame noko.’ 46#Dan 12.2 Na bɛkɛdea ɛhye mɔ ndeanlɛ mɔɔ ɛnlɛ awieleɛ a, na bɛava menli kpalɛ ne mɔ bɛahɔ ngoane mɔɔ ɛnlɛ awieleɛ la anu.”
Bible in Nzema © Bible Society of Ghana, 1998.