Mat 23
23
Gyisɛse bɔ ɛdoavolɛma kɔkɔ wɔ Falasiima nee mɛla kilehilevolɛma anwo
(Mak 12.38-39; Luk 11.43,46; 20.45-46)
1Akee Gyisɛse dendɛle hilele menli dɔɔnwo ne nee ye ɛdoavolɛma ne mɔ kɛ, 2“Mɛla kilehilevolɛma ne nee Falasiima ne mɔ a lɛ adenle kola kilehile Mosisi mɛla ne anu a. 3Zɔhane ati bɛdie bɛ, yɛɛ debie biala mɔɔ bɛkɛha bɛkɛhile bɛ la bɛyɛ, noko bɛmmanea bɛ nyɛleɛ zo bɛbɔ bɛ ɛbɛla, ɔboalekɛ bɛka na bɛdabɛ mumua ne bɛnyɛ. 4Bɛkyekye bɔlɛ ɛnlomboɛ mɔɔ ye ɛzoalɛ ɛnla aze la bɛsoa menli, noko bɛdabɛ mumua ne bɛnva bɛ sa ɛrɛlɛsɛka ko bɔbɔ bɛnzɔ bɛ nu. 5#Mat 6.1; Ɛdi 15.38; Mɛla 6.8 Bɛyɛ bɛ ninyɛne kɔsɔɔti wɔ menli nye zo. Bɛdabɛ bɛnlea kɛ bɛ abɔtile ne mɔ si de mgbole na bɛhɛlɛhɛlɛ Nyamenle Edwɛkɛ wɔ nu, mɔɔ bɛbɔ a ɛnee ɔgua bɛ nwoma azo a; nee bie noko mɔɔ wɔ tabule nu mɔɔ bɛgua ye bɛ sa zo la mgbole kɛ si de la. Eza bɛnlea bɛ adɛladeɛ ne mɔ anloa, kɛ bɛzi bɛyɛ bɛ sosɔkpɔɔ la. 6Saa bɛkɔ ɛkponledolɛ bo a bɛ nye bolo ɛleka kpalɛ ɛdɛnlanlɛ, yɛɛ nyianu sua nu mbia kpalɛ zo a bɛkpondɛ bɛtɛnla a. 7Bɛkulo menli mɔɔ bɔ bɛ ti aze abiza bɛ ahye wɔ guabile zo nee menli mɔɔ yeyɛ bɛ, avɛlɛ bɛ, ‘Kilehilevolɛ’ la. 8Na bɛmɛ, bɛmmamaa awie fɛlɛ bɛ ‘Kilehilevolɛ’, ɔluakɛ bɛ muala bɛle mediema yɛɛ bɛ Kilehilevolɛ kokye. 9Eza bɛmmafɛlɛ awie biala bɛ ‘ze’ wɔ azɛlɛ ye azo, ɔluakɛ bɛ Ze kokye, na yemɔ ala a wɔ anwuma lɔ la. 10Bɛmmamaa awie fɛlɛ bɛ ‘ɔ menle’, ɔluakɛ bɛ Menle kokye; yemɔ a le Kelaese ne. 11#Mat 20.26-27; Mak 9.35; 10.43-44; Luk 22.26 Mɔɔ le kpole kpalɛ wɔ bɛ nu la ɔwɔ kɛ yɛ bɛ sonvolɛ. 12#Luk 14.11; 18.14 Awie biala mɔɔ kɛmemaa ɔ nwo zo la, bɛkɛha ye aze, na mɔɔ kɛha ɔ nwo aze la, bɛkɛmaa ye zo.
Gyisɛse bu mɛla kilehilevolɛma ne nee Falasiima ne mɔ fɔlɛ
(Mak 12.40; Luk 11.39-42,44,52; 20.47)
13“Munzule ɛha bɛmɛ mɛla kilehilevolɛma nee Falasiima! Nabalabama! Bɛmɛ, bɛto Anwuma Belemgbunlililɛ anlenkɛ ne anu bɛmaa menli ne ka ɔ nzi; bɛmɛ a, bɛnrɛhɔ nu, yɛɛ akee noko bɛnrɛmaa bɛdabɛ mɔɔ bɛlɛbɔ mɔdenle bɛahɔ nu la adenle bɛnrɛmaa bɛnrɛhɔ nu.
[14“Munzule ɛha bɛmɛ mɛla kilehilevolɛma nee Falasiima! Nabalabama! Bɛbɛlɛbɛla ahunlanvolɛ mraalɛ bɛbɔ bɛ awuke na akee bɛakpati bɛayɛ nwolɛ nzɛlɛlɛ ndendenle. Ɔlua ɛhye ati bɛ ndeanlɛ bayɛ kpole kpalɛ!]
15“Bɛmɛ mɛla kilehilevolɛma nee Falasiima, munzule ɛha bɛ! Nabalabama! Bɛmɛ, bɛdua nyevile nye, bɛdua aze bɛkɔ maanle maanle zo kɛ bɛkɛnyia sonla ko bɔbɔ bɛkɛhakyi ye bɛkɛmaa ɔkɛzonle Nyamenle; noko saa bɛnyia bie a, bɛyɛ bɛmaa ɔ nwo fɛta abɔnsam senle nu fane nwiɔ kɛ bɛdabɛ la!
16“Munzule ɛha bɛ! Bɛmɛ anyenzinliravolɛma mɔɔ kile adenle a! Bɛkilehile kɛ, ‘Saa sonla fa Ɛzonlenlɛ Sua ne ka ndane a, ɔndo; na saa ɔfa ezukoa nvutuke ne mɔɔ wɔ Ɛzonlenlɛ Sua ne anu la ɔka ndane a, ɔto.’ 17Anyenzinliravolɛma ahɔnwɔne! Boni a hyia a, ezukoa nvutuke ne anzɛɛ Ɛzonlenlɛ Sua ne mɔɔ maa ezukoa ne anwo te la? 18Eza bɛkilehile kɛ, ‘Saa sonla fa azukponle ne ka ndane a, ɔndo; na saa ɔfa ahyɛlɛdeɛ ne mɔɔ wɔ azukponle ne azo la ɔka ndane a, ɔto.’ 19Bɛle anyenzinliravolɛma amgba! Boni a hyia a, ahyɛlɛdeɛ ne anzɛɛ azukponle ne mɔɔ maa ahyɛlɛdeɛ ne anwo te la? 20Yemɔti bɛnwu ye kɛ saa awie fa azukponle ne ka ndane a, ɛnee yeva ahyɛlɛdeɛ ne mɔɔ wɔ zolɛ la amuala yeha ndane ne; 21eza saa awie fa Ɛzonlenlɛ Sua ne ka ndane a, ɛnee yeva Sua ne nee Nyamenle ne mɔɔ de nu la yeha ndane ne. 22#Aye 66.1; Mat 5.34 Saa awie fa anwuma ka ndane a, ɛnee yeva Nyamenle belemgbunli ebia ne nee mɔɔ de zolɛ la amuala yeha ndane ne.
23 #
Sɛlɛ 27.30
“Bɛmɛ mɛla kilehilevolɛma nee Falasiima, munzule ɛha bɛ! Nabalabama! Bɛmɛ bɛbu ɛlobɔ nu ɛya evuanlɛ mɔɔ le kɛ aabɛya la anu bulu bɛfa ko bɛmaa Nyamenle, na bɛbu bɛ nye bɛgua ninyɛne mɔɔ hyia kpalɛ wɔ mɛla ne anu, mɔɔ fane pɛlepɛlelilɛ, anwunvɔnezelɛ, yɛɛ nɔhalɛlilɛ nwo ngilehilelɛ la azo. Ɛhye mɔ a ɔwɔ kɛ bɛyɛ a, yɛɛ ɔnle kɛ bɛbu bɛ nye bɛgua mɔɔ ɛha la azo. 24Adekilevolɛma mɔɔ anye ɛzi a! Bɛsonyi kɛkɛba wɔ bɛ nzule nye bɛto, noko bɛme kɛlɛne!
25“Bɛmɛ mɛla kilehilevolɛma nee Falasiima! Munzule ɛha bɛ! Nabalabama! Bɛmɛ, bɛnrinzi bɛ kanrɛlɛ nee bɛ ɛyɛba nwo, noko bɛdabɛ mumua ne bɛ nuhua, amile nee angomedi ɛyi bɛ tɛkɛɛ. 26Falasiima anyenzinliravolɛma! Bɛlumua bɛnrinzi kanrɛlɛ ne anu na nwolɛ noko kɛyɛ bɔkɔbɔkɔ!
27 #
Gyi 23.3
“Bɛmɛ mɛla kilehilevolɛma nee Falasiima! Munzule ɛha bɛ! Nabalabama! Bɛle kɛ azie zo sɛka mɔɔ bɛha ye kalo la, bɛhwi nwolɛ ne fufule nwohyee noko ɔ kunlu le avunli mbowule nee azone ngome. 28Zɔhane ala yɛɛ bɛdabɛ noko bɛde a, awie nwu bɛ a ɔbadwenle kɛ bɛle menli mɔɔ di boɛ a, noko bɛ nuhua le nabalabayɛlɛ nee amumuyɛ ngome.
Gyisɛse ka bɛ kenlebie ndeanlɛ nwo edwɛkɛ
(Luk 11.47-51)
29“Bɛmɛ mɛla kilehilevolɛma nee Falasiima! Nabalabama! Bɛyɛ Nyamenle kpɔmanvolɛma mɔɔ ɛwu la sɛka ngɛnlɛma, na bɛyɛ ngakyelɛ ninyɛne bɛfa bɛkakye menli mɔɔ bɔle ɛbɛla kpalɛ wɔ mekɛ mɔɔ ɛnee bɛde ngoane nu la, 30na bɛka kɛ, ‘Saa yɛ nlenya mɔ mekɛ zo ɛnee yɛde aze a, anrɛɛ yɛanyɛ mɔɔ bɛyɛle la bie, yɛangu Nyamenle kpɔmanvolɛma ne mɔ.’ 31Ɛhye kile kɛ bɛdie bɛto nu bɔkɔɔ kɛ bɛ nlenya mɔ a hunle Nyamenle kpɔmanvolɛma ne mɔ a. 32Ɛnee noko bɛhɔ zo ɛ! Mɔɔ bɛ nlenya mɔ bɔle ɔ bo la yɛɛ bɛlɛfa bɛara awieleɛ a! 33#Mat 3.7; 12.34; Luk 3.7 Nwɔlɛ! Ɛkyelebenle mralɛ! Bɛdwenle kɛ bɛnrɛbua bɛ ewule fɔlɛ bɛnrɛmaa bɛnrɛhɔ abɔnsam senle nu ɔ? 34Ɛhye ala ati yɛɛ melɛsoa Nyamenle kpɔmanvolɛma, nrɛlɛbɛvolɛma, yɛɛ kilehilevolɛma wɔ bɛ nwo a; noko bɛbahu bie mɔ, bɛbabɔ bie mɔ meanubaka nu, bɛbabo bie mɔ wɔ bɛ nyianu azua ne mɔ anu, na bɛayɛ bie mɔ kpɔdekpɔde wɔ bɛ azua ne mɔ azo. 35#Mɔl 4.8; 2 Edk 24.20-21 Zɔhane ati, menli mɔɔ ɛnze nwolɛ bie mɔɔ bɛhu bɛ, ɛbɔ ye Ebulu anwo zo kɔkpula Bɛlakaya ara Zɛkalaya mɔɔ bɛhunle ye wɔ Ɛzonlenlɛ Sua ne nee azukponle ne avinli la anwo zo, bɛ kɔsɔɔti bɛ mogya ne anwo ndeanlɛ bagua bɛ ti zo. 36Nɔhalɛ, meka meahile bɛ, ɛhye mɔ amuala anwo ndeanlɛ bara bɛdabɛ adwuleso amra anwo zo.
Gyisɛse ɛhulolɛ mɔɔ lɛ ye wɔ Gyɛlusalɛm anwo la
(Luk 13.34-35)
37“Gyɛlusalɛm, O Gyɛlusalɛm! Mɔɔ ɛku Nyamenle kpɔmanvolɛma, ɛsi menli mɔɔ Nyamenle ɛzoa bɛ wɔ ɛ nwo la awolɛ a! Fane dɔɔnwo yɛɛ mehulo kɛ anrɛɛ menwɔva me sa menwɔbɛla wɔ menli ne amuala kɛ akɔlɛ ɛdane butu ɔ mra anwo zo la, noko wɔammaa me adenle. 38#Gyɛ 22.5 Yemɔti bɛbakpo wɔ Ɛzonlenlɛ Sua ne bɛamaa yeadɔ mgbane. 39#Edw 118.26 Na meka meahile wɔ, ɔvi ɛnɛ mɔɔ kɔ la, ɛnrɛnwu me bieko kɔkpula mekɛ mɔɔ ɛbaha kɛ, ‘Nyamenle ɛyila mɔɔ lua Awulae duma nu ɛlɛba la.’ ”
Bible in Nzema © Bible Society of Ghana, 1998.