Mat 21
21
Gyisɛse kɔ Gyɛlusalɛm konimlilɛ nu
(Mak 11.1-11; Luk 19.28-40; Dw 12.12-19)
1Mɔɔ Gyisɛse nee ye ɛdoavolɛma ne bikyele Gyɛlusalɛm na bɛradwule Bɛtefagye wɔ Ɔlivi Boka ne azo la, Gyisɛse zoanle ye ɛdoavolɛma nwiɔ, 2na ɔzele bɛ kɛ, “Bɛhɔ namule ne mɔɔ wɔ bɛ nyunlu lɔ la azo na bɛkɛnwu asoaso mɔɔ bɛhenda ye na asoaso ralɛ gyi ɔ nwo ɛkɛ ne la. Bɛzianyi bɛ na bɛva bɛ bɛrɛlɛ me. 3Na saa awie biala biza bɛ nwolɛ edwɛkɛ a bɛze ye kɛ, ‘Yɛ Menle ɛhyia bɛ nwo’;#21.3 Yɛ Menle ɛhyia bɛ nwo: anzɛɛ Bɛ menle ɛhyia bɛ nwo. na ɔkɛmaa bɛ adenle.”
4Ɛhye zile amaa mɔɔ Nyamenle kpɔmanvolɛ ne hanle la ayɛ nɔhalɛ kɛ,
5 #
Zɛk 9.9
“Ka kile suakpole Zayɔn kɛ,
Nea, wɔ belemgbunli ne ɛlɛba ɛ nwo.
Ɔle bɛlɛvo na ɔde asoaso nee asoaso ralɛ zo.”
6Ɛdoavolɛma ne hɔle na bɛhɔyɛle ye kɛmɔ Gyisɛse hanle hilele bɛ la. 7Bɛvale asoaso ne nee ɔ ra ne bɛrale na bɛvale bɛ ndanlɛ bɛguale zolɛ, na Gyisɛse dɛnlanle zolɛ. 8Menli dɔɔnwo kpalɛ noko sesɛle bɛ ndanlɛ wɔ adenle ne anu, yɛɛ bɛ bie mɔ bubule nya guale adenle ne anu. 9#Edw 118.25,26 Na menli dɔɔnwo ne mɔɔ li ɔ nyunlu nee ɔ nzi la deɛdeanle nuhua kɛ, “Ayɛlɛyelɛ#21.9 Ayɛlɛyelɛ: anzɛɛ “Hozana.” ɛha Devidi Ara ne! Nyamenle ɛyila mɔɔ lua Awulae duma nu ɛlɛba la! Bɛye Nyamenle ayɛlɛ!”#21.9 Bɛye Nyamenle ayɛlɛ: anzɛɛ “Hozana wɔ Anwuma Anwuma.”
10Mɔɔ Gyisɛse dwule Gyɛlusalɛm la, suakpole ne azo kpudwule na bɛbizale kɛ, “Na nwane ɛne?”
11Na menli dɔɔnwo ne zele kɛ, “Ɛhye a le Nyamenle kpɔmanvolɛ ne mɔɔ bɛfɛlɛ ye Gyisɛse, mɔɔ vi Nazalɛte mɔɔ wɔ Galeli la.”
Gyisɛse kɔ Ɛzonlenlɛ Sua ne anu
(Mak 11.15-19; Luk 19.45-48; Dw 2.13-22)
12Gyisɛse hɔle Ɛzonlenlɛ Sua ne anu na ɔvoanle bɛdabɛ mɔɔ bɛlɛdi gua wɔ ɛkɛ ne la amuala. Ɔbutubutule menli mɔɔ senza ezukoa la ɛkponle ne mɔ, ɔhanle menli mɔɔ tɔne mɔlɔnoma la mbia ne mɔ ɔguale, 13#Aye 56.7; Gyɛ 7.11 na ɔzele bɛ kɛ, “Bɛhɛlɛ ye wɔ Nyamenle Edwɛkɛ ne anu kɛ: Nyamenle se, ‘Bɛbavɛlɛ me Ɛzonlenlɛ Sua ne nzɛlɛlɛ sua.’ Na bɛmɛ, bɛyɛ ye awulema fealeka!”
14Anyenzinliravolɛma nee abuburama rale ɔ nwo ɛkɛ ne wɔ Ɛzonlenlɛ Sua ne anu, na ɔyɛle bɛ ayile. 15Mɔɔ sɛlɛvolɛ mgbanyinli ne nee mɛla kilehilevolɛma ne nwunle nwanwane gyima mgbole mɔɔ ɔlɛdi, nee ngakula ne mɔ alɛra mɔɔ bɛlɛyɛ, bɛayeyɛ Gyisɛse wɔ Ɛzonlenlɛ Sua ne anu kɛ, “Ayɛlɛyelɛ ɛha Devidi Ara ne!” la, bɛvale ɛya. 16#Edw 8.2 Yemɔti bɛbizale Gyisɛse kɛ, “Ɛte mɔɔ ɛhye mɔ ɛlɛkeha la ɔ?”
Gyisɛse buale bɛ kɛ, “Nɔhalɛ, mete. Na bɛtɛkengale Nyamenle Edwɛkɛ ne mɔɔ fane ɛhye anwo la ɔ? Ɔse,
‘Bɛtete ngakula ndetendete nee nlɔma kɛ
bɛye Nyamenle ayɛlɛ mɔɔ di munli a!’ ”
17Na Gyisɛse gyakyile bɛ ɛkɛ ne na ɔvile Gyɛlusalɛm ɔhɔle Bɛtani ɔhɔlale.
Gyisɛse wa feege baka ne amonle
(Mak 11.12-14,20-24)
18Aleɛ hyenle nwonlomɔ mangyee ne na Gyisɛse sia ahɔ Gyɛlusalɛm, na ɔlua adenle zo la ɛhɔne hunle ye. 19Ɔnwunle feege baka bie kɛ ɔgyi adehane ne, ɔhɔle ɔ bo la yeannwu ma ko bɔbɔ wɔ zolɛ kɛ nya ngome a yewula a. Yemɔti ɔzele baka ne kɛ, “Ɛnrɛzo ma bieko ɛlɛ!” Na ɛkɛ ne ala feege baka ne nwosonle.
20Ɛhye zinle ɛdoavolɛma ne anwo kpole na bɛbizale Gyisɛse kɛ, “Kɛ ɔyɛle mɔɔ feege baka ne nwosonle ndɛndɛ zɛhae ɛ?”
21 #
Mat 17.20; 1 Kɔl 13.2 Gyisɛse buale kɛ, “Bɛhakye ɛhye! Saa bɛdie bɛdi na bɛanzu kpolera a, bɛkɛhola bɛkɛyɛ mɔɔ meyɛ feege baka ɛhye la bie. Bɔbɔ bɛkɛhola bɛkɛze boka ɛhye kɛ, ‘Tudu kɔdɔ nyevile nu’, na ɔkɛyɛ zɔhane. 22Saa bɛdie bɛdi a, bɛ sa kɛha debie biala mɔɔ bɛkɛbiza wɔ nzɛlɛlɛ nu la.”
Gyisɛse tumi ne anwo edwɛkɛ
(Mak 11.27-33; Luk 20.1-8)
23Gyisɛse ziale rale Ɛzonlenlɛ Sua ne anu, na mɔɔ ɔlɛkilehile la, sɛlɛvolɛ mgbanyinli ne nee mgbanyima ne mɔ rale ɔ nwo ɛkɛ ne rabizale ye kɛ, “Duzu tumi a ɛlɛfa wɔayɛ ninyɛne ɛhye mɔ a? Nwane a manle wɔ tumi ɛhye a?”
24Gyisɛse buale bɛ kɛ, “Medame noko mebiza bɛ kpuyia ko na saa bɛye me ɔ nloa a menwɔhile tumi holɛ ko mɔɔ mefa meyɛ ninyɛne ɛhye mɔ la. 25Tumi ne mɔɔ Dwɔn nyianle ye vale zɔnenle menli la vi nienwu, ɔvi Nyamenle anzɛɛ ɔvi sonla?”
Na bɛbɔle ɔ bo kɛ bɛsu bɛ nwo kpolera kɛ, “Duzu edwɛkɛ a yɛha a? Saa yɛbua kɛ, ‘Ɔvi Nyamenle’ a, ɔkɛbiza yɛ kɛ, ‘Ɛnee duzu ati a bɛanlie bɛanli ɛ?’ 26Saa yɛka noko kɛ, ‘Ɔvi sonla’ a, yɛsulo menli ye, ɔboalekɛ bɛ muala bɛdie bɛto nu kɛ Dwɔn le Nyamenle kpɔmanvolɛ.” 27Yemɔti bɛbuale Gyisɛse kɛ, “Yɛnze.”
Na Gyisɛse ɔdaye ɔzele bɛ kɛ, “Ɛnee medame noko menrɛha ahenle holɛ ko mɔɔ manle me tumi kɛ menyɛ ninyɛne ɛhye mɔ la menrɛhile bɛ.”
Mralɛ mrenya nwiɔ ne anwo ɛrɛlɛ
28Akee Gyisɛse bizale bɛ edwɛkɛ ɛhye, ɔse, “Kɛ bɛdwenle ɛhye anwo bɛse ɛ? Nrenya bie lɛ ɔ mra mrenya nwiɔ. Ɔhɔle mɔɔ lumua la anwo ɛkɛ ne ɔhɔzele ye kɛ, ‘Me ra, ɛnɛ kɔyɛ gyima wɔ me vanye egyinli ne anu.’ 29Na ɔbuale ye kɛ, ‘Menrɛhɔ,’ Noko nzinlii ɔnlunle ɔ nwo na ɔhɔle. 30Ɔhɔle ko ne noko ɛkɛ ne na ɔhɔhanle edwɛkɛ ko ne ala ɔhilele ye. Na ɔbuale kɛ, ‘Egya, mebahɔ.’ Noko yeangɔ. 31Ɛnee ngakula nwiɔ ɛhye, bɛ nuhua boni a yɛle ɔ ze ɛhulolɛdeɛ a?”
Bɛzele ye kɛ, “Mɔɔ lumua la ɔ.”
Gyisɛse zele bɛ kɛ, “Nɔhalɛ, meka meahile bɛ: Adwuledievolɛma nee tuutuuma balumua anyia Nyamenle Belemgbunlililɛ ne agyakyi bɛ. 32#Luk 3.12; 7.29-30 Ɔluakɛ Dwɔn Sɔnevolɛ ne rale na ɔrahilehilele bɛ nɔhalɛ adenle ne la, bɛanlie ye bɛanli; noko adwuledievolɛma nee tuutuuma liele ye lile; yɛɛ nzinlii bɔbɔ mɔɔ bɛnwunle ɛhye zɔhane la, bɛannu bɛ nwo na bɛalie ye bɛali.”
Abunsama ne mɔɔ wɔ vanye egyinli ne anu la anwo ɛrɛlɛ
(Mak 12.1-12; Luk 20.9-19)
33 #
Aye 5.1-2
Eza Gyisɛse zele bɛ kɛ, “Bɛdie ɛrɛlɛ ɛhye noko. Azɛlɛ menle bie yɛle ye vanye egyinli na ɔhyele nwolɛ ɔyiale. Ɔdule kuma mɔɔ bɛbahwihwi vanye ma ne anu nzule bɛagua nu la, na ɔzile tawa tendenle ko mɔɔ bɛgyinla zo bɛsinza egyinli ne la. Akee ɔvale egyinli ne ɔwulale abunsama asa anu na ɔdule adenle ɔhɔle maanle fofolɛ nu. 34Ɛbuhenle ne dwule la, ɔzoanle ye sonvolɛma bie mɔ kɛ bɛhɔ bɛhɔlie ye ɛkpɔ ɛdeɛ ne bɛrɛlɛ ye. 35Na abunsama ne hyele sonvolɛma ne, bɛbole ko, bɛhunle ko na bɛzile ko awolɛ. 36Egyinli menle ne eza zoanle ye sonvolɛma mɔɔ zonle tɛla mɔɔ ɔlumuale ɔzoanle bɛ la, na bɛyɛle bɛdabɛ noko zɔhane ala. 37Nzinlii ɔzoanle ɔ ra nrenya wɔ bɛ nwo lɔ, na ɔdwenlenle kɛ, ‘Me ra ye ɛdeɛ, bɛbaze ye nyiane.’ 38Na mɔɔ abunsama ne nwunle ɔ ra ne la, bɛhanle bɛhilele bɛ nwo ngoko kɛ, ‘Kɔliagya#21.38 Kɔliagya: Dwuuma di bɛ ze agya. ne ɛne. Bɛrɛla bɛmaa yɛhu ye na yɛva ye agyadeɛ ne!’ 39Yemɔti bɛhyele ye na bɛvale ye bɛvindele egyinli ne anzi lɔ bɛhɔhunle ye.
40“Na ɛnee bɛnea a saa vanye egyinli ne amenle ba a, duzu a ɔkɛyɛ abunsama ne a?”
41Bɛbuale ye kɛ, “Ɔkɛhu amumuyɛma ne na ɔkɛva ye egyinli ne ɔkɛwula abunsama fofolɛ mɔɔ ɛbuhenle ne dwu a bɛkɛva ye ɛkpɔ ɛdeɛ ne bɛkɛmaa ye la asa anu.”
42 #
Edw 118.22-23
Gyisɛse zele bɛ kɛ, “Asoo bɛtɛkengale Nyamenle Edwɛkɛ ɛhye ɛlɛ? Ɔse,
‘Bolɛ ne mɔɔ suasivoma ne kpole la,
ɛrayɛ bolɛ mɔɔ anwo hyia kpole kpalɛ
kɛ sua mgbɛne zo sika la.
Awulae a yɛle ɛhye a;
na ɔyɛ nwanwane kpole!’
43“Zɔhane ati meka meahile bɛ, bɛbalie Nyamenle Belemgbunlililɛ ne bɛ sa nu na bɛava bɛamaa menli mɔɔ yɛ tieyɛ la. [ 44Na awie biala mɔɔ kɛdɔ bolɛ ɛhye azo la kɛtete nzokanzoka, yɛɛ mɔɔ bolɛ ne kɛdɔ ɔ nwo zo la kɛdi kɛyɛ kɛ sianlɛ.”]
45Sɛlɛvolɛ mgbanyinli ne nee Falasiima ne mɔ dele Gyisɛse ɛrɛlɛ ne abo, na bɛnwunle kɛ bɛmɛ a yebu ɛrɛlɛ ne yetia bɛ a. 46Ɛhye ati bɛyɛle kɛ bɛkye ye; noko akee bɛzulole, ɔluakɛ menli ne mɔ die to nu kɛ Gyisɛse le Nyamenle kpɔmanvolɛ.
Bible in Nzema © Bible Society of Ghana, 1998.