Mat 19
19
Ewolebɔlɛ nwo ngilehilelɛ
(Mak 10.1-12)
1Gyisɛse wiele ɛhye mɔ ka la, ɔvile Galeli na ɔhɔle Dwudiya maanzinli nu wɔ Azule Dwɔdan anzi nehane. 2Menli dɔɔnwo doale ye wɔ ɛkɛ ne, na ɔyɛle bɛ ayile.
3Falasiima bie rale Gyisɛse anwo ɛkɛ radole ye agyiba bizale ye kɛ, “Asoo yɛ mɛla ne maa adenle kɛ nrenya kola bɔ ɔ ye ewole wɔ edwɛkɛ biala anwo?”
4 #
Mɔl 1.27; 5.2 Gyisɛse buale kɛ, “Bɛtɛkengale Nyamenle Edwɛkɛ ne mɔɔ se: Mɔlebɛbo ne Nyamenle bɔle bɛ nrenya nee raalɛ 5#Mɔl 2.24 na ɔhanle kɛ, ‘Ɛhye ati nrenya bagyakyi ɔ ze nee ɔ nli na ɔ nee ɔ ye bɛabɔ nu, na bɛ mu nwiɔ bɛayɛ sonla ko’ la ɔ? 6Yemɔti ɛnee bɛnle nwiɔ bieko na bɛle ko. Zɔhane ati mɔɔ Nyamenle ɛha ɛbɔ nu la, ɔnle kɛ awie biala kpakye nu.”
7 #
Mɛla 24.1-4; Mat 5.31 Falasiima ne bizale ye kɛ, “Ɛnee duzu ati a Mosisi lile mɛla kɛ nrenya mɔɔ bɔ ɔ ye ewole la ɔwɔ kɛ maa ye ewolebɔlɛ kɛlata na ɔye ye ali ɛ?”
8Gyisɛse buale kɛ, “Mosisi manle bɛ adenle kɛ bɛbɔ bɛ ye mɔ ewole ɔboalekɛ bɛ nzo yɛ se. Mɔlebɛbo ne amuala ɛnee ɔnle zɔ.
9 #
Mat 5.32; 1 Kɔl 7.10-11 “Zɔhane ati meka meahile bɛ: Nrenya biala mɔɔ kɛbɔ ɔ ye ewole, kɛgya raalɛ fofolɛ la ɛdo awuvolɛvalɛ mɛla ne, kyesɛ raalɛ ne anli nɔhalɛ ammaa ye.”
10Ye ɛdoavolɛma ne zele ye kɛ, “Saa kɛ ɔde wɔ nrenya nee ɔ ye avinli la ɛdeɛ a, ɛnee noko ɔngyia kɛ nrenya kɛgya raalɛ.”
11Gyisɛse buale kɛ, “Tɛ menli kɔsɔɔti a kɛlie ngilehilelɛ ɛhye kɛdo nu a, ɔwɔ ɛkɛ ɔmaa bɛdabɛ mɔɔ Nyamenle ɛhyehyɛ ɛmaa bɛ la. 12Ɔluakɛ ndenle dɔɔnwo wɔ ɛkɛ ne mɔɔ ɔlua zo mrenya dɔɔnwo ɛnrɛgya mraalɛ a: bie mɔ wɔ ɛkɛ a, bɛvale bɛwole bɛ; bie mɔ, ɔlua menli nwo zo yɛɛ ɔrale ye zɔhane a, yɛɛ bie mɔ noko, Anwuma Belemgbunlililɛ ne ati bɛ nye ɛnlie agyalɛ nwo. Bɛmaa mɔɔ kɛhola ye yɛ la ɛlie ngilehilelɛ ɛhye ɛdo nu.”
Gyisɛse yila ngakula
(Mak 10.13-16; Luk 18.15-17)
13Menli bie vale ngakula rɛlɛle Gyisɛse kɛ ɔva ɔ sa ɔgua bɛ nwo zo na ɔzɛlɛ ɔmaa bɛ, na ɛdoavolɛma ne vale ɛya hwile bɛ nyunlu. 14Na Gyisɛse zele ɛdoavolɛma ne kɛ, “Bɛmmasi ngakula ne mɔ aze, bɛmaa bɛ adenle bɛmaa bɛrɛla me nwo, na Anwuma Belemgbunlililɛ ne le bɛdabɛ mɔɔ bɛle kɛ ɛhye mɔ zɛhae la ɛdeɛ.”
15Gyisɛse vale ɔ sa guale bɛ nwo zo na ɔhɔle.
Kpavolɛ sukoavolɛ ne
(Mak 10.17-31; Luk 18.18-30)
16Kpavolɛ bie rale Gyisɛse ɛkɛ rabizale ye kɛ, “Kilehilevolɛ, duzu debie kpalɛ a ɔwɔ kɛ meyɛ na meanyia ngoane mɔɔ ɛnlɛ awieleɛ la ɛ?”
17Gyisɛse buale ye kɛ, “Duzu ati a ɛlɛbiza me edwɛkɛ mɔɔ fane debie kpalɛ nwo la ɛ? Sonla kokye ala a le kpalɛ a. Saa ɛkpondɛ ngoane a ɛnee di mɛla ne mɔ azo.”
18 #
Ade 20.13-16; Mɛla 5.17-20 Kpavolɛ ne bizale ye kɛ, “Duzu mɛla zɛhae?”
Gyisɛse buale ye kɛ, “Mmaku sonla; mmayɛ awuvolɛvalɛ ɛtane ne; mmawua; mmabɔ adalɛ; 19#Ade 20.12; Mɛla 5.16; Sɛlɛ 19.18 di ɛ ze nee ɛ nli eni, na kulo ɛ gɔnwo kɛ ɛdawɔ ɛ nwo la.”
20Kpavolɛ ne buale kɛ, “Meli mɛla ɛhye mɔ amuala azo, na duzu bieko a ɔwɔ kɛ meyɛ a?”
21Gyisɛse buale ye kɛ, “Saa ɛkpondɛ kɛ ɛdi munli a, ɛnee kɔ na kɔdɔne ninyɛne mɔɔ ɛlɛ la amuala na fa ezukoa ne maa ehyianvolɛma, na ɛkɛnyia anwonyia wɔ anwuma; na akee bɛla bali me nzi.”
22Mɔɔ kpavolɛ ne dele ɛhye la alɔbɔlɛ hunle ye na ɔhɔle, ɔboalekɛ yenyia ɔ nwo kpalɛ.
23Na Gyisɛse zele ye ɛdoavolɛma ne kɛ, “Meka meahile bɛ: Ɔbayɛ se yeamaa sukoavolɛ kɛ ɔkɛnyia Anwuma Belemgbunlililɛ ne. 24Meka meazi zolɛ bieko, ɔnyɛ se ɔmmaa afunlumu kɛ ɔkɛwolo agbuyia nye nu tɛla kɛ sukoavolɛ kɛnyia Nyamenle Belemgbunlililɛ ne a.”
25Mɔɔ ɛdoavolɛma ne dele ɛhye la, ɔzinle bɛ nwo kpole, na bɛbizale ye kɛ, “Ɛnee akee nwane a kɛnyia ngoane a?”
26Gyisɛse nleanle bɛ koonwu na ɔbuale bɛ kɛ, “Ɛhye yɛ se maa sonla, noko Nyamenle ɛdeɛ, debie biala ɛnyɛ se ɛmmaa ye.”
27Pita hanle kɛ, “Nea o, kɛ yɛgyakyi debie biala yɛɛ yɛdoa wɔ ɛ. Duzu a yɛbanyia a?”
28 #
Mat 25.31; Luk 22.30 Gyisɛse zele bɛ kɛ, “Meka meahile bɛ, saa medame Sonla Ra, metɛnla me anyunlunyia belemgbunli ebia ne anu wɔ Ewiade fofolɛ ne anu a, bɛdabɛ bulu nee nwiɔ ye mɔɔ bɛle me ɛdoavolɛma la, bɛkɛdɛnlɛdɛnla arelemgbunli mbia zo na bɛkɛbua Yizilayɛ mbusua bulu nee nwiɔ ne ndɛne. 29Awie biala mɔɔ ɛgyakyi ye azua, ɔ mediema mrenya nee mraalɛ, ɔ mra, ɔ ze, ɔ nli anzɛɛ ye egyinli wɔ me ti la, banyia ye mɔnwo mɔnwo na yeanyia ngoane mɔɔ ɛnlɛ awieleɛ. 30#Mat 20.16; Luk 13.30 Noko akee bɛdabɛ dɔɔnwo mɔɔ kɛkala bɛlumua la bali amozi na bɛdabɛ dɔɔnwo mɔɔ kɛkala bɛli amozi la araze alumua.”
Bible in Nzema © Bible Society of Ghana, 1998.