Sɛlɛ 8
8
Aalɔn nee ɔ mra ne mɔ sɛlɛvolɛ ɛwulalɛ
(Ade 29.1-37)
1Ɛdɛnkɛma zele Mosisi kɛ, 2“Fa Aalɔn nee ɔ mra ne mɔ, adɛladeɛ ne mɔ nee ɛkpokpalɛ nwole ne mɔɔ bɛfa bɛtu sonla bɛmaa Nyamenle la, ɛnlankɛ nyinli mɔɔ bɛfa bɛayɛ ɛtane azubɔdeɛ, mboane nyinli nwiɔ ne, yɛɛ akee kpanwo mɔɔ mgbɔvonle ɛnle nu la kɛndɛne ko ne. 3Boɔboa menli ne kɔsɔɔti anloa wɔ Ɛdɛnkɛma Ndanlɛ Sua ne anlenkɛ ne anloa.”
4Mosisi yɛle mɔɔ Ɛdɛnkɛma zele ye la, na menli ne amuala rayiale Ɛdɛnkɛma Ndanlɛ Sua ne anlenkɛ ne anloa. 5Na Mosisi hanle hilele menli ne kɛ, “Debie mɔɔ Ɛdɛnkɛma ɛze me kɛ menyɛ la ɛne.”
6Akee Mosisi vale Aalɔn nee ɔ mra ne mɔ rale, na ɔvale nzule ɔbiale bɛ. 7Ɔvale Sɛlɛvolɛ Kpanyinli tɛladeɛ ɔwulale Aalɔn, na ɔvale tabule ne ɔhyele zo, ɔvale tɛladeɛ aguzo ne ɔkpolole ye, ɔvale yifɔdo ne ɔwulale ye na ɔvale ye akyeso ne mɔɔ bɛnwo ye kɛnlɛma bie la ɔhyele zolɛ. 8Akee ɔvale akɛnrazo aguzo ne ɔwulale ye na ɔvale “Yulem” ne nee “Tɛmem” ne ɔguale nu. 9Akee ɔvale ɛdanlɛ abɔtile ne ɔbɔle ye na ɔvale ezukoa nvutuke ɔbɔle abɔtile ne anyunlu, kɛmɔ Ɛdɛnkɛma zele Mosisi la, ɔle belemgbunli kyɛlɛ mɔɔ anwo te a.
10Akee Mosisi vale ɛkpokpalɛ nwole ne na ɔvale bie ɔguale Ɛdɛnkɛma Ndanlɛ Sua ne azo, nee debie biala mɔɔ wɔ sua ne anu la azo, ɔdule bɛ muala ɔmanle Nyamenle. 11Ɔvale bie ɔkpondenle azukponle ne anwo fane nsuu, ɔvale bie ɔkpondenle ahyɛnze nee ninyɛne mɔɔ bɛfa bɛyɛ gyima wɔ azukponle ne azo la anwo ɔdule bɛ ɔmanle Nyamenle. 12Ɔwolale bie ɔguale Aalɔn ati zo, na ɔdule ye ɔmanle Nyamenle. 13Mosisi vale Aalɔn amra mrenya ne mɔ rale, ɔwulale bɛ sɛlɛvolɛ adɛladeɛ, ɔvale ndabule ne mɔ ɔhyehyele zo na ɔzoale bɛ ahyɛlɛ, kɛmɔ Ɛdɛnkɛma zele la.
14Akee ɔvale ɛnlankɛ nyinli ɛtane azubɔdeɛ ne ɔrale, na Aalɔn nee ɔ mra ne mɔ vale bɛ sa guale ɛnlankɛ ne ati zo. 15Mosisi hunle ye na ɔvale mogya ne, ɔvale ɔ sa. ɛrɛlɛsɛka ɔbɔle nu na ɔvale ɔpepenle azukponle ne abati kpokpɔkoo ne mɔ mɔɔ gyigyi zolɛ la azo ɔyiale, ɔvale ɔnluanle azukponle ne, na akee ɔwolale mogya ne mɔɔ hale la ɔguale azukponle ne abo ne anwo, ɔdule ɔmanle Nyamenle ɔyɛle mgbɔdalɛ nzɛlɛlɛ ɔmanle ye. 16Akee Mosisi yeyele azubɔdeɛ ne akunlu ɛnlome ne, ye ɛzizira nwiɔ ne nee ye ɛbolɛ ne nee nwolɛ ninyɛne ne amuala, na ɔyelale bɛ wɔ azukponle ne azo. 17Na ɛnlankɛ ne nane ne, ye nwoma ne nee ɔ kunlu ninyɛne ne mɔ amuala, Mosisi yelale bɛ wɔ azokoɛleɛ ne kandiba, kɛmɔ Ɛdɛnkɛma zele la.
18Akee Mosisi vale boane nyinli ɛyelalɛ azubɔdeɛ ne rale, na Aalɔn nee ɔ mra ne mɔ vale bɛ sa guale ɔ ti zo. 19Mosisi hunle boane ne na ɔdole ye mogya ne ɔguale azukponle ne anwo amuala ɔyiale. 20Bɛbiale boane ne bɛwiele la, Mosisi yelale boane ne ati ne nee nane azinli ne mɔɔ bɛpepɛ la nee ɔ kunlu ɛnlome ne. 21Akee bɛvale nzule bɛnrinzinle nane ne ndwɛlɛ ne nee ɔ kunlu ninyɛne ne mɔ anwo na Mosisi yelale boane mumua ne amuala wɔ azukponle ne azo, kɛ ɛyelalɛ azubɔdeɛ. Ɔbɔ evuanlɛ, na ɔle azu mɔɔ bɛfa senle bɛbɔ bɛmaa Ɛdɛnkɛma, kɛmɔ Ɛdɛnkɛma zele Mosisi la.
22Akee Mosisi vale boane nyinli ko ne, mɔɔ le sɛlɛvolɛwulalɛ boane ne rale, na Aalɔn nee ɔ mra ne mɔ vale bɛ sa guale boane nyinli ne ati zo. 23Mosisi hunle boane ne na ɔvale ye mogya ne bie ɔhanle Aalɔn anzo fema ne ati, ɔ sa fema kokotile yɛɛ ɔ gyakɛ fema kokotile ne mɔ azo. 24Akee bɛvale Aalɔn amra ne mɔ bɛrale, na Mosisi vale mogya ne bie hanle bɛ nzo fema ne mɔ ati, bɛ sa nee bɛ gyakɛ fema ahohotile ne mɔ azo na akee ɔdole mogya ne ɔguale azukponle ne anwo amuala ɔyiale. 25Akee Mosisi vale nane ɛnlome ne, ɔ dua dɔlera ne, ɛnlome ne mɔɔ wɔ ɔ kunlu ninyɛne ne mɔ anwo la, ye ɛbolɛ nwo ninyɛne, ye ɛzizira nwiɔ ne nee nwolɛ ɛnlome ne, yɛɛ nane ne ɛzɔlɛ fema ne. 26Akee Mosisi yele angye kpanwo tɛtɛlɛ ko, angye belɛde mɔɔ nwole wɔ nu la ko, yɛɛ kpanwo ɛdɛbaa kulukulu ko, wɔ angye kpanwo kɛndɛne ko ne mɔɔ gyi Ɛdɛnkɛma anyunlu ɛkɛ la anu na ɔvale ɔguale nane ɛnlome ne nee ɛzɔlɛ fema ne azo, 27na ɔvale ɔwulale Aalɔn nee ɔ mra ne mɔ asa anu, na ɔdole ninyɛne ne mɔ ehono, kɛ ɔle ehono azubɔdeɛ ɔmaa Ɛdɛnkɛma. 28Akee Mosisi liele ninyɛne ne bɛ sa nu na ɔvale ɔbokale ɛyelalɛ azubɔdeɛ ne ɔyelale bɛ muala wɔ azukponle ne azo, kɛ sɛlɛvolɛwulalɛ azubɔdeɛ mɔɔ bɛfa senle bɛbɔ ye azu evuanlɛ bɛmaa Ɛdɛnkɛma. 29Na Mosisi vale azubɔdeɛ ne akɛnra azo ne dole ye ehono kɛ ɔle ehono azubɔdeɛ ɔmaa Ɛdɛnkɛma; Mosisi afoa nu ɛdeɛ mɔɔ wɔ azubɔlɛ boane ne anu la a le ɛhye, kɛmɔ Ɛdɛnkɛma zele la.
30Akee Mosisi vale nwole ne na ɔvale mogya ne mɔɔ wɔ azukponle ne azo la bie ɔkpotole nuhua na ɔvale ɔkpondenle Aalɔn anwo nee ye adɛladeɛ ne mɔ anu. Ɔvale bie ɔkpondenle ɔ mra ne mɔ anwo na ɔvale bie ɔkpondenle bɛ adɛladeɛ ne mɔ anu. Yemɔti ɔbɔle Aalɔn nee ye adɛladeɛ yɛɛ ɔ mra mrenya ne mɔ nee bɛ adɛladeɛ ne mɔ nu ɔdule bɛ ɔmanle Nyamenle.
31Na Mosisi zele Aalɔn nee ɔ mra ne mɔ kɛ, “Bɛdo nane ne wɔ Ɛdɛnkɛma Ndanlɛ Sua ye anuhɔlɛ lɔ, na bɛli bɛboka kpanwo ne mɔɔ wɔ kɛndɛne ne mɔɔ sɛlɛvolɛwulalɛ azubɔlɛ ninyɛne ne mɔ wɔ nu la, kɛmɔ menzele bɛ la kɛ, ‘Aalɔn nee ɔ mra ne mɔ a bali a.’ 32Nane ne nee kpanwo ne mɔ mɔɔ kɛha la bɛyela bɛ. 33Bɛmmabɔ bɛtɛla Ɛdɛnkɛma Ndanlɛ Sua ye anuhɔlɛ ne dedee kenle nsuu, kɔkpula mekɛ ne mɔɔ bɛfa bɛadu bɛ bɛamaa Nyamenle la kɛwie la, ɔluakɛ bɛfa kenle nsuu a bɛadu bɛ bɛamaa Nyamenle a. 34Kɛmɔ yɛyɛ ye ɛnɛ la, zɔhane ala yɛɛ Ɛdɛnkɛma ɛhyehyɛ kɛ bɛyɛ mgbɔdalɛ nzɛlɛlɛ bɛmaa bɛ a. 35Bɛdɛnla Ɛdɛnkɛma Ndanlɛ Sua ne anuhɔlɛ ne nɔɔzo nee ewiazo kenle nsuu, bɛyɛ mɔɔ Ɛdɛnkɛma ɛze bɛ la, anrɛɛ bɛkɛwu, ɔluakɛ zɔhane ala yɛɛ Ɛdɛnkɛma ɛze me a.” 36Na Aalɔn nee ɔ mra ne mɔ yɛle ninyɛne mɔɔ Ɛdɛnkɛma luale Mosisi anwo zo zele bɛ la kɔsɔɔti.
Currently Selected:
Sɛlɛ 8: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
