Sɛlɛ 11
11
Nane mɔɔ ɔwɔ kɛ bɛdi la
(Mɛla 14.3-21)
1Akee Ɛdɛnkɛma zele Mosisi nee Aalɔn kɛ, 2“Bɛha bɛhile Yizilayɛma kɛ, Ninyɛne mɔɔ lɛ ngoane kɛ nane nane, mɔɔ ɔwɔ kɛ bɛdi la, bɛmɛ ɛne: 3Debie biala mɔɔ bɛkpakye ye ndwɛlɛ taboa ne anu nwiɔ na ɔkpu ɔkposa la, bɛli. 4-6Noko ɛhye mɔ mɔɔ kpu kposa anzɛɛ bɛkpakye bɛ ndwɛlɛ ndaboa ne mɔ anu la, ɔnle kɛ bɛdi. Ɔnle kɛ bɛdi afunlumu, abotokila, yɛɛ asoaso, ɔboalekɛ bɛkpu bɛkposa ɛdeɛ, noko bɛamkpakye bɛ ndwɛlɛ ndaboa ne mɔ anu. Bɛ nwo ɛnde. 7Bɛmmadi kpolike, ɔboalekɛ bɛkpakye ye ndwɛlɛ ndaboa ne anu ɛdeɛ, noko ɔmkpu ɔmkposa. Ɔ nwo ɛnde ɛmmaa bɛ. 8Bɛmmadi bɛ nane ne yɛɛ bɛmmafa bɛ sa bɛka bɛ avunli bɔbɔ, ɔluakɛ bɛ nwo ɛnde ɛmmaa bɛ.
9“Bɛkola bɛdi fɛlɛ biala mɔɔ wɔ azule nu na ɔlɛ ɔ nzi ngyɛnengyɛne na ɔ nwo lɛ abonle la. 10Na fɛlɛ biala mɔɔ wɔ azule nu na ɔnlɛ ɔ nzi ngyɛnengyɛne na ɔ nwo ɛnlɛ abonle la, bɛmmadi. Bɛ nwo ɛnde ɛmmaa bɛ; bɛle kyibadeɛ. 11Mekɛ biala bɛle kyibadeɛ; bɛmmadi yɛɛ bɛmmafa bɛ sa bɛka bɛ avunli. 12Debie biala mɔɔ wɔ azule nu mɔɔ ɛnlɛ ɔ nzi ngyɛnengyɛne anzɛɛ ɔ nwo ɛnlɛ abonle la le kyibadeɛ maa bɛ.
13-19“Nloma ɛhye mɔ noko le kyibadeɛ maa bɛ. Bɛmmadi bie: kɔleɛ, ɛkpɔtɛ, bɔngɔ, sanzia, kyɛnyema nee ye ɛsaso, kɔkɔsɛlɛ biala nee ye ɛsaso, soholo, kpadule, akoso, azuazuanloma, ahweanga, yɛɛ akpanlɛ.
20“Kɛkɛba biala mɔɔ lɛ ndɛbalɛ na ɔtia egyakɛ nna azo la le kyibadeɛ maa bɛ. 21Noko kɛkɛba biala mɔɔ lɛ ndɛbalɛ na ɔtia egyakɛ nna azo, na eza ɔlɛ egyakɛ nwiɔ bieko wɔ ɔ nzi egyakɛ ne mɔ azo, mɔɔ ɔkola ɔfa ɔwulu la, bɛkola bɛdi. 22Yemɔti bɛkola bɛdi abɛbɛ nee ye ɛsaso, kɛlatua nee ye ɛsaso, yɛɛ bɛnyebɛnye nee ye ɛsaso. 23Na ngɛkɛba mɔɔ ɛha mɔɔ lɛ ndɛbalɛ nee egyakɛ nna la kɔsɔɔti le kyibadeɛ.
24-28“Awie biala mɔɔ kɛva ɔ sa kɛha nane ɛhye mɔ bie funli la, evinli baha ye toonwo nɔsolɛ nu: nane biala mɔɔ lɛ ndwɛlɛ ndaboa mɔɔ bɛamkpakye nu noko ɔkpu ɔkposa, yɛɛ nane biala mɔɔ lɛ ɛweɛlɛ na ye ndwɛlɛ nna la, ɔwɔ kɛ awie biala mɔɔ kɛzɔ bie funli nu la kpo ye adɛladeɛ ne mɔ, noko evinli ne mɔɔ ɛha ye la bawoa ɛkɛ ne toonwo nɔsolɛ nu.
29-30“Ninyɛne mɔɔ kola fo anwuma mɔɔ anwo ɛnde na ɔnle kɛ bɛdi la a le ɛhye mɔ: abotokila, kila, kekelebetile nee ye ɛsaso, ɛbɔlɔme, ɛlɛnrɛne, bonze, awudabɛ anzɛɛ ahulukpu, yɛɛ bɔmɔnra. 31Bɛ nwo ɛnde ɛmmaa bɛ; awie biala mɔɔ kɛva ɔ sa kɛha bie funli la, evinli baha ye toonwo nɔsolɛ nu. 32Saa bie wu, na debie biala mɔɔ ɔkɛdɔ zolɛ la, saa baka o, ɛdanlɛ o, nwoma o, kodoku o, debie biala mɔɔ bɛfa bɛyɛ debie a ɔyɛ boɛ la, ɛnee deɛ zɔhane, evinli ɛha ye; ɔwɔ kɛ bɛwula ye nzule nu, na nwolɛ ɛnrɛde toonwo nɔsolɛ na nwolɛ ade. 33Saa bie funli tɔ ɛyɛba anzɛɛ dwora nu a, ɛnee evinli ɛha ye; ɔwɔ kɛ bɛbɔ ɛyɛba ne anzɛɛ dwora ne. 34Aleɛ biala mɔɔ bɛdi a ɔyɛ boɛ, na bɛkɛwola ɛyɛba ne anzɛɛ dwora ne anu nzule bɛkɛgua zolɛ la, ɛnee evinli ɛha ye. Nzule bɔbɔ mɔɔ wɔ dwora anzɛɛ ɛyɛba ne anu mɔɔ ɔwɔ kɛ bɛno la, ɛnee evinli ɛha ye. 35Debie biala mɔɔ bie funli ɛleka bie bɔbɔ kɛdɔ zolɛ la, ɛnee evinli ɛha ye; saa fonlomo o, anzɛɛ mokyea o, ɔwɔ kɛ bɛbubu ye. Bɛ nwo ɛnde, yemɔti bɛ nwo ɛnde ɛmmaa bɛ 36Noko akee nzubula anzɛɛ nzule mɔɔ se la, bɛmɛ, evinli ɛnga bɛ. Na debie biala mɔɔ anwo kɛha bɛ avunli la, ɛnee evinli ɛha ye. 37Saa bie funli tɔ ma mɔɔ bɛkɛlua la azo a, evinli ɛnga ye. 38Na saa bɛgua nzule ma ne azo na bie funli foa ko bie tɔ zolɛ a, nwolɛ ɛnde ɛmmaa bɛ.
39“Saa nane biala mɔɔ bɛdi la bie wu na ɛdawɔ mɔɔ ɛkɛva ɛ sa ɛkɛha ye la, evinli baha wɔ toonwo nɔsolɛ nu. 40Awie mɔɔ kɛli nane funli ne bie la, evinli baha ye toonwo nɔsolɛ nu; yɛɛ eza ɔwɔ kɛ ɔkpo ye adɛladeɛ ne mɔ, yɛɛ evinli baha ye toonwo nɔsolɛ nu.
41“Debie biala mɔɔ kola fo anwuma wɔ ewiade ye anu la le kyibadeɛ maa bɛ. Ɔnle kɛ bɛdi. 42Debie biala mɔɔ twenle ɔ nwo aze anzɛɛ nane ekyi biala mɔɔ tia ndwɛlɛ nna azo anzɛɛ lɛ egyakɛ dɔɔnwo, debie biala mɔɔ kola fo anwuma wɔ azɛlɛ ye azo la, bɛmmadi, ɔluakɛ bɛle kyibadeɛ. 43Ɔnle kɛ bɛdi ninyɛne ɛhye mɔ anzi, bɛdi bie na bɛyɛ kyibadeɛ. Eza ɔnle kɛ bɛtoa bɛ bɛmaa evinli ka bɛ. 44#Sɛlɛ 19.2; 1 Pit 1.16 Ɔluakɛ medame a mele Ɛdɛnkɛma bɛ Nyamenle ne a. Bɛmaa bɛ nwo ɛde nwuanzaanwu, ɔluakɛ mele nwuanzanwuanza. Ɔnle kɛ bɛfa debie biala mɔɔ kola fo anwuma na eza ɔtwenle ɔ nwo aze wɔ azɛlɛ ye azo la bɛgua bɛ nwo evinli. 45Ɔluakɛ medame a mele Ɛdɛnkɛma mɔɔ menyele bɛ menvile Yigyibiti azɛlɛ zo a, amaa meayɛ bɛ Nyamenle. Yemɔti bɛmaa bɛ nwo ɛde nwuanzaanwu, ɔluakɛ mele nwuanzanwuanza.”
46Ɛhye a le mɛla mɔɔ fane nane, nloma nee debie biala mɔɔ lɛ ngoane na ɔwɔ nzule nu nee debie biala mɔɔ kola fo anwuma wɔ azɛlɛ ye azo la anwo a. 47Mɛla ne kile ninyɛne mɔɔ anwo te nee mɔɔ anwo ɛnde, nee debie biala mɔɔ lɛ ngoane mɔɔ ɔwɔ kɛ bɛdi nee mɔɔ ɔnle kɛ bɛdi la.
Currently Selected:
Sɛlɛ 11: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
