Mɔl 46
46
Gyekɔbo nee ye abusua ne kɔ Yigyibiti
1Yemɔti Yizilayɛ vale mɔɔ ɔlɛ la amuala na ɔzile nu kɛ ɔkɔ. Ɔhɔdwule Biyɛhyiba la, ɔbɔle azu ɔmanle ɔ ze Ayezeke Nyamenle ne. 2Na nɔe ne Nyamenle dendɛle hilele ye wɔ ɛnyelɛzodeɛnwunlɛ nu, na ɔzele ye kɛ, “Gyekɔbo, Gyekɔbo!”
Gyekɔbo liele zolɛ kɛ, “Mewɔ ɛke.”
3Na Nyamenle zele ye kɛ, “Medame Nyamenle, mɔɔ le ɛ ze mɔ Nyamenle ne la ɔ. Mmasulo kɛ ɛkɛhɔ Yigyibiti, ɔluakɛ mebayɛ wɔ maanle wɔ ɛkɛ ne. 4Me nee wɔ bahɔ Yigyibiti, na eza meava wɔ meazia meara. Dwosefi banwu wɔ ewule nu.”
5Na Gyekɔbo zile nuhua wɔ Biyɛhyiba. Yizilayɛ amra ne mɔ vale bɛ ze, bɛ mra, nee bɛ mraalɛ ne mɔ guale ehwili ne mɔ mɔɔ Yigyibiti belemgbunli ne manle bɛvale bɛrale la anu. 6#Gyi 7.15 Eza bɛvale bɛ nlankɛ nee bɛ ninyɛne mɔɔ bɛnyianle wɔ Keena azɛlɛ zo la amuala bɛhɔle Yigyibiti. Gyekɔbo nee ɔ bo zo amra kɔsɔɔti; 7ɔ mra mrenya, ɔ mra mrenya amra mrenya, ɔ mra mraalɛ nee ɔ mra mrenya amra mraalɛ, ɔ nee bɛ kɔsɔɔti hɔle Yigyibiti.
8Gyekɔbo abo zo amra mɔɔ ɔ nee bɛ hɔle Yigyibiti la ɛne: Gyekɔbo nee ɔ mra ne mɔ. Akee ɔ ra nrenya kpanyinli Wulubɛn 9amra mrenya: Heenɔko, Palu, Hɛzelɔn, yɛɛ Kaamae. 10Semɛyɔn amra mrenya: Gyɛmuwɛle, Gyeemen, Ohade, Gyeeken, Zohaa, yɛɛ Hyɔɔlo mɔɔ ɔ nli le Keenanli la. 11Livae amra mrenya: Gɛhyɔn, Kohate, yɛɛ Mɛlɛlae. 12Dwuda amra mrenya: Ɛɛ, Onan, Hyila, Pɛlɛze, yɛɛ Zilaa. (Ɛɛ nee Onan wule Keena.) Pɛlɛze amra mrenya a le Hɛzelɔn nee Hamɛle. 13Yesakaa amra mrenya: Tola, Pua, Gyahyɛbe, yɛɛ Hyemelɔn. 14Zɛbulɛn amra mrenya: Silɛde, Yilɔn, yɛɛ Gyaalile. 15Ɛhye mɔ a le mralɛ mrenya mɔɔ Gyekɔbo nee ɔ ye Liya wole bɛ wɔ Mɛsɔpɔteemea a. Bɛ ra raalɛ a le Daena. Ɛka bɛ muala ɛbɔ nu a, ɛnee mralɛ nee nlɔnra mraalɛ nee mrenya mɔɔ Gyekɔbo luale ɔ ye Liya anwo zo nyianle la le abulasa nee nsa.
16Gaade amra mrenya: Zɛfɔn, Hagae, Hyunae, Ɛzebɔn, Yilae, Alɔdae, yɛɛ Alilae. 17Ahya amra mrenya: Yemena, Yehyeva, Yehyevae, Bɛlaya, yɛɛ bɛ diema raalɛ Sɛla. Bɛlaya amra mrenya a le Hibɛ nee Malekeɛle. 18Liya sonvolɛ raalɛ Zelepa abo zo amra ne mɔɔ ɔ nee Gyekɔbo nyianle la le bulu nee nsia.
19Gyekɔbo aye Relahyɛle amra mrenya a le Dwosefi nee Bɛngyaman. 20#Mɔl 41.50-52 Dwosefi amra mrenya mɔɔ ɔwole bɛ wɔ Yigyibiti azɛlɛ zo la a le Manasɛ nee Yifelaem. Bɛ nli a le Hɛleɔpɔlese kɔmenle Pɔtefɛla ara raalɛ Asɛnate. 21Bɛngyaman amra mrenya: Bila, Bikɛ, Ahyebɛle, Gila, Neeyaman, Yihae, Wulohye, Mɛpem, Hɛpem, yɛɛ Aade. 22Gyekɔbo nee ɔ ye Relahyɛle abo zo amra ne le bulu nee nna.
23Dan ara nrenya a le Huhyem. 24Nafetalae amra mrenya: Gyaazili, Gunae, Gyizɛ, yɛɛ Hyelɛm. 25Relahyɛle sonvolɛ raalɛ Belehaa, mɔɔ Leeban vale manle ye la abo zo amra mɔɔ ɔ nee Gyekɔbo nyianle la ɛne.
26Menli mɔɔ Gyekɔbo nee bɛ hɔle Yigyibiti, mɔɔ le ɔdaye ɔ bo zo amra fɔɔnwo la, saa ɛye ɔ mra mrenya ne mɔ mraalɛ ne mɔ nu a, bɛlua menli abulasia nee nsia. 27Dwosefi amra mɔɔ ɔwole bɛ wɔ Yigyibiti la le nwiɔ; Gyekɔbo sua nu amra amuala mɔɔ ɔ nee bɛ hɔle Yigyibiti la le abulasuu.
Gyekɔbo nee ye abusua ne wɔ Yigyibiti
28Akee Gyekɔbo zoanle Dwuda kɛ ɔhɔbɔ Dwosefi amaneɛ kɛ ɔ nee ye ɛyia Gohyɛn, na bɛhɔdwule Gohyɛn. 29Na Dwosefi boɔboale ɔ nwo ɔvole ye konle ehwili nu ɔhɔyiale ɔ ze Gyekɔbo wɔ Gohyɛn. Ɔvale ɔ nwo ɔhilele ɔ ze, na ɔdule ɔdɔle ɔ kɔme nu ɔzunle ɔguale ɔ nwo ɔhyɛle kpalɛ. 30Na Gyekɔbo hanle kɛ, “Kɛkala mɔɔ menwu ɛ nyunlu na menwu kɛ ɛtɛte ngoane nu la, mewu bɔbɔ a ɔnyɛ ɛhwee.”
31Dwosefi hanle hilele ɔ ze nee ɔ mediema ne mɔ kɛ, “Mekɔ belemgbunli ne ɛkɛ meahɔbɔ ye amaneɛ kɛ, ‘Me mediema mrenya ne mɔ nee egya sua nu amra mɔɔ anrɛɛ wɔ Keena la ɛra me nwo ɛke. 32Mebaha kɛ menli ne le mboaneneavolɛma, ɔluakɛ bɛsie nlankɛ; na bɛva bɛ mboane nee bɛ nlankɛ, nee bɛ debie biala mɔɔ bɛlɛ la bɛra.’ 33Na saa belemgbunli ne fɛlɛ bɛ na ɔbiza bɛ kɛ, ‘Duzu gyima a bɛyɛ a?’ 34bɛha kɛ, ‘Wɔ sonvolɛma sie nlankɛ, na yemɔ a le gyima mɔɔ sumunli yɛ ngakula nu yɛ nee egya yɛyɛ toonwo mɔɔ yeradwu ɛnɛ a.’ Saa bɛka ye zɔhane a yɛɛ bɛbamaa bɛadɛnla Gohyɛn a, ɔluakɛ mboaneneavolɛ biala le kyibadeɛ maa Yigyibitima.”
Currently Selected:
Mɔl 46: NB
Highlight
Share
Compare
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
