Ade 15
15
Mosisi edwɛne ne
1Akee Mosisi nee Yizilayɛma dole edwɛne ɛhye yeyɛle Ɛdɛnkɛma:
“Mebado edwɛne meayeyɛ Ɛdɛnkɛma,
ɔluakɛ yeli konim anyunlunyia nu;
ɛkpɔnwɔ nee ye kavolɛ ne,
yevuandi bɛ yegua nyevile nu.
2Ɛdɛnkɛma le me anwosesebɛ nee me edwɛne,
yɛɛ yeyɛ me ngoanedievolɛ.
Me Nyamenle ne ɛne, mebaye ye ayɛlɛ,
me ze Nyamenle ne, mebayeyɛ ye.
3Ɛdɛnkɛma le ɛlɔnenli;
ye duma a le Ɛdɛnkɛma.
4“Yigyibiti belemgbunli ne konle ehwili nee ye ɛlɔnema,
yevuandi bɛ yegua nyevile nu;
ye safohyenlema kpalɛ ne,
Ndɔ Nyevile ne ɛva bɛ.
5Azuyilɛ ne ɛheda bɛ nwo zo;
bɛnlomanle azule bo kɛ bolɛ.
6“O Ɛdɛnkɛma, ɛ sa fema le tumi kpole;
O Ɛdɛnkɛma, ɛ sa fema bubu kpɔvolɛ.
7Wɔ wɔ konimlilɛ kpole nu,
ɛfuandi wɔ kpɔvolɛma ɛgua;
ɛmaa wɔ ɛya dwu aze, yela bɛ kɛ ndile.
8Wɔ ɛnwomenle ko pɛ
manle nyevile ne dwazole bolonwonwo,
azuyilɛ ne hɔle anwuma yɛle kɛ bane;
azule buma ne bɔle kunguma.
9Kpɔvolɛ ne hanle kɛ,
‘Meti bɛ, mekye bɛ;
mekyɛ bɛ nwo ninyɛne, meadu me ahunlundwolɛ ɛdeɛ;
metwe me dadeɛ ne, meabɔ bɛ bo zo.’
10Ɛmanle anwoma dule, nyevile ne monlanle bɛ;
bɛnlomanle kɛ sumi wɔ azubuma ne anu.
11“O Ɛdɛnkɛma, nwane a le kɛ ɛdawɔ
wɔ awozonle avinli a?
Nwane a le kɛ wɔmɔ, mɔɔ le kpole
wɔ nwuanzanwuanzayɛlɛ nu,
ye ayɛlɛyelɛ le kpole
na ɔyɛ nwanwane ninyɛne a?
12Ɛmanle ɛ sa fema zo,
na azɛlɛ menle bɛ.
13Wɔ anwunvɔnezelɛ ne ati,
wɔli menli mɔɔ wɔlie bɛ ngoane la ati;
wɔva wɔ tumi ne wɔzinza bɛ
ɛ nee bɛ ɛra wɔ ɛleka nwuanzanwuanza ne.
14Maanle maanle ɛde, bɛsulo;
ɛzulolɛ ɛha Filisitiama.
15Akee Yidɔm arelemgbunli ahonle ɛdu;
Mowabe katakyiema anwo ɛlɛwozo bɛ;
Keena maanlema amuala ɛnwenwe.
16Ɛzulolɛ nee ahunlundetelɛ tɔ bɛ nwo;
wɔ tumi ne kpole ti, bɛnga bɛ nwo fee,
bɛyɛle kɛ awolɛ kɔkpula kɛ, O Ɛdɛnkɛma,
wɔ menli ne mɔɔ wɔkpɔne bɛ la ɛpɛ nu.
17O Ɛdɛnkɛma, ɛbava bɛ wɔara,
na wɔalua bɛ wɔ wɔ boka ne azo,
ɛleka mɔɔ wɔziezie kɛ ɛbadɛnla,
wɔ wɔ Ɛzonlenlɛ Sua ne mɔɔ ɛdawɔ wɔzi la anu.
18Ɛdɛnkɛma bali belemgbunli
wɔ melɛ mɔɔ ɛnlɛ awieleɛ.”
Meleam edwɛne ne
19Yigyibiti belemgbunli ne mgbɔnwɔ, ye konle ehwili ne mɔ, nee ye menli mɔɔ ka mgbɔnwɔ la hɔle nyevile ne anu la, Ɛdɛnkɛma manle nyevile ne hedale bɛ nwo zo; na Yizilayɛma ne mɔ luale nyevile ne anu azɛlɛ resee zo hɔle.
20Na Nyamenle kpɔmanvolɛ raalɛ Meleam, Aalɔn adiema raalɛ ne vale akɛya, na mraalɛ ne mɔ kɔsɔɔti doale ye, wozole akɛya, zile agole.
21Meleam dole edwɛne manle bɛ kɛ:
“Bɛdo edwɛne bɛyeyɛ Ɛdɛnkɛma,
ɔluakɛ yeli konim anyunlunyia nu;
ɛkpɔnwɔ nee ye kavolɛ ne,
yevuandi bɛ yegua nyevile nu.”
Nzule ɛnwonle ne
22Akee Mosisi lile Yizilayɛma ati ɔ nee bɛ vi Ndɔ Nyevile ne anloa hɔle Hyɔɔ fienemgbole ne anu. Bɛdiale toonwo kenle nsa, na bɛannwu nzule nwo. 23Mɔɔ bɛradwule Mɛɛla#15.23 Mɛɛla: ɔ bo a le “Ɛnwonle.” la, bɛangola ɛkɛ ne nzule no, ɔboalekɛ nzule ne yɛ ɛnwonle; yemɔti bɛvɛlɛle ye Mɛɛla. 24Na menli ne dendɛle bɛ nzo abo tiale Mosisi zele kɛ, “Duzu a yɛno a?” 25Mosisi zɛlɛle Ɛdɛnkɛma, na Ɛdɛnkɛma hilele ye baka bie, ɔvuandinle baka ne ɔdole nzule ne anu, na nzule ne yɛle nzukpa.
Ɛdɛnkɛma manle bɛ mɛla nee ngyehyɛlɛ na ɔzɔle bɛ ɔnleanle. 26Ɔzele bɛ kɛ, “Saa bɛtie medame Ɛdɛnkɛma, bɛ Nyamenle ne me ne, bɛyɛ debie mɔɔ sɔ me nye, bɛdi me mɛla nee me ngyehyɛlɛ ne mɔ azo a, ewule ngakyile mɔɔ memanle ɔrale Yigyibitima anwo zo la, menrɛmaa bie ɛnrɛra bɛ nwo zo; ɔluakɛ medame a mele Ɛdɛnkɛma mɔɔ metondo bɛ ewule a.”
27Akee bɛrale Yilem, nzufeanvea bula bulu nee nwiɔ nee mrɛlɛ abulasuu wɔ ɛkɛ, na bɛyɛle azokoɛleɛ wɔ nzule ne mɔ anloa.
Currently Selected:
Ade 15: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
