Ade 13
13
Bɛtu belamunli mralɛ bɛamaa Ɛdɛnkɛma
1Ɛdɛnkɛma zele Mosisi kɛ, 2#Luk 2.23 “Tu belamunli mralɛ kɔsɔɔti maa me, sonla o, nane o, biala mɔɔ kɛlumua kɛkpakye awodeɛ wɔ Yizilayɛ maanle nu la le me ɛdeɛ.”
Angye Ɛvoyia ne
3Na Mosisi hanle hilele menli ne kɛ, “Bɛhakye ɛnɛ kenle ko ye, ɔle kenle mɔɔ bɛvile Yigyibiti, na bɛvile akɛlɛzonlenlɛ nu la, ɔluakɛ Ɛdɛnkɛma luale tumi kpole zo a ɔyele bɛ ɔvile ɛkɛ a. Bɛmmadi kpanwo mɔɔ mgbɔvonle wɔ nu la. 4Ɛnɛ kenle ye, siane Ebebe ye anu yɛɛ bɛlɛkɔ a. 5Na saa Ɛdɛnkɛma fa bɛ dwu Keena mɔɔ le Hɛtema, Amɔlema, Haevaema, yɛɛ Gyibɛsema azɛlɛ ne mɔɔ ɔvale ɔbɔle bɛ ze mɔ ɛwɔkɛ, na ɔle azɛlɛ kɛnlɛma mɔɔ kye aleɛ la azo a, bɛli ɛvoyia ɛhye wɔ siane ɛhye anu. 6Bɛli kpanwo mɔɔ mgbɔvonle ɛnle nu la kenle nsuu, ye kenle nsuu ne azo bɛli ɛvoyia ne bɛwula Ɛdɛnkɛma anyunlunyia. 7Bɛbali kpanwo mɔɔ mgbɔvonle ɛnle nu la kenle nsuu; ɔnle kɛ bɛnwu mgbɔvonle wɔ bɛ nwo wɔ maanle ye kɔsɔɔti anu. 8Kenle ko ne bɛha bɛhile bɛ mra mrenya ne mɔ kɛ, ‘Debie mɔɔ Ɛdɛnkɛma yɛle manle me wɔ mekɛ mɔɔ menvile Yigyibiti la ati ɔ.’ 9Na ɔbayɛ kɛ sɛkɛlɛneɛ mɔɔ wɔ bɛ sa anwo na yeayɛ kɛ ngakyedeɛ wɔ bɛ nwoma azo, amaa Ɛdɛnkɛma mɛla ne ala bɛ nloa, ɔluakɛ ɔlua tumi kpole zo, Ɛdɛnkɛma ɛye bɛ ɛvi Yigyibiti. 10Yemɔti bɛzie maamɛla ɛhye ɛvolɛ biala wɔ ye mekɛ ne anloa.
Belamunli mralɛ
11“Na saa Ɛdɛnkɛma fa bɛ dwu Keena azɛlɛ ne mɔɔ ɔvale ɔbɔle bɛ nee bɛ ze mɔ ɛwɔkɛ la azo, na ɔfa ɔmaa bɛ a, 12debie biala mɔɔ kɛlumua kɛkpakye awodeɛ la bɛdu bɛzie ahane bɛmaa Ɛdɛnkɛma. Ɛnlankɛ biala ara nyinli mɔɔ lumua la le Ɛdɛnkɛma ɛdeɛ. 13Asoaso biala ara mɔɔ lumua la, bɛbava boane ralɛ bɛahakyi ye, na saa ɔ menle ɛngulo kɛ ɔkɛhakyi ye a ɛnee ɔwɔ kɛ bɛbu ɔ kɔme. Ɔwɔ kɛ bɛkpɔne belamunli ralɛ nrenya biala. 14Saa kenle bie bɛ mra biza bɛ kɛ, ‘Ɛhye abo a le duzu?’ a, bɛha bɛhile bɛ kɛ, ‘Ɛdɛnkɛma vale tumi kpole a yele yɛ vile Yigyibiti wɔ akɛlɛzonlenlɛ nu a. 15Ɔluakɛ mɔɔ Yigyibiti belemgbunli ne zile ye ahonle yɛle dapele na ɔdule ɔ gye kɛ ɔnrɛmaa yɛnrɛhɔ la, Ɛdɛnkɛma hunle belamunli mralɛ kɔsɔɔti mɔɔ wɔ Yigyibiti azɛlɛ ne azo la; ɔhunle menli belamunli mralɛ, ɔhunle nyɛmoa amra mɔɔ lumua. Yemɔti yɛfa belamunli ralɛ nrenya biala mɔɔ kɛkpakye awodeɛ la yɛbɔ azu yɛmaa Ɛdɛnkɛma, na yɛ mra mrenya belamunli mralɛ mrenya ne mɔ, yɛkpɔne bɛ.’ 16Ɔbayɛ ngakyedeɛ nee sɛkɛlɛneɛ yeamaa bɛ wɔ bɛ sa anwo anzɛɛ bɛ nwoma azo; ɔluakɛ Ɛdɛnkɛma vale tumi kpole a yele yɛ vile Yigyibiti a.”
Amungu mpila nee senle mpila ne
17Mɔɔ Yigyibiti belemgbunli ne manle menli ne adenle kɛ bɛhɔ la, Nyamenle ammaa bɛampe Filisitiama azɛlɛ zo wɔ mekɛ mɔɔ ɛkɛ ne a le adenle sikalɛ la, ɔluakɛ Nyamenle hanle kɛ, “Saa menli ne mɔ dua ɛkɛ na bɛkɔtɔ konle nu a bɛkɛvu bɛ nwo na bɛkɛzia bɛkɛhɔ Yigyibiti bieko.” 18Na Nyamenle manle bɛbɔle fienemgbole ne mgbɔlɔka bɛvale Ndɔ Nyevile#13.18 Ndɔ Nyevile anzɛɛ Nyevile Kɔkɔlɛ. ne adenle zo. Yizilayɛma vile Yigyibiti wɔ mekɛ mɔɔ ɛnee bɛwie bɛ nwo boɔboa wɔ konle nu la.
19 #
Mɔl 50.25
Na Mosisi zale Dwosefi mbowule ne hɔle, ɔluakɛ ɛnee Dwosefi ɛha ndane ɛdo Yizilayɛma anwo na yeze bɛ kɛ, “Nyamenle baralie bɛ, na saa bɛlɛkɔ a bɛmmagyakyi me mbowule ne ɛke.”
20Na bɛvi Sɛko bɛdule bɛ bo bɛhɔyɛle azokoɛleɛ wɔ Yitam, wɔ fienemgbole ne anloa. 21Alehyenlɛ nu, Ɛdɛnkɛma yɛle kɛ amungu mpila la lile bɛ nyunlu hilele bɛ adenle. Nɔɔzo noko ɔyɛle kɛ senle mpila la manle maanle nu yɛle wienyi, amaa bɛahola bɛadu bɛ adenle ne ewiazo nee nɔɔzo. 22Amungu mpila ne nee senle mpila ne mɔɔ hilele bɛ adenle ewiazo nee nɔɔzo la angyakyi menli ne adevinli.
Currently Selected:
Ade 13: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
