Gyi 28
28
Wɔ Mɔleta
1Mɔɔ yɛradwule aze la yɛdele kɛ bɔra ne mɔɔ yɛra zo la bɛfɛlɛ ye Mɔleta. 2Bɔra ne azo amra lɛ ahunlunyele kpalɛ. Ɛnee ezule ne ɛlɛtɔ na ɛyɛlɛ wɔ nu la ati, bɛhuanle senle bɛmanle yɛ muala yɛdɛnlanle nwolɛ. 3Pɔɔlo sesale ngeleka bie guale senle ne anu. Na senle ne wuluwulu ne hanle ɛyɛne ne la, ɛwɔlɛ bɔna vi nu vindele na ɔbebale Pɔɔlo asa. 4Mɔɔ bɔra ne azo amra nwunle kɛ ɛwɔlɛ ne beba Pɔɔlo asa la, bɛdule bɛ nwo azukue kɛ, “Sonla ɛhye kɛyɛ kɔdiawu. Yemɔti yevi nyevile ye anu kɔlɔnwo bɔbɔ ɛdeɛ, noko ɔyɛ biala a ɔbawu.” 5Na Pɔɔlo kpondenle ɛwɔlɛ ne guale senle ne anu na ɛhwee anyɛ ɔdaye mumua ne. 6Mɔɔ ɔyɛle zɔhane la ɛnee menli ne mɔ anye la kɛ Pɔɔlo asa banwu anzɛɛ ɔbapɛ yeafi yeawu. Na bɛnleanle dedee mɔɔ ɛhwee anyɛ ye la, bɛhakyile bɛ adwenle na bɛhanle kɛ, “Ɔle bozonle!”
7Bɔra ne azo kpanyinli ne mɔɔ bɛfɛlɛ ye Pɛbeleɛse la ɛleka mɔɔ de la nee ɛleka mɔɔ yɛwɔ la anwa. Ɔ nee yɛ hɔle ye sua nu na ɔliele yɛ kɛnlɛma gyɛlɛɛnye, ɔlieliele yɛ nye kenle nsa. 8Mekɛ ne anu ɛnee ebunlu ɛhye Pɛbeleɛse ɔ ze na eza ɔkɔ baka zo, yemɔti ɔla sua nu. Pɔɔlo hɔle ɔ nwo ɛkɛ, ɔzɛlɛle ɔmanle ye na ɔvale ɔ sa ɔguale ɔ nwo zo ɔmanle ɔdele kpɔkɛ. 9Mɔɔ ɛhye zile la, awuleravolɛ mɔɔ wɔ bɔra ne azo la amuala rale manle ɔyɛle bɛ ayile. 10Bɛlile yɛ eni dɔɔnwo, yɛɛ kenle mɔɔ yɛbahɔ la, bɛvale ninyɛne mɔɔ yɛbahyia nwolɛ wɔ yɛ adendulɛ ne anu la bɛhɔguale ɛlɛne ne anu bɛmanle yɛ.
Yɛvi Mɔleta yɛkɔ Wulomu
11Siane nsa pɛle nu la yɛvale ɛlɛne bie mɔɔ vi Alɛzandelea mɔɔ bɛfɛlɛ ye “Bozonle Ndalɛ,” mɔɔ ralile fɔsɛlɛ ne wɔ bɔra ne azo la yɛzɔle yɛ adendulɛ ne azo. 12Yɛradwule aze wɔ Saelekusu na yɛlile kenle nsa wɔ ɛkɛ. 13Yɛvi ɛkɛ ne la yɛrale Riligeɛm. Aleɛ hyenle la nyevile nu anwoma ne dwazole. Yemɔti yɛlile kenle nwiɔ yɛɛ yɛdwule Putiyɔle sua zo a. 14Yɛnwunle diedima ne bie mɔ wɔ ɛkɛ, na bɛzɛlɛle yɛ bɛmanle yɛlile dapɛne wɔ bɛ nwo ɛkɛ. Nzinlii yɛradwule Wulomu. 15Ɛnee diedima mɔɔ wɔ Wulomu la ɛde yɛ nganeɛ dɛbadɛba, yemɔti bɛvi ɛkɛ ne toonwo bɛrayiale yɛ wɔ Apeɛse Gua nu nee “Dabelɛ Nsa.” Mɔɔ Pɔɔlo nwunle bɛ la, ye ahonle gyinlanle na ɔyɛle Nyamenle mo.
Wɔ Wulomu
16Mɔɔ yɛdwule Wulomu la, bɛmanle Pɔɔlo adenle kɛ ɔdaye ɔ ngome ɔhɔdɛnla, na bɛyele sogyanli ko kɛ ɔ nee ye ɛhɔdɛnla na ɔzinza ye.
17Ɔlile kenle nsa la Pɔɔlo vɛlɛle Dwuu mgbanyima mɔɔ wɔ sua ne azo la, ɔ nee bɛ yiale nu na ɔzele bɛ kɛ, “Me mediema Yizilayɛma, meanyɛ ɛtane biala meantia me menli anzɛɛ yɛ amaamuo ne mɔɔ yɛnyianle yɛvile yɛ nlenya mɔ lɔ la, noko bɛhyele me piliza bɛyele me bɛmanle Wulomuma wɔ Gyɛlusalɛm. 18Bɛnleɛnleanle me edwɛkɛ ne anu la ɛnee bɛnnwu debie biala mɔɔ meyɛ mɔɔ fɛta ɛhunlɛ a. 19#Gyi 25.11 Na kɛmɔ Dwuuma amkponle la ati, ɛnee ɔhyia kɛ mebɔ me edwɛkɛ ne atua memaa Maanle Maanle belemgbunli ne. Menlɛ bɛ nwo adwenle ɛtane biala, yɛɛ meamba kɛ mebadoa bɛ. 20Ɛhye ati yɛɛ mevɛlɛ bɛ kɛ me nee bɛ badendɛ a. Ɔluakɛ, ɔlua sonla ne mɔɔ Yizilayɛma lɛ anyelazo wɔ ye nu la ati yɛɛ bɛgua me nwɔnzɔnwɔnzɔ a.”
21Bɛzele ye kɛ, “Yɛmɛ yɛtɛnyianle ɛ nwo kɛlata biala vi Dwudiya, yɛɛ mediema ne mɔ biala ɛtɛbale ɛtɛbabɔle yɛ nehane amaneɛ biala mɔɔ le ɛtane wɔ ɛ nwo a. 22Na yɛkulo kɛ yɛtie wɔ adwenle. Mɔɔ yɛze ye ɛke la a le kɛ, zɛhae fane ye mɔɔ ɛwɔ nu la, awie biala tendɛ tia ye.”
23Na bɛ nee Pɔɔlo hilele kenle. Kenle ne dwule la, menli dɔɔnwo rayiale ɛleka mɔɔ Pɔɔlo de la. Na ɔhanle Nyamenle Belemgbunlililɛ ne anwo edwɛkɛ ɔhilehilele nu ɔhilele bɛ, na ɔbɔle mɔdenle kɛ ɔmaa bɛalie Gyisɛse anwo edwɛkɛ ne mɔɔ Nyamenle kpɔmanvolɛma nee Mosisi mɛla ne ka la bɛali. Ɔdendɛle ɛhye anwo ɔvi nwonlomɔ mangyee ne toonwo aledwolɛ. 24Bie mɔ liele lile, na bie mɔ anlie anli. 25Na bɛ adwenle anzɛ yɛɛ bɛzandele a. Na mɔɔ bɛbahɔ la Pɔɔlo hanle edwɛkɛ ko ɛhye kɛ, “Mɔɔ Sunsum Nwuanzanwuanza ne luale Nyamenle kpɔmanvolɛ Ayezaya anwo zo hanle hilele yɛ nlenya mɔ la le nɔhalɛ somaa! 26#Aye 6.9-10 Ɔluakɛ ɔzele kɛ,
‘Kɔze menli ɛhye mɔ kɛ,
bɛbadie, bɛadie, na bɛnrɛde ɔ bo;
bɛbanlea, bɛanlea, na bɛnrɛnwu debie,
27ɔboalekɛ Nyamenle se, menli ɛhye mɔ ɛsolo,
bɛduodua bɛ nzo yɛɛ bɛmuomua bɛ nye.
Anrɛɛ bɛ nye kɛnwu debie,
bɛ nzo kɛde edwɛkɛ, bɛkɛnyia ndelebɛbo,
na bɛkɛzia bɛkɛra me ɛkɛ, na meayɛ bɛ ayile.’ ”
28Akee Pɔɔlo dwulale ye edwɛkɛ ne zɛhae, “Yemɔti bɛnwu ye kɛ bɛlɛ Nyamenle ngoanelielɛ nwo nrɛlaleɛ ne bɛkamaa bɛdabɛ mɔɔ bɛnle Dwuuma la, na bɛbadie!”
[ 29Mɔɔ Pɔɔlo hanle ɛhye la, Dwuuma ne vale kpolerazulɛ kpole kpalɛ dwazole hɔle.]
30Na Pɔɔlo dɛnlanle sua mɔɔ ɔde nu na ɔdaye a ɔtua ye kakɛ la anu toonwo ɛvolɛ nwiɔ. Ɔliele menli mɔɔ rale ɔ nwo ɛkɛ ne la amuala. 31Ɔhanle Nyamenle Belemgbunlililɛ ne anwo edwɛkɛ na ɔhilehilele menli ninyɛne mɔɔ fane Awulae Gyisɛse Kelaese anwo la, na awie biala andenda ɔ gyakɛ anu.
Currently Selected:
Gyi 28: NB
Highlight
Copy
Compare
Share
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
