Gyi 16

Temɔte nee Pɔɔlo nee Saelase kɔ

1Pɔɔlo eza rale Dɛbi nee Lesetela noko. Ɛdoavolɛ bie wɔ ɛkɛ, bɛfɛlɛ ye Temɔte. Ɔ nli le Dwuunli mɔɔ ɛlie Edwɛkpa ne ɛli a, yɛɛ ɔ ze le Gilikinli. 2Mediema mɔɔ wɔ Lesetela nee Ayekoneɛm la kanvo Temɔte kpole kpalɛ. 3Ɔlua zolɛ Pɔɔlo hulole kɛ ɔkɛva Temɔte ɔkɛhɔ. Ɛhye ati ɔmanle bɛyɛle ye mrenyanu nzonlɛ. Pɔɔlo yɛle ɛhye, ɔboalekɛ Dwuuma mɔɔ wɔ sua ne azo la amuala ze kɛ Temɔte ɔ ze le Gilikinli. 4Wɔ bɛ akpɔsa ne anu, sua biala mɔɔ bɛkɛdwu zo la bɛye ɛzoanvolɛma nee mgbanyima mɔɔ wɔ Gyɛlusalɛm la ngyehyɛlɛ ne bɛto diedima ne anyunlu, na bɛse bɛ kɛ bɛli zolɛ. 5Ɛhye manle asɔne ne mɔ anwo yɛle se wɔ diedi nu na menli dɔɔnwo rabokale bɛ nwo dahuu.

Pɔɔlo ɛnyelɛzodeɛnwunlɛ wɔ Tulowase

6Bɛhɔle Felegyea nee Galeehyea maanzinli ne mɔ anu, ɔluakɛ Sunsum Nwuanzanwuanza ne ammaa adenle ammaa bɛanga Edwɛkpa ne wɔ Ehyea maanzinli ne anu. 7Mɔɔ bɛdwule Mesea maanzinli ne ɛweɛne zo la bɛbɔle mɔdenle kɛ bɛkɛhɔ Baetenea maanzinli nu, na Gyisɛse Sunsum ne ammaa bɛ adenle. 8Ɛhye ati bɛpɛle nu bɛhɔluale Mesea maanzinli nu na bɛhɔle Tulowase. 9Nɔe ne Pɔɔlo nwunle ɛnyelɛzodeɛnwunlɛ kɛ nrenya bie vi Masidonea ɛragyinla ɔ nyunlu ɛkɛ ne na ɔlɛkpa ye kyɛlɛ kɛ, “Bɛla Masidonea maanzinli nu na baboa yɛ!” 10Mɔɔ Pɔɔlo nwunle zɛhae debie la, yɛbɔle kpɔkɛ kɛ Nyamenle yɛɛ ɛvɛlɛ yɛ kɛ yɛhɔbɔ Edwɛkpa ne nolo yɛhile menli mɔɔ wɔ ɛkɛ ne la a, ɛhye ati yɛhuohuanle yɛ nwo na yɛhɔle Masidonea maanzinli nu.

Ledea yɛ diedinli

11Yɛvale ɛlɛne yɛvile Tulowase yɛdole ye zo yɛhɔle Samotelase, ye alehyenlɛ nu ɛnee yɛwɔ Niapɔlese. 12Yɛvi ɛkɛ ne la yɛhɔle Felepae, mɔɔ le suakpole wɔ Masidonea maanzinli nu la. Suakpole ɛhye Wulomu Maanle Maanle belemgbunli ne a bɔle ye nzeseɛ a. Yɛlile kenle dɔɔnwo wɔ sua ne azo. 13Ɛnwomenlelielɛ Kenle ne dwule la, yɛhɔle bɛ azule ne anloa wɔ suakpole ne kandiba. Yɛ adwenle a le kɛ kabezɛ ɛkɛ ne a Dwuuma ɔyɛ a yia yɛ nzɛlɛlɛ a. 14Mraalɛ mɔɔ diele yɛ edwɛkɛ ne la ko a le Ledea mɔɔ vi Tayataela na ɔtɔnedɔne arelemgbunli ndanlɛ la. Ɔle raalɛ mɔɔ Nyamenlezonlenlɛ wɔ ye nu a. Na Awulae bukele ye adwenle nu manle ɔdiele mɔɔ Pɔɔlo ɛlɛka la kpalɛ. 15Na ɔmanle bɛzɔnenle ye nee ye sua nu amra amuala, na ɔzele yɛ kɛ, “Saa bɛbu me kɛ melɛ diedi wɔ Awulae anu a, ɛnee bɛ nee me ɛradɛnla me sua nu.” Ɔtinlinle zolɛ na ɔ nee yɛ hɔle.

Bɛgua Pɔɔlo nee Saelɛse efiade wɔ Felepae

16Kenle ko yɛlɛkɔ ɛleka mɔɔ bɛyɛ nzɛlɛlɛ la, yɛyiale kanranli bɛlɛra bie mɔɔ di ahɔne na ɔlua ye munzule ɛbɔlɛ zo ɔ menle mɔ ɛnyia bɛ nwo ninyɛne nee ezukoa la. 17Ɔdoale yɛ nee Pɔɔlo na ɔlile yɛ nzi ɔdeɛdeanle nu kɛ, “Anwuma Anwuma Nyamenle ne sonvolɛma, mɔɔ bɔ ngoanelielɛ adenle ne anwo nolo la ɛne!” 18Ɔyɛle ɛhye alehyenlɛ dɔɔnwo ɔmanle akee ɔyɛle Pɔɔlo abodelɛ, na ɔhakyile ɔ nye ɔzele sunsum ɛtane ne mɔɔ wɔ bɛlɛra ne anwo la kɛ, “Ɔlua Gyisɛse Kelaese duma nu, mese wɔ kɛ, ɛvi ɔ nwo tu!” Na sunsum ɛtane ne vi bɛlɛra ne anwo dule ɛkɛ ne ala.

19Mɔɔ kakula raalɛ ne amenle mɔ nwunle kɛ bɛ ezukoa ɛnyialɛ adenle ne ɛdua la, bɛhɔhyele Pɔɔlo nee Saelase bɛhwenlenle bɛ aze bɛ nee bɛ hɔle mgbanyinli nyunlu wɔ bɛ gua ne anu. 20Bɛdoanle bɛ bɛhilele Wulomu arane mgbanyima ne mɔ kɛ, “Menli ɛhye mɔ le Dwuuma bie mɔɔ ɛva ngyegyelɛ ɛra suakpole ye azo a. 21Bɛlɛfa amaamuo mɔɔ nee yɛ ɛdeɛ ne ɛnle ko la bɛarahilehile yɛ. Yɛmɛ yɛle Wulomuma mɔɔ yɛdie bɛ ngilehilelɛ ne yɛto nu a ɔnyɛ boɛ a.” 22Na menli ne mɔ amuala bokale menli mɔɔ hɔdoanle ɛzoanvolɛma ne la anwo.

Na edwɛkɛdivolɛma ne tetele Pɔɔlo nee Saelase adɛladeɛ mɔɔ bɛwula la na bɛmanle bɛbilale bɛ empele. 23Mɔɔ bɛbole bɛ bɛwiele la, bɛguale bɛ efiade, na bɛzele mɔɔ nea efiade ne azo la kɛ ɔzɔ bɛ nu boɛ. 24Ɔlua zo ɔvale bɛ ɔhɔle efiade ne akunlu lɔ na ɔbɔle bɛ kpanwu.

25Nɔe ne, kɛyɛ alevinli mu nwiɔ avinli, ɛnee Pɔɔlo nee Saelase ɛlɛyɛ nzɛlɛlɛ na bɛlɛto edwɛne bɛaye Nyamenle ayɛlɛ, na menli mɔɔ bɛdabɛ noko bɛgua efiade ne bie la ɛlɛtie bɛ. 26Arɛlevilɛ nu ala azɛlɛ kpusule kpole bie na efiade ne adiabo ne kpusule. Na ɛkɛ ne ala efiade ne nlenkɛ ne mɔ amuala bukebukele na nwɔnzɔnwɔnzɔ mɔɔ dedɛ bɛ la amuala kpolokpolole guale. 27Mɔɔ pilizama sinzavolɛ ne vi nafelɛ nu dunwuele na ɔnwunle kɛ efiade ne nlenkɛ ne mɔ deda nwolɛ la, ɔdwenlenle kɛ menli mɔɔ bɛguale bɛ efiade ne la ɛwie nriandi kɔ, ɛhye ati ɔhwenle ye dadeɛ ne kɛ ɔku ɔ nwo. 28Na Pɔɔlo deanle nu kɛ, “Mmaku ɛ nwo! Yɛ muala yɛwɔ ɛke!”

29Pilizama sinzavolɛ ne manle bɛvale kɛnlaneɛ bɛrale, na ɔvale sulosulo ɔhɔdule ɔdɔle Pɔɔlo nee Saelase agyakɛ anu. 30Ɔvale bɛ ɔvindele na ɔbizale bɛ kɛ, “Yɛmenle mɔ, duzu yɛɛ menyɛ na meanyia ngoane a?”

31Bɛzele ye kɛ, “Die Awulae Gyisɛse di, na ɛdawɔ nee wɔ sua nu amra kɛnyia ngoane.” 32Akee bɛhanle Awulae anwo Edwɛkpa ne bɛhilele ye nee bɛdabɛ mɔɔ bɛwɔ ye sua nu ɛkɛ ne la amuala. 33Dɔnehwele ne anu ala, pilizama sinzavolɛ ne miemianle bɛ nganlɛ ne mɔ, na ɔvale nwole ɔtotole nu, na ɔmanle bɛzɔnenle ye nee ye sua nu amra amuala. 34Akee ɔvale bɛ ɔhɔle sua nu na ɔmanle bɛ debie bɛlile, na ɔ nee ye sua nu amra lile fɛlɛko kɛ bɛnyia diedi wɔ Nyamenle anu a.

35Aleɛ hyenle la, Wulomu arane mgbanyima ne mɔ zoanle kpolisi mgbanyinli manle bɛhɔzele pilizama sinzavolɛ ne kɛ, “Gyakyi menli ne mɔ maa bɛhɔ.”

36Pilizama sinzavolɛ ne hanle hilele Pɔɔlo kɛ, “Mgbanyima ne mɔ ɛzoa kɛ bɛgyakyi ɛdawɔ nee Saelase. Yemɔti bɛhɔ anzonudwolɛ nu.” 37Na Pɔɔlo zele kpolisi mgbanyinli mɔɔ rale la kɛ, “Bɛdabɛ, mgbane gyɛne ne ala, bɛbo yɛ bagua nu, wɔ mekɛ mɔɔ yɛle Wulomuma la, bɛgua yɛ efiade na akee bɛkpondɛ kɛ bɛye yɛ ahane nyaa bɛmaa yɛkɔ? Yɛnrɛhɔ! Maa Wulomu mgbanyima ne mɔ bɛdabɛ bɛraye yɛ.”

38Kpolisi mgbanyinli ne mɔ hɔhanle edwɛkɛ ɛhye hilele Wulomu mgbanyima ne mɔ. Na mɔɔ bɛdele kɛ Pɔɔlo nee Saelase le Wulomuma la, bɛ ahonle dule. 39Ɛhye ati bɛrale bɛrakpale bɛ kyɛlɛ; bɛyele bɛ efiade ne na bɛzele bɛ kɛ bɛvi suakpole ne azo bɛhɔ. 40Pɔɔlo nee Saelase vi efiade ɛkɛ ne la, bɛhɔle Ledea sua nu. Bɛhɔdole mediema ne bie mɔ wɔ ɛkɛ, bɛdendɛle bɛhilele bɛ, bɛzile bɛ ahonle, na akee bɛhɔle.

Currently Selected:

Gyi 16: NB

Highlight

Copy

Compare