Romanfoɛ 13

Akristofoɛ ne bɛ maen nu asodie

1 # Tit 3.1; 1 Pet 2.13, 14 Ɔsɛ kyɛ sona biala brɛ ye nwo ase wura maen mbanyi tumi bo, ofikyɛ tumi biala nne berɛ, sana bɔ ofi Nyameɛ berɛ ɔ; na tumi mɔ bɔ bɛwɔ berɛ ne, Nyameɛ yeɛ wahyehyɛ wato berɛ ɔ. 2#Ɛks 16.8 Yiti ebiala bɔ odwɔso tia maen mbanyi nen, né wadwɔso watia bɔ Nyameɛ ahyehyɛ wato berɛ ne; na ebiala bɔ ɔyɔ sɔ nen, okonya ye nwo foɛbualɛ. 3#1 Pet 2.14 Bɛ bɔ bɛ yɔleɛ te paa ne, maen mbanyi nwo nyɛ suro mma bɛ, na mmom bɛ nwo yɛ suro ma bɛ bɔ benni dwirɛ paa ɔ. Aso enguro kyɛ ekosuro bɔ tumi wura ye sa anaa? Nzaade di dwirɛ paa, na ɔkɔkamvo wɔ. 4#1 Tɛs 4.6 Ofikyɛ wɔ yeeyɛlɛ ti bɛte Nyameɛ somvoɛ. Nakoso sɛ ɛyɔ bɔne de a, ye de ɔsɛ kyɛ esuro ɔ, ɔnate kyɛ bendira ɛhɔtɔ ne mbaen! Bɛte Nyameɛ somvoɛ bɔ bɛtɔ wereɛ bɛma bɛ yaafɛlɛ ba sona bɔ ɔyɔ bɔne so ɔ. 5Yiti, ɔsɛ kyɛ ɛmɔbrɛ bɛ nwo ase bewura bɛ bo; nna kyɛ ɛmɔkɔnwati bekofi Nyameɛ yaafɛlɛ piri ne anu angome ti ɔ, na mmom ɛmɔ tiboa koso ti ɔ.

6Ɛhe koso ati yeɛ ɛmɔtua toɔ ɔ, ofikyɛ mbanyi nemɔ bɛte Nyameɛ somvoɛ mɔ bɔ daa biala bɛyɔ sɔ adwuma ne ɔ. 7#Luk 20.25; Mat 22.21; Mak 12.17 Ɛ́mɔtua ebiala deɛ bɔ ɔfata ye ɔ bɛ́ma ye! Ɛ́mɔtua ɛtoɔ bɛ́ma bɔ ɛtoɔ fata ye ɔ; ɛ́mɔtua ndɔ bɛ́ma bɔ ndɔ fata ye ɔ; ɛ́mɔsuro bɔ odi kyɛ besuro ye ɔ; yeɛ ɛ́mɔfa anidie bɛ́ma bɔ anidie fata ye ɔ.

Ɛmɔhurohuro bɛ nwo dwirɛ

8 # Mat 22.39-40; Gal 5.14 Nnɛmɔma ebiala kerɛ, sana ɔdɔ bɔ ɛmɔfa bekurokuro ɛmɔ nwo dwirɛ ɔ; ofikyɛ ebiala bɔ okuro obiɛngo dwirɛ nen, né wali mmeraa ne aso. 9#Lew 19.18; Mat 19.19 Mmeraa ne nwa, “Nnɛsɛkye agyaa, nnɛdi awue, nnɛwua, [nnɛdi adanzewia], nnɛma wɔ nye boro ebie nikye.” Na sɛ mmeraa dwirɛ biala boka so a, babɔ ye porɛ wɔ edwirɛ he anu kyɛ, “Kuro ebiɛngo dwirɛ kyɛ wɔ bɔbɔ wɔ nwo.” 10Sɛ ekuro ebiɛngo dwirɛ a, ɛnyɛ ye bɔne; yiti ɔdɔ yeɛ mmeraa ne gyi so ɔ.

11 # Ɛfe 5.14; 1 Tɛs 5.6 Na ɛhemɔ asi ne, ɛmɔse mmerɛ ne, kyɛ mmerɛ aso kyɛ ɛmɔtingye befi nnaa nu ɔ. Ofikyɛ yɛ ngoalelɛ ne wapingye watra mmerɛ bɔ yɛɛyɛle agyidifoɛ ɔ. 12#Ɛfe 5.11; 1 Tɛs 5.8 Aleɛ sane ɔ ahyɛ, na alehyeleɛ apingye. Yiti ɛ́mɔma yɛgyi awosii nu yɔleɛ nemɔ yɛgua, ná yɛfa kanea nu akodeɛ yɛwura. 13#Gal 5.19-20; 1 Tɛs 4.12 Ɛ́mɔma yɛbɔ bra paa bɔ ɔfata alehyeleɛ ɔ, na nna kyɛ anigye mmorosoɛ ne nzaabolɛ nu, nna adwamanbɔlɛ ne ahohwie nu, ngondii ne anyeboroborolɛ nu. 14#Gal 3.27; 5.16 Na mmom ɛ́mɔfa Awurade Yesu Kristo akodeɛ ne bewura, yeɛ nnɛma ɛmɔdi anwoɔnaen akɔnnɔ si bɛyɔ ye apɛdeɛ bɛma ye.

Currently Selected:

Romanfoɛ 13: EBP

Highlight

Copy

Compare