Romanfoɛ 10
10
Pɔɔlo bɔ mbaeɛ ma Yisraelfoɛ
1Nniɛma mɔ, m’ahone nu dwirɛ ne me mbaeɛ bɔ mebɔ mekyire Nyameɛ mema Yisrael ole kyɛ bekonya daa ngoa ɔ. 2Medi bɛ nwo adanzeɛ kyɛ bele Nyameɛ nwo dɔ; nakoso bɛ mmɔdenbɔlɛ ne oggyi nahorɛ nimdeɛ so. 3Ofikyɛ bɛnze atee bɔ Nyameɛ fa so siesie ye ne mmenia b’afia ɔ, na mmom bɛyɛle kyɛ bɛkɔfa bɛ bɔbɔ bɛ tenenee atee so; yiti bammrɛ bɛ nwo ase bamma Nyameɛ atee bɔ ɔfa so yɛ kuro sona teneneeniɛ ne. 4#Gal 3.24 Na ɔnate kyɛ Kristo di mu tra mmeraa ne ati, amaa ɔnate so ebiala bɔ ode di ne babua ye be.
Daa ngoa wɔ berɛ ma ebiala
5 #
Hes 20.11; Lew 18.5 Mose hyerɛle fale tenenee bɔ ebie di mmeraa ne aso a ɔyɛ ne nwo kyɛ, “Sona bɔ odi mmeraa n’ahyɛdeɛ so ne, ɔkɔfa so konya nu ngoa.” 6#Deut 30.12 Na tenenee bɔ ogyi gyidie so ne, ɔkã kyɛ, “Nnɛkã ye wɔ w’ahone nu kyɛ, nwa yeɛ ɔkɔfo kɔhɔ nyameɛso ɔ?” (Mekyire bɔ ɔkwaafa Kristo dwu ba ase ɔ); 7#Aso 2.24; Deut 30.13 anaakyɛ, “Nwa yeɛ okodwu kɔhɔ kumaa kuronguronn ne anu ɔ?” (Mekyire bɔ ɔkwaafa Kristo fi awufoɛ nu dɔ ba ɔ). 8#Deut 30.14 Nzikyɛ yeɛ Ahyerɛlɛ ne ɔkã ɔ?
“Edwirɛ ne apingye wɔ,
ɔwɔ wɔ noa ne w’ahone nu,”
(ye ole gyidie dwirɛ bɔ yɛbɔ ye dawure ne). 9#Mat 10.32 Ofikyɛ sɛ ɛfa wɔ noa kã ye pefee kyɛ Yesu te Awurade, ná ede di wɔ w’ahone nu kyɛ Nyameɛ atingye ye afi awufoɛ nu a, ekonya daa ngoa. 10Ɔnate kyɛ, sona fa ye ahone yeɛ ode di ɔkɔ tenenee nu ɔ; na ye noa yeɛ ɔfa kã ye pefee onya daa ngoa ɔ. 11#Yes 28.16; Rom 9.33 Na Ahyerɛlɛ ne kã kyɛ, “Ebiala bɔ ode ye di ne, ye nyunu ngogua ase.” 12#Rom 3.22, 29; Mat 28.19 Ofikyɛ nzonzoleɛ biala nne Yudaniɛ ne Helaniɛ nu; Awurade komapɛ ne ala yeɛ ɔte bɛ mukoraa bɛ Mene ɔ, na oyira ebiala bɔ osũ frɛ ye ɔ. 13#Aso 2.21; Yow 2.32 Ofikyɛ ebiala bɔ ɔbɔ Awurade dumaa ne, okonya ngoa.
14Na ɔkɔyɛ sɛɛ ná mmenia basu bafrɛ ye wɔ abrɛ bɔ benne ye benni ɔ? Na ɔkɔyɛ sɛɛ ná bale bɔ bɛttele ye nwo dwirɛ le ɔ bali? Na ɔkɔyɛ sɛɛ ná bate, wɔ abrɛ bɔ nzɛmbahanɛniɛ nne berɛ ɔ? 15#Yes 52.7 Na sɛ banzoma mmenia a, ɔkɔyɛ sɛɛ ná babɔ edwirɛ ne dawure? Kyɛbɔ bahyerɛ ye kyɛ, “Bɛ bɔ bɛso ndɛenvɛen bɛnate ne, kyɛbɔ bɛ gya bo osi yɛ nyemene ɔ!” 16#Heb 4.2; Yoh 12.38; Yes 53.1 Nakoso nna bɛ mukoraa yeɛ bayɛ sotie bama nzɛmba ne ɔ. Ofikyɛ Yesaya kã kyɛ, “Awurade, nwa yeɛ wale yɛ noa dwirɛ ne wali ɔ?” 17#Gal 3.2, 5; Kol 3.16 Né nzaade, gyidie nate edwirɛ ne tielɛ nu yeɛ ɔba ɔ, na bɔ bɛte ne, ɔnate Kristo dwirɛ ne aso yeɛ ɔba ɔ.#10.17: Tete Ahyerɛlɛ ne bie kã kyɛ: ɔnate Nyameɛ dwirɛ so yeɛ ɔba ɔ.
18 #
Mat 24.14; Kol 1.6 Nakoso mebisa kyɛ, bennya bɛttele anaa? Amba, bate, ofikyɛ,
“Bɛ komvi adwu aseɛ so nekaa biala,
na bɛ dwirɛ adwu wiase nekaa biala.”
19 #
Deut 32.21; Rom 11.11, 14 Mesa mebisa kyɛ, yiti Yisrael ande edwirɛ ne bo anaa? Mose lili moa hane kyɛ,
“Ngɔma ɛmɔ nye kɔboro mmenia bɔ bɛ de nna me maen ahɔ ɔ;
na ngɔfa maen bɔ b’adwene te nganga ɔ ngohu ɛmɔ ahone.”
20 #
Yes 65.1
Afei Yesaya sili ye ahone hane kyɛ,
“Bɛ bɔ bambena me si atee ne, banwu me,
na maye me nwo ali mahyire bɛ bɔ bammisa me boso ɔ.”
21 #
Yes 65.2; Yer 35.17 Na ɔfa Yisrael nwo de, ɔhane kyɛ, “Alehyeleɛ biala, matrɛ me sa nu kyɛ ngole asoserɛfoɛ mmenia bɔ bayɛ me so lɔen ɔ.”
Currently Selected:
Romanfoɛ 10: EBP
Highlight
Copy
Compare
Share
Want to have your highlights saved across all your devices? Sign up or sign in
Esahie Bible © Bible Society of Ghana, 2018.
