Mateo 22
22
Atɔmvorɛ poentolɛ nwo anyandera
(Luka 14.15-24)
1 #
Luk 14.16-24 Na Yesu dwudwo hyirele bɛ wɔ anyandera nu bieku kyɛ, 2“Nyameɛso ahennie ne, ɔte kyɛ ɛhene bie bɔ ɔtole atɔmvorɛ poen mane ɔwa bienzua ɔ. 3#Mat 21.34 Na ɔsomane ye somvoɛ mɔ kyɛ bɛɛfrɛfrɛ bɛ bɔ wato ye sa wafrɛ bɛ kyɛ bɛbra atɔmvorɛ ne abo ne, nakoso bambene so kyɛ bɛkɔwa ɔ. 4Yiti osa somane somvoɛ foforɛ mɔ kyɛ, ‘Ɛmɔɔhã behyire bɛ bɔ mato me sa mafrɛ bɛ ne kyɛ: Ɛ́mɔtie, masiesie m’aleɛ ne mayie, mahu me nandwie nyii mɔ ne me nyɛmmoa bɔ balɔ ɔ, na mayie nikyee biala, yiti ɛmɔbra atɔmvorɛ ne abo.’ 5Na bɛ wora, bamva banyɛ dwirɛ, na besili nu bɛhɔle b’atee; ko hɔle ye fieso, ko oolili ye dwaa, 6yeɛ bɛ ngaa ne wora bɛhyele ye somvoɛ nemɔ beguale bɛ nyunu ase, na behuni bɛ. 7Na ɛhene ne tele ne, ye ahone huli, na ɔsomane ye asraafoɛ maa beehuhuni sɔ awudifoɛ nemɔ, na bɛyerale bɛ kuro. 8Afei osele ye somvoɛ mɔ kyɛ, ‘Basiesie atɔmvorɛ ne bayie de, nakoso bɛ bɔ ndole me sa mvrɛle bɛ ne, bɛmvata. 9Yiti ɛmɔhɔ mmorɔnoɛ nemɔ aso, na mmenia somaa biala bɔ ɛmɔkonwu bɛ ne, ɛ́mɔfrɛfrɛ bɛ ma bɛbra atɔmvorɛ ne abo.’ 10Na sɔ somvoɛ nemɔ besili nu bɛhɔle dwaa nemɔ aso bɛɛboaboale mmenia bɔ benwuni bɛ amukoraa noa, bɔne mmenia ne mmeni paa; na mmenia beeyili atɔmvorɛ sua ne anu tɛkyɛ.
11“Na ɛhene ne wurale nu kyɛ ɔkwaanea bɛ bɔ bawa atɔmvorɛ ne abo nen, onwuni biaa bie wɔ berɛ, bɔ né ye de owwura atɔmvorɛfalɛ ataadeɛ ɔ. 12Na obisale ye kyɛ, ‘Damvo, ɛyɛle sɛɛ yeɛ ɛwale wa ɔ, bɔ wɔ de nna atɔmvorɛfalɛ ataadeɛ yeɛ ewura e?’ Na wangora wammukye ye noa. 13Yeɛ ɛhene ne sele somvoɛ nemɔ kyɛ, ‘Ɛ́mɔkyekye ye gya ne ye sa, ná ɛmɔfindi ye bɛto bondua dɔ awosii ne anu; dɔ yeɛ mmenia kosũ ná banwose bɛ gye ɔ.’ 14Ofikyɛ, bafrɛ pee, nakoso kãa bie yeɛ baneanea nu bayɛ bɛ ɔ.”
Ɛtoɔtualɛ nwo adwobisa
(Marko 12.13-17; Luka 20.20-26)
15Yeɛ Farasiifoɛ mɔ bɛhɔle bɛɛbɔle porɛ kyɛbɔ bɛkwafa edwirɛ bɛkɔtetɛ Yesu noa ɔ. 16Na bɛsomane b’asuafoɛ mɔ ne Herodefoɛ maa bɛwale ye berɛ beebisale ye kyɛ, “Kyerɛkyerɛniɛ, yɛse kyɛ ɛte nahorɛniɛ, na ekyirekyire Nyameɛ atee ne turoloo, ɛnyɛ nyeyemuɛ; ofikyɛ ɛmva wɔ nye ndo mmenia bɛ dibea. 17Yiti kyire yɛ w’adwene. Aso mmeraa ma ate kyɛ yɛtua ɛtoɔ yɛma Kaesare, anaakyɛ ɔmma ate?”
18Nakoso Yesu nwuni b’adwenemmɔne ne, na obuale kyɛ, “Ɛmɔ, nyaatwomfoɛ! Nzu ati yeɛ ɛmɔbaatetɛ me noa ɔ? 19Ɛ́mɔfa sikaa bɔ bɛfa betua ɛtoɔ ne bie behyire me!” Na bɛfale denare ko bɛbrɛle ye. 20Na obisale bɛ kyɛ, “Nwa mvonini ne dumaa yeɛ ɔwɔ so ye?” 21#Rom 13.7 Bebuale ye kyɛ, “Kaesare deɛ ɔ!” Yeɛ osele bɛ kyɛ, “Nzaade ɛ́mɔfa Kaesare deɛ bɛ́ma Kaesare, ná ɛ́mɔfa Nyameɛ deɛ bɛ́ma Nyameɛ.”
22Na bɛtele edwirɛ he nen, ɔyɛle bɛ nwanwa, na befili ye nwo berɛ besili nu bɛhɔle.
Ewutingyelɛ nwo adwobisa
(Marko 12.18-27; Luka 20.27-40)
23 #
Aso 4.1-2 Ɛlɛho ne ala, Sadusiifoɛ bɔ bɛnwa awufoɛ dwɔsolɛ nne berɛ ne, bɛwale Yesu berɛ beebisale ye kyɛ, 24#Deut 25.5 “Kyerɛkyerɛniɛ, Mose hane kyɛ, ‘Sɛ bienzua bɔ wanwo ba owu a, odi kyɛ oliɛma bienzua gya kunaniɛ ne, ná ɔwo mmaa ma oliɛma ne.’ 25Tie, né aliɛmaa mmienzua nzoo bie bɛ ne yɛ wɔ wa. Bɔ oli moa ne gyale braa, na owuli bɔ wanwo mmaa ɔ, na ɔyakyili ɔye ne berɛ mane oliɛma bienzua. 26Sɔ ala koso yeɛ ɔtole aliɛmaa bɔ ɔtɔ so nyɔ ne bɔ ɔtɔ so nza ne ɔ, maa odwuli bɔ ɔtɔ so nzoo ne aso ɔ. 27Na bɔ ɔpɛ ye bo ɔ, braa ne koso wuli. 28Yiti awufoɛ dwɔsolɛ ne anu, mmenia nzoo nemɔ anu beni yeɛ braa ne kɔyɛ ɔye ɔ? Ofikyɛ bɛ mukoraa begyale ye.”
29Yeɛ Yesu buale bɛ kyɛ, Ɛmɔafõ, ɔnate kyɛ ɛmɔnze Ahyerɛlɛ ne, anaa Nyameɛ tumi ne. 30Ofikyɛ awufoɛ dwɔsolɛ ne anu, bengya, yeɛ bɛmva ebie bɛmma agyaa, na mmom bɛte kyɛ nyameɛso abɔfo mɔ. 31Bɔ ɔfa awufoɛ etingyelɛ nwo de, aso ɛmɔkkenngale bɔ Nyameɛ hã hyirele ɛmɔ ne, 32#Ɛks 3.6 kyɛ ‘Me ole Abraham Nyameɛ, Yisake Nyameɛ ne Yakob Nyameɛ’? Nyameɛ ɔtte awufoɛ Nyameɛ, na mmom ɔte ateasefoɛ Nyameɛ.” 33#Mat 7.28 Na ɛlɔen ne tele ɛhe nen, ye ngyerɛkyerɛ ne yɛle bɛ nwanwa.
Mmeraa titire ne
(Marko 12.28-34; Luka 10.25-28)
34Na mmerɛ bɔ Farasiifoɛ nemɔ bɛtele kyɛ Yesu noa abɔ Sadusiifoɛ nemɔ nen, beeyiale neka horɛ, 35na bɛ nu ko bɔ ɔte mmeraa nwo nimdeɛniɛ ɔ obisale Yesu dwirɛ fa suale ye ngaen kyɛ, 36“Kyerɛkyerɛniɛ, mmeraa dwirɛ beni yeɛ ɔte piri paa wɔ mmeraa ne anu ɔ?”
37 #
Deut 6.5 Na Yesu buale ye kyɛ, “Fa w’ahone amukoraati, wɔ kra mukoraati, ɔne w’adwene amukoraati kuro AWURADE wɔ Nyameɛ dwirɛ! 38Mmeraa dwirɛ bɔ ɔte piri paa bɔ oli moa hɔ ɛne. 39#Lew 19.18; Mat 19.19; Gal 5.14; Rom 13.9 Na bɔ ɔtɔ so nyɔ ne koso ɔte kyɛ ɛhene ala: Kuro ebiɛngo dwirɛ kyɛ wɔ bɔbɔ wɔ nwo! 40Mmeraa dwirɛ nyɔ hemɔ aso yeɛ mmeraa ne ne ngɔmhyɛlɛfoɛ amukoraa begyi ɔ.”
Kristo ne nwo adwobisa
(Marko 12.35-37; Luka 20.41-44)
41 #
Mak 12.35-37; Luk 20.41-44 Na Farasiifoɛ nemɔ beyiale neka horɛ nen, Yesu bisale bɛ 42kyɛ, “Kristo ne, ɛmɔdwene ye nwo sɛ? Nwa awa ɛne#22.42: NWA AWA ƐNE: Anaakyɛ: Nwa bosoniɛ ɛne.?” Bebuale ye kyɛ, “Dawide awa ɛne.”
43Yeɛ Yesu bisale bɛ kyɛ, “Na afei ɔwale ye sɛ bɔ Dawide nate Sunzum Krongron so frɛ ye me Mene ɔ, kyɛ,
44 #
Edw 110.1; Aso 2.34-35; Heb 1.13; 10.13 ‘Awurade sele me Mene kyɛ:
Tena me sa famaa so,
kodwu kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ.’?
45Na sɛ Dawide frɛ ye me Mene a, né ɔyɛle sɛɛ bɔ ɔte ɔwa ɔ?”
46Na ebiala angora amma ye mmuayɛɛ, na ofi sɔ kyẽa ne, ebiala angora ammisa ye dwirɛ biala ko.
Esahie Bible © Bible Society of Ghana, 2018.