Asomafoɛ 21

Pɔɔlo kɔ Yerusalem

1Yɛne bɛ pakyepakyele nu yiele nen, yɛsili nu yɛfale nzue so yɛhɔle yɛ nyunu tee yɛwale Kɔse; na aleɛ hyene ne, yɛdwuli Worode na yɛfili berɛ yɛhɔle Patara. 2Yɛnwuni kyɛ ɛlɛen bie pɛ nu kɔ Fonikia, yiti yɛfo yɛhɔle. 3Yɛdwuli nekaa bie bɔ né yɛ nye tua supɔ Kipro, na yɛyakyili ye yɛ sa bɛen so yɛhɔle Siria. Yɛdwu yɛwale etii so wɔ Tiro, ofikyɛ né bɛye ɛlɛen ne anu nningyein begua berɛ. 4Yɛnwuni agyidifoɛ biemɔ berɛ, na yɛne bɛ yɛɛtenane ɛlɛsoo, na bɛfale Sunzum ne so bɛha behyirele Pɔɔlo kyɛ nnɛmaa ɔkɔ Yerusalem. 5Nakoso yɛ ngyẽa bɔ yɛdi ye berɛ ne sone nen, yɛfili berɛ yɛtoale yɛ ateetulɛ ne aso. Bɛ mukoraa bɛ ne bɛ ye mɔ ne bɛ mma mɔ beesomane yɛ ate maa yɛfili kuro ne anu, na yɛkotole mboanoa berɛ yɛbɔle mbaeɛ yɛ ne yɛ nwo yɛ nwo lili ngraa. 6Afei yɛne bɛ lili ngraa, yɛfole ɛlɛen ne anu, na bɛ koso besa bɛhɔle awuro.

Pɔɔlo kɔ Kaesarea

7Yɛtoale so yɛfale nzue so fili Tiro yɛwale Tolema; yɛɛbisale berɛ agyidifoɛ ne ahye na yɛlili bɛ nwo berɛ ɛlɛho. 8#Aso 6.5; 8.5 Na aleɛ hyene ne, yɛfili berɛ yɛwale Kaesarea. Yɛɛsikyele nzɛmbahanɛniɛ Filipo awuro. Né Filipo boka mmenia nzoo ne aso. 9Né ole mmaa mmrasua nna. Bɛte mmabunu bɔ bɛhyɛ ngɔm ɔ. 10#Aso 11.28 Yɛlili ngyẽa kãa berɛ, na ngɔmhyɛlɛniɛ bie bɔ bɛfrɛ ye Agabo fili Yudea wale. 11Na ɔwale yɛ nwo berɛ ne, ɔfale Pɔɔlo abɔsoɛ ne kyekyele ye bɔbɔ ye gya ne ye sa, na ɔhane kyɛ, “Kyɛ Sunzum Krongron ne kã hɔ ɛhe: ‘Sona bɔ ye abɔsoɛ ɛhe ne, sɔ ala yeɛ Yudafoɛ kɔkyekye ye wɔ Yerusalem ná bafa ye bawura Amaenmaensofoɛ sa ɔ.’ ”

12Na yɛtele sɔ dwirɛ nen, yɛne Kaesarea agyidifoɛ ne srɛle Pɔɔlo kyɛ nnɛmaa ɔkɔ Yerusalem. 13Nakoso obuale yɛ kyɛ, “Na esuɛ ye koso ɛ? Bɔ bɛyɔ sɔ bɛma m’aba nu bu ye! Me de, nna kuku nu nnaa ngome yeɛ masiesie me nwo mama ɔ, na mmom kyɛ Awurade Yesu dumaa ti ngowu wɔ Yerusalem ɔ.” 14Yɛhane de, nakoso wambene; yiti yɛyakyili, na yɛhane kyɛ, “Awurade pɛ yeɛ ɔyɛ berɛ ɔ.”

15Yɛlili ngyẽa kãa berɛ, na yɛboaboale yɛ nwo yɛhɔle Yerusalem. 16Kaesarea agyidifoɛ ne bie ne yɛ hɔle, na beesikyele yɛ wɔ Menason bɔ né yɛkwaatena ye berɛ n’awuro; ofi Kipro na né ɔte gyidiniɛ dadaada.

Pɔɔlo kɔsra Yakobo wɔ Yerusalem

17Yɛdwuli Yerusalem nen, agyidifoɛ ne lele yɛ nyemene so. 18Aleɛ hyene ne, Pɔɔlo ne yɛ hɔle Yakobo awuro, na yɛɛtole asɔre mbanyi ne amu berɛ. 19Pɔɔlo bisale bɛ ahye, na ɔhane nikyee bɔ Nyameɛ nate ye (Pɔɔlo) asɛmbatrɛ adwuma ne aso wayɔ wɔ Amaenmaensofoɛ nu ngoko ngoko hyirele bɛ. 20Na bɛtele sɔ ne, bɛyele Nyameɛ ayɛ; na besele ye kyɛ, “Aliɛmaa Pɔɔlo, tie yɛ e! Yudafoɛ pembepembe wɔ wa bɔ bayɛ agyidifoɛ ɔ, na bɛ mukoraa basɔ Mose mmeraa ne anu serɛserɛ. 21Na ebiemɔ ahã ahyire bɛ kyɛ ekyirekyire Yudafoɛ amu bɔ bɛwɔ amaenmaen so ne kyɛ nnɛma bedi Mose mmeraa so; ɛnwa nnɛma bɛpɛ bɛ mma bienzua anaakyɛ bedi Yudafoɛ amanneɛ so. 22Yiti yɛkɔyɛ ye sɛ? Susu amba, kyɛbɔ ɔkɔyɛ biala bɛkɔte kyɛ awa. 23#Num 6.13-21 Bɔ yɛpena kyɛ ɛyɔ hɔ ɛhe. Yɛle mmienzua nna wɔ wa bɔ bahyɛ Nyameɛ bɔ ɔ. 24Ɛne bɛ hɔ ná ɛmɔɔpete ɛmɔ nwo, ná tua kerɛ ma bɛ, ná afei bahora babɔ tikwa.#21.24: Nea Aso 18.18. Na ɛhe kɔma ebiala konwu ye kyɛ nahorɛ nne edwirɛ bɔ mmenia aha afa wɔ nwo ahyire bɛ ne anu; na mmom wɔ bɔbɔ koraa edi Mose mmeraa so. 25#Aso 15.29 Nakoso Amaenmaensofoɛ bɔ bayɛ agyidifoɛ ne de, yahyerɛ krataa yaama bɛ, na yahyire bɛ y’adwene kyɛ nnɛma bedi bosoen so aleɛ biala, anaakyɛ mogya, anaa kaka biala bɔ wawu ye mogya nu, na afei bɛhwe bɛ nwo befi adwamanbɔlɛ nwo.”

26Yiti Pɔɔlo ne mmienzua nna nemɔ bɛhɔle, na aleɛ hyene ne, ɔne bɛ petene bɛ nwo. Na ɔhɔle asɔneyɛɛ sua ne anu ɔɔlale kyẽa bɔ bɛkɔpete bɛ nwo koyie, ná afei babɔ afɔleɛ bama ebiala ngoko ngoko ɔ ali.

Bɛhyele Pɔɔlo wɔ Nyameɛ asɔneyɛɛ sua nu

27Na ɛlɛsoo bɔ bɛfa bɛpete bɛ nwo ne baaso nen, Yudafoɛ biemɔ bɔ befi Asia maen nu nwuni Pɔɔlo wɔ asɔneyɛɛ sua nu; yiti bɛsɛkyele ɛlɔen bɔ bayia berɛ n’adwene maa bɛhyele Pɔɔlo, 28na bɛteane nu kyɛ, “Yisraelfoɛ ee, ɛmɔbra oo, na sona bɔ ɔnate ɔyɛ ngyerɛkyerɛ kyire mmenia wɔ nekaa biala fa tia Yisraelfoɛ ne Mose mmeraa ne asɔneyɛɛ sua ne ɛhe oo! Na wasa wafa Helafoɛ po wawa asɔneyɛɛ sua ne anu waagua Nekaa Krongron ne nwo fiɛ.” 29#Aso 20.4 Né bali moa banwu Trofimo bɔ ofi Ɛfeso kyɛ ɔboka Pɔɔlo so wɔ kuro ne anu, yiti besusuli kyɛ Pɔɔlo afa ye ahɔ asɔneyɛɛ sua ne anu.

30Afei kuro ne anu amukoraa yɛle basabasa, na mmenia ne amukoraa betuli bi bele amirika bɛɛhyele Pɔɔlo bɛhwene ye befili asɔneyɛɛ sua ne anu; na berɛ ne ala bɛtotole anoa nemɔ nu. 31Na mmerɛ bɔ bɛyɛle kyɛ beku ye nen, Roman asraafoɛ panyi ne tele kyɛ basabasa asi Yerusalem. 32Na berɛ ne ala, ɔfale asraafoɛ mbanyi ne asraafoɛ ne bie, na bɛhane bɛ nwo bɛhɔle ɛlɔen ne anu. Na benwuni asraafoɛ panyi ne ne asraafoɛ nen, bɛyakyili Pɔɔlo bolɛ. 33Asraafoɛ panyi ne ɔɔsɔle Pɔɔlo nu na ɔmaa bɛfale ngɔnzɔngɔnzɔ nyɔ beguale ye, na afei obisale bɛ kyɛ, “Na nwa ɛhe? Wayɔ nzu?” 34Na mmenia ne bie teane nu hane edwirɛ he, yeɛ ebiemɔ koso teane nu hane edwirɛ foforɛ. Na basabasa ne ati, asraafoɛ panyi ne angora annwu nikyee pɔtee bɔ wasi ɔ, yiti ɔhyɛle kyɛ asraafoɛ nemɔ befa Pɔɔlo beewura nu wɔ b’adwuma nu dɔ. 35Mmerɛ bɔ odwuli ndweleɛ ne aso nen, bɛpagyale ye bɛhɔle anwuro, ɔnate kyɛ né ɛlɔen ne nye aboro paa. 36Na ɛlɔen ne tu lili ye si bɛteateane nu kyɛ, “Behu ye befi berɛ!”

Pɔɔlo ye ye noa fa sa ye nwo

37Mmerɛ bɔ asraafoɛ ne yɛle kyɛ bɛfa Pɔɔlo bɛkɔ b’adwuma nu dɔ nen, osele asraafoɛ panyi ne kyɛ, “Aso mekora mekã edwirɛ kãa mekyire wɔ?” Na obuale kyɛ, “Ɛka Hela dwudwolɛ hɔ ɔ? 38Yiti nna wɔ ole Misraimniɛ bie bɔ ɛlɛsa ye ɔyɔle basabasa (tiale awaen ne,) na ɔfale awudifoɛ amammɔyɛfoɛ apee nna tɔle ɛserɛ so dɔ ne?” 39Na Pɔɔlo buale kyɛ, “Nde Yudaniɛ, mvi Taaso bɔ ɔwɔ Kilikia, kuro bɔ bɔ wale dumaa so niɛ. Mmvi kuro nwunyanwunya so. Mesrɛ wɔ, maa ndwudwo ngyire ɛlɔen ne.” 40Na asraafoɛ panyi ne mane ye ate, yiti Pɔɔlo gyinane ndweleɛ ne aso, na ɔmane ye sa so bobole ɛlɔen ne. Na berɛ yɛle dinn ne, odwudwo hyirele bɛ wɔ Hebri dwudwolɛ nu kyɛ,

Currently Selected:

Asomafoɛ 21: EBP

Highlight

Copy

Compare