Asomafoɛ 17

Pɔɔlo ne Silase kɔ Tɛsalonika

1Pɔɔlo ne Silase bɛpɛle nu wɔ Amfipoli ne Apolonia bɛwale Tɛsalonika, nekaa bɔ Yudafoɛ nyianu sua wɔ ɔ. 2Na kyɛbɔ né Pɔɔlo taa yɔ ne, ɔhɔle nyianu sua ne anu, na ɔne bɛ yɔle Ahyerɛlɛ ne anu ngyerɛkyerɛ afofikyẽa sɔ alaa pɛen nza. 3Ohyirehyirele nu lili ye nwo adanzeɛ kyɛ, né ɔsɛ kyɛ Kristo ne nwu amaneɛ na odwɔso fi awufoɛ nu. Na ɔhane kyɛ, “Sɔ Yesu he bɔ mekã ye nwo dwirɛ mekyire ɛmɔ ne, ye ole Kristo ne.” 4Bɛ nu biemɔ lele edwirɛ ne lili, na bɛfale bɛ nwo bɛbɔle Pɔɔlo ne Silase; sɔ ala yeɛ Helafoɛ nyamesurofoɛ pee ne mmrasua atitirefoɛ pee koso yɔle ɔ.

5Nakoso Yudafoɛ bɔ banne banni ne, bɛ nye borole, yiti bɛfale ammɔbrafoɛ kekakekafoɛ biemɔ bɛbokale bɛ nwo so, bɛmane ɛlɔen yiale, na bɛmane kuro berɛ yɛle basabasa. Bɛpɛle Yason sua nwo beyiale, bɔ né bɛpena kyɛ bɛtwe bɛ befite bɛbrɛ ɛlɔen ne ɔ. 6Na bannwu bɛ nen, bɛhwene Yason ne agyidifoɛ ne biemɔ bɛɛmane kuro ne anu mbanyi mɔ, na bɛteateane nu kyɛ, “Mmenia hemɔ bɔ bama ewiase amukoraa ayɛ basabasa ne, bawa wa koso, 7na Yason asikye bɛ wɔ ye awuro. Bɛ mukoraa bebu Kaesare mmeraa so, na bɛnwa ɛhene bieku koso wɔ berɛ bɔ oli Yesu ɔ.” 8Na ɛlɔen ne ne kuro ne anu mbanyi nemɔ tele sɔ dwirɛ nen, ɔhale bɛ paa. 9Na bɛmane Yason ne bɛ ngaa nemɔ belili agyinamuɛ bɛmane bɛ,#17.9: Agyinamuɛ ne kyire kyɛ sɛ bɛyɔ sɔ nikyee ne bieku a, bɛ sa ngɔhã bɛ sikaa ne ko. na bɛyakyili bɛ maa bɛhɔle.

Pɔɔlo ne Silase wɔ Bɛrea

10Na aleɛ sane pɛ, aliɛmaa nemɔ mane Pɔɔlo ne Silase bɛhɔle Bɛrea. Beedwuli ne, bɛhɔle Yudafoɛ nyianu sua nu. 11Na sɔ Yudafoɛ nemɔ, né b’adwene nu api tra bɛ bɔ bɛwɔ Tɛsalonika ne, ɔnate kyɛ bɛyele bɛ kunu betiele edwirɛ ne; na daa biala bɛneaneane Ahyerɛlɛ ne anu kyɛ, aso edwirɛ ne, ye ala ɛne a. 12Yiti bɛ nu pee, yeɛ afei Hela mmrasua atitirefoɛ pee ne Hela mmienzua pee lele edwirɛ ne lili. 13Nakoso mmerɛ bɔ Yudafoɛ bɔ bɛwɔ Tɛsalonika ne bɛtele kyɛ Pɔɔlo waahã Nyameɛ dwirɛ ne wɔ Bɛrea koso nen, bɛwale berɛ bɛɛto beguale mmenia nemɔ so anu bɛsɛkyele b’adwene. 14Na berɛ ne ala agyidifoɛ ne guale Pɔɔlo ate maa ɔhɔle mboanoa, nakoso Silase ne Timoteo de, bɛhale Bɛrea. 15Na bɛ bɔ beesomane Pɔɔlo ate ne, bɛfale ye beedwuli Atense, na besa bɛkɔ nen, ɔfale ngraa maa bɛɛmane Silase ne Timoteo kyɛ bɛma bɛ nwo yɛ nyera bɛɛboka ye so.

Pɔɔlo ka nzɛmba kyire Atensefoɛ

16Mmerɛ bɔ Pɔɔlo nwondɛ Silase ne Timoteo wɔ Atense nen, onwuni kyɛ bosoensolɛ ayi kuro ne anu tɛkyɛ; yiti ɔhale ye paa. 17Yiti ɔne Yudafoɛ ne Amaenmaensofoɛ nyamesurofoɛ bɛyɛle mbɛnzɛmbɛnzɛmuɛ wɔ nyianu sua nu, na daa biala ɔne bɛ bɔ bɛwɔ dwaaso koso yɔle sɔ ala. 18Na nwomanimfoɛ fekue nyɔ bie bɔ bɛfrɛ bɛ Epikurofoɛ ne Setokifoɛ koso ne ye suli aporowaa. Ebiemɔ hane kyɛ, “Akoaa he bɔ ɔnze hwee ye, nzu yeɛ okyire ye?” Na biemɔ koso hane kyɛ, “Osoma kyɛ ɔ́ka mmosoen ɛwɔfoɛ biemɔ nwo dwirɛ.” Bɛhane sɔ, ɔnate kyɛ né Pɔɔlo ka Yesu ne ewutingyelɛ nwo dwirɛ. 19Yiti bɛ ne ye hɔle Areopago#17.19: Areopago te nekaa bɔ bɛbɔ dwaa ɔ. na bɛhane kyɛ, “Ɛkɔhora kohyire yɛ ngyerɛkyerɛ foforɛ bɔ ɛkã ye nwo dwirɛ ne bo? 20Ɔnate kyɛ yɛttele edwirɛ bɔ ɛkã ne bie le, na yɛpena kyɛ ekyire yɛ ye bo.” 21Ɔnate kyɛ, Atensefoɛ ne ɛwɔfoɛ mɔ bɔ baatena berɛ ne amukoraa, né bɛmbena nikye fee bɛnyɔ te kyɛ edwirɛ foforɛ bɔ bekonya bekotie anaakyɛ bɔ bɛkɔhã ɔ.

Pɔɔlo noa dwirɛ wɔ Areopago

22Na Pɔɔlo dwɔso gyinane Areopago n’afia berɛ hane kyɛ, “Atensefoɛ, menwu kyɛ ɛmɔafa ɛmɔ gyidie bawura ɛsom ahoroɔ nu paa. 23Ofikyɛ manate kuro ye anu, na manwu nningyein ahoroɔ bɔ ɛmɔsɔne bɛ ɔ. Manwu afɔleɛ bokyea ko bɔ bahyerɛ so kyɛ, ‘Ɛhe te nyameɛ bɔ yɛnze ye ne deɛ.’ Na bɔ ɛmɔsɔne ye nakoso ɛmɔnze ye ne, ye nwo dwirɛ yeɛ mekã mekyire ɛmɔ ye. 24#1 Ahe 8.27; Yes 42.5; Aso 7.48 Nyameɛ bɔ ɔbɔle wiase ne nu nningyein amukoraa ne, ye bɔ ɔte nyameɛso ne aseɛ Mene ne, nna asɔneyɛɛ sua mɔ bɔ bafa bɛ sa basi ɔ nu yeɛ ɔte ɔ, 25yeɛ nna sona sa yeɛ bɛfa bɛsɔne ye ɔ, kyɛ ebiaa ohia nikyee bie ɔ; ofikyɛ ye bɔbɔ yeɛ ɔma sona biala ngoa ne nwomeɛ ne nikyee biala ɔ; 26na ɔbɔle mmenia bɔ bɛwɔ maen amukoraa nu fili sona komapɛ nu maa bɛtenane aseɛ ye aso amukoraa. Na ɔhyehyɛle mmerɛ ahoroɔ ne nekaa biala bɔ bɛkɔtena ɔ ye wɛen so tole berɛ mane bɛ, 27kyɛ bɛpena Awurade si atee, amaa sɛ bɛpena ye a, banwu ye; nakoso ɔne yɛ nu biala afia atee anwa. 28Ofikyɛ,

‘Ye nu yeɛ yɛte ase, yɛkɔ yɛba, ná yɛnya ngoa ɔ’;

kyɛbɔ ɛmɔ edweintolɛfoɛ ne biemɔ bahã kyɛ,

‘Ofikyɛ yɛ koso yɛte ye mma.’

29Na ɔnate kyɛ yɛte Nyameɛ mma ne ati, ɔnzɛ kyɛ yɛdwene kyɛ Nyameɛ sue te kyɛ esikaa kɔkorɛ, anaa ɛdwetɛ, anaa nyɔboɛ bɔ kuro sona afa ye sa ne ye nworɛ wali adwii wayɔ ɔ. 30Mmerɛ bɔ né mmenia bennya bennwuni Nyameɛ yé nen, obuli ye nye guale so; nakoso kekesaala ye de, ɔhyɛ ebiala bɔ ɔwɔ nekaa biala ɔ kyɛ ɔsakyera ye adwene, 31#Edw 9.8; 96.13; 98.9 ofikyɛ watu kyẽa ko bie wasie berɛ, bɔ ɔkɔfa sona bie bɔ waneanea nu waye ye ɔ so kobua ewiase amukoraa ndɛen tenenee nu ɔ. Na wali ɛhe nwo adanzeɛ wahyire wɔ etingyɛlɛ bɔ otingyele ye fili awufoɛ nu ne, kyɛ mmenia amukoraa bele ye beli.”

32Na mmerɛ bɔ bɛtele awufoɛ etingyelɛ nwo dwirɛ nen, bɛ nu biemɔ serele Pɔɔlo; na ebiemɔ koso hane kyɛ, “Yɛkuro kyɛ esa si dwirɛ he aso bieku mmerɛ foforɛ.” 33Yiti Pɔɔlo fili nyianu ne abo hɔle. 34Nakoso mmenia ne bie fale bɛ nwo bɛbɔle ye bɛyɛle agyidifoɛ; ebiemɔ ole Dionisio bɔ ɔboka Areopago fekue ne aso ne, yeɛ afei braa bie bɔ oli Damari, ɔne ebiemɔ bɔ bɛboka bɛ so ɔ.

Currently Selected:

Asomafoɛ 17: EBP

Highlight

Copy

Compare