Asomafoɛ 14

Pɔɔlo ne Banaba kã nzɛmba wɔ Yikoniom

1Na ɔwale kyɛ Yikoniom koso, bɛ munyɔ bɛhɔle Yudafoɛ nyianu sua nu, na kyɛbɔ besi bedwudwole ne, ɔmane Yudafoɛ ne Helafoɛ pee bele belili. 2Nakoso Yudafoɛ bɔ banne dwirɛ ne banni ne, bɛsɛkyele Amaenmaensofoɛ nemɔ adwene, na bɛmaa benyane aliɛmaa nemɔ nwo adwene tɛɛ. 3Nakoso bɛtenane berɛ bɛhyɛle; besili b’ahone bedwudwole wɔ Awurade nu, na ye koso olili ye adom dwirɛ ne nwo adanzeɛ, na ɔfale bɛ so yɔle nzɛngyerɛnneɛ ne anwanwadeɛ. 4Nakoso kuro berɛ ama nu hyɛle nyɔ; bue ko gyi Yudafoɛ nemɔ si, yeɛ bue ko koso gyi asomafoɛ nemɔ si.

5Nziɛ ye, Helafoɛ ne Yudafoɛ biemɔ ne bɛ mbanyi mɔ yɛle adwene kyɛ bɛkɔhyɛ Pɔɔlo ne Banaba anyeborolɛ na baboro bɛ nyɔboɛ. 6Na bɛtele sɔ dwirɛ nen, bɛnwati bɛhɔle Lisetra ne Dɛɛbi bɔ bɛwɔ Likaonia, ɔne nguraa mɔ bɔ bɛwɔ berɛ nemɔ aso, 7na bɛhane nzɛmba ne wɔ berɛ.

Pɔɔlo ne Banaba kɔ Lisetra ne Dɛɛbi

8Né biaa bie wɔ Lisetra, opofo aseɛnwo, bɔ ɔngora ngyina ye gya so ɔ. Bɛwole ye bubuaniɛ, na né ɔnnatele le. 9Né otie edwirɛ bɔ Pɔɔlo ɔkã ne; na Pɔɔlo neane ye haa, na onwuni kyɛ biaa ne le gyidie kyɛ okonya ayaresa ɔ. 10Yiti ɔteane nu sele ye kyɛ, “Dwɔso gyina wɔ gya so fɔngɔnn!” Na ohuru gyinane, na ɔnatele. 11Na ɛlɔen ne nwuni nikyee bɔ Pɔɔlo ayɔ nen, bɛteateane nu wɔ Likaonia dwudwolɛ nu kyɛ, “Mmosoen nemɔ bayeyɛ bɛ nwo kyɛ mmenia badwu bawa yɛ wa!” 12Yiti bɛfrɛle Banaba Seuse,#14.12: Seuse ne Hɛme te Helafoɛ bosoen biemɔ dumaa. yeɛ Pɔɔlo koso bɛfrɛle ye Hɛme, ɔnate kyɛ né Pɔɔlo yeɛ odwudwo ma bɛ ɔ. 13Na bosoen Seuse bɔ ye asɔneyɛɛ sua wɔ kuro ne tiwaa ne, ye kɔmeɛ fale nandwie ne flawase wale kuro berɛ pambim ne anwo, na ɔyɛle kyɛ ɔne ɛlɔen ne bɛbaafa bɛbɔ afɔleɛ.

14Na mmerɛ bɔ Banaba ne Pɔɔlo tele sɔ dwirɛ nen, besunzuale bɛ ndaadeɛ#14.14: Besunzuale nu behyirele kyɛ bɔ mmenia nemɔ yɔ ne te musue dwirɛ. nu; betuli amirika bɛhɔle mmenia ne anu, na bɛteateane nu kyɛ, 15#Ɛks 20.11; Edw 146.6 “Biamɔ, nzu ati yeɛ ɛmɔyɔ sɔ ye? Yɛ koso yɛte mmenia kyɛ ɛmɔ ala! Yɛwale kyɛ yɛbaabɔ nzɛmba ne dawure yɛkyire ɛmɔ, kyɛ ɛ́mɔhwe ɛmɔ nwo befi sɔ nningyein mbaen mbaen hemɔ nwo, ná ɛ́mɔfa ɛmɔ nwo bɛma Nyameɛ teasefoɛ bɔ ɔbɔle nyameɛso ne aseɛ ne ɛpo ne bɔ ɔwɔ bɛ nu amukoraa ne. 16Daa tete mmerɛ bɔ wapɛ nu ne de, ɔmane maen maen amukoraa ate maa bɛyɔle bɔ bekuro ɔ, 17nakoso wanyakyi ye nwo adanzeɛlilɛ, ofikyɛ ɔyɛle paa, na ɔmane yɛ nzue fili nyameɛso, ɔne mmerɛ bɔ aleɛ ba ɔ, ɔmane ɛmɔ aleɛ, na ɔmaa yɛnya aleɛ ne anigye ma yɛ kunu dwo yɛ fɔnn.” 18Na edwirɛ bɔ bɛhane ne mukoraa asi ne po, bɛhã bɛfɛle paa koraka yeɛ bɛkora bɛma mmenia ne yakyi afɔleɛ bɔ ahaa bɛbaabɔ bɛma bɛ ne ɔ.

Bɛborole Pɔɔlo nyɔboɛ

19 # 2 Kor 11.25 Na Yudafoɛ biemɔ fili Antiokia ne Yikoniom bɛwale berɛ; betuli mmenia ne foɛ tɛɛ, na bɛborole Pɔɔlo nyɔboɛ bɛhwene ye befili kuro ne anu; né besusuli kyɛ wawu. 20Nakoso mmerɛ bɔ asuafoɛ nemɔ pɛle ye nwo yiale ne, odwɔsole, na osa hɔle kuro ne anu. Na aleɛ hyene ne, ɔne Banaba befili berɛ bɛhɔle Dɛɛbi.

Pɔɔlo ne Banaba sa kɔ Antiokia

21Na bɛhane nzɛmba ne behyirele kuro berɛ ama, ná benyane asuafoɛ pee nen, afei besa bɛhɔle Lisetra, Yikoniom ne Antiokia, 22na bɛhyɛle asuafoɛ nemɔ kra nguraen, betuli bɛ foɛ kyɛ bɛhɔ so begyina pindinn wɔ gyidie ne anu, na bɛhane kyɛ, ɔsɛ kyɛ yɛfa amaneɛnwunɛ pee nu yɛkɔ Nyameɛ ahennie nu. 23Na besili asɔre biala nu mbanyi bɛmane bɛ, na bɛfale mbaeɛbɔlɛ ne akɔngyere betuli bɛ bewurale Awurade bɔ bale ye bali ne sa.

24Afei bɛɛpɛle nu Pisidia bɛwale Pamfilia. 25Na bɛhane nzɛmba ne wɔ Pɛɛga nen, bɛtoale so bɛhɔle Atalia. 26#Aso 13.1-3 Na befili berɛ bɛfale ɛlɛen bɛwale Antiokia, nekaa bɔ bɛfale bɛ bewurale Nyameɛ adom ne sa bɛmane adwuma bɔ bayɔ bayie ne. 27Beedwuli berɛ ne, bɛmane asɔre mma ne yiale, na bɛhane nikyee biala bɔ Nyameɛ afa bɛ so wayɔ ɔ behyirele bɛ, ɔne kyɛbɔ wasi wabukye gyidie anoa wama Amaenmaensofoɛ koso ɔ. 28Na bɛne asuafoɛ nemɔ bɛtenane berɛ bɛhyɛle.

Currently Selected:

Asomafoɛ 14: EBP

Highlight

Copy

Compare