Asomafoɛ 10

Petro ne Kɔneleo

1 # Aso 11.4-17 Né biaa bie wɔ Kaesarea bɔ ye dumaa li Kɔneleo ɔ. Ɔte asraafoɛ ɛyaa so panyi wɔ fekue bɔ bɛfrɛ ye Yitalia Fekue ne anu. 2Ɔte nyamesuroniɛ bɔ ɔne ye awuro ama mukoraati besuro Nyameɛ ɔ. Osa yɔle adɔeɛ pee mane Yudafoɛ ehiafoɛ, na né ɔtaa bɔ mbaeɛ kyire Nyameɛ. 3Ɛlɛho bie eyia kɔyɛ nnɔnmmiɛnza onyane nyekyire. Nyameɛ abɔfo wale ye awuro na onwuni ye pefee. Na abɔfo ne bɔle ye dumaa kyɛ, “Kɔneleo!” 4Ɔfale esuronyi neane abɔfo ne haa na ɔhane kyɛ, “Yɛ mene, nzikyɛ dwirɛ ɔ?” Na obuale ye kyɛ, “Wɔ mbaeɛ ne w’adɔeɛ bɔ ayɔ ama ehiafoɛ ne adwu Nyameɛ nyunu, na ye wora offili wɔ. 5Yiti kekesaala ye, soma mmenia maa bɛhɔ Yopa bɛɛfa Simɔn bie bɔ besa bɛfrɛ ye Petro ne bɛbra. 6Ɔte Simɔn bie bɔ owura naen nwomaa ayire, bɔ ye awuro wɔ mboanoa ne berɛ.” 7Na abɔfo ne dwudwo hyirele Kɔneleo yiele, ná ɔhɔle nen, Kɔneleo frɛle ye somvoɛ nemɔ anu nyɔ ne asraaniɛ nyamesuroniɛ ko bɔ ɔboka Kɔneleo somvoɛ nemɔ aso ɔ. 8Ɔhane bɔ wasi ne amukoraa hyirele bɛ, na ɔsomane bɛ Yopa.

9Aleɛ hyene, na ɔbɔle kɔyɛ eyia duabien nen, né bɛwɔ atee so bɔ bapingye Yopa ɔ; na sɔ mmerɛ ne, Petro fole sua frɛtɛɛ so anwuro kyɛ ɔkwaabɔ mbaeɛ. 10Ɛhɔen huni ye bɔ né ɔpena nikyee kã ye noa ɔ; na begu so bɔ bɛto aleɛ ne nen, ngɔle nyekyire tebea nu. 11Na onwuni kyɛ anwuro abukye, na nikyee bie bɔ ɔte kyɛ nwera pirikua, bɔ basosɔ ye noa nna ne anu odwu ba ase ɔ. 12Né ngaka amukoraa nu bie wɔ nu, ndɔteboa ne bɛ bɔ bɛtwe bɛ nwo ase ne ewienu nnomaa. 13Na komviɛ bie sele ye kyɛ, “Petro, dwɔso ná ku bɛ di!” 14Na Petro sele kyɛ, “Daabi, Awurade, ofikyɛ nnnili nikyee biala bɔ bekyi na ye nwo nde le.”

15Na ɔtele dwudwolɛ bieku kyɛ, “Nikyee biala bɔ Nyameɛ ate ye nwo kyɛ beli ne, nnɛbu ye kyɛ ɔte akyiwadeɛ.” 16Ɛhe hɔle so alaa pɛen nza, na besa bɛfale sɔ nikyee ne bɛhɔle nyameɛso.

17Mmerɛ bɔ Petro ne ye nwo besu aporowaa ɔpena nyekyire he abo nen, né mmenia bɔ Kɔneleo asoma bɛ ne babisabisa alaa baanwu Simɔn awuro. Né begyigyi awuro n’anoa nu berɛ. 18Na bɛfrɛle bebisale kyɛ, “Simɔn bie bɔ besa bɛfrɛ ye Petro ne, ɔte wa anaa?”

19Na Petro gu so ɔdwenedwene nyekyire ne nwo nen, Sunzum ne sele ye kyɛ, “Nea, mmenia nza bie bɛpena wɔ. 20Yiti ma wɔ nwo yɛ nyera dwu ase na ɛne bɛ hɔ, na nnɛtwetwe wɔ gya ase koraa, ofikyɛ me yeɛ masoma bɛ ɔ.” 21Yiti Petro dwu hɔle mmenia bɔ Kɔneleo somane bɛ wɔ ye berɛ nemɔ nwo berɛ, na osele kyɛ, “Me ole sona bɔ ɛmɔpena ye ne; ɛmɔ atee so?” 22Na bɛbɔle b’amaneɛ kyɛ, “Asraafoɛ ɛyaa so panyi Kɔneleo yeɛ ɔsomane yɛ ɔ. Ɔte sona paa, nyamesuroniɛ, na Yuda maen ne amukoraa bɔ ye dumaa paa. Na Nyameɛ abɔfo aye ahyire ye kyɛ ɔto ye sa frɛ wɔ ma ɛbra ye awuro, na otie wɔ noa dwirɛ.” 23Yiti Petro fale bɛ hɔle awuro, na ɔmaa besiele nningyein bɛmane ye. Na aleɛ hyene ne, Petro boaboale ye nwo ɔne bɛ hɔle; agyidifoɛ bɔ bɛwɔ Yopa ne bie koso ne ye hɔle.

Petro kɔ Kɔneleo awuro

24Aleɛ hyene bieku ne, bedwuli Kaesarea. Né Kɔneleo ɔnea bɛ ate, na né wato ye sa wafrɛ ye abusuafoɛ ne ye damvo paa mɔ maa baayia nu. 25Na mmerɛ bɔ Petro yɛle kyɛ owura awuro ne anu ne, Kɔneleo hɔle ooyiale ye, na ɔtole ye nwo yele ye gya bo sɔnene ye. 26Nakoso Petro maa odwɔsole, na osele ye kyɛ, “Dwɔso, na me koso nde kuro sona.” 27Né Petro gu so ɔne Kɔneleo bedi ngɔmɔ, owurale awuro ne anu, na onwuni kyɛ mmenia pee bayia berɛ. 28Na osele bɛ kyɛ, “Ɛmɔ bɔbɔ ɛmɔse kyɛ otia mmeraa kyɛ Yudaniɛ ɔkɔfa ye nwo kɔbɔ Amaenmaensoniɛ anaakyɛ ɔkɔhɔ ye awuro kɔɔsra ye ɔ. Nakoso Nyameɛ aye ahyire me kyɛ onni kyɛ mebu sona biala kyɛ ɔbboka yɛ so, anaakyɛ ye nwo nde. 29Yiti yeɛ ɔmaa mambopo me ti wɔ mmerɛ bɔ ɛmɔtole bɛ sa bɛfrɛle me ne. Na afei mepena kyɛ menwu nikyee bɔ yiti yeɛ ɛmɔsomane kyɛ bɛɛfa me ne.”

30Kɔneleo buale kyɛ, “Ɛlɛnna ɛhe, kɔyɛ bekye sɔa ala, né mebɔ mbaeɛ wɔ m’awuro wa eyia nnɔnmmiɛnza. Na nwuni bienzua bie bɔ owura ataadeɛ hyɛnn kyɛ ogyi me nyunu, 31na osele me kyɛ, ‘Kɔneleo, Nyameɛ ate wɔ mbaeɛbɔlɛ, na ye wora offili w’adɔeɛ bɔ ayɔ ama ehiafoɛ ɔ. 32Yiti soma mmenia ma bɛhɔ Yopa bɛɛfa Simɔn bie bɔ besa bɛfrɛ ye Petro ne bɛbra. Ɔte Simɔn bie bɔ owura naen nwomaa ayire, bɔ ye awuro wɔ mboanoa ne berɛ.’ 33Ɛhe ati berɛ ne ala nzomane kyɛ bɛɛfa wɔ bɛbra, na wɔ koso ayɔ nikyee kyɛ awa ɔ. Yiti kekesaala ye, yɛ mukoraa yayia Nyameɛ nyunu wɔ wa, kyɛ yɛbaatie nikyee biala bɔ Awurade ahyɛ wɔ kyɛ ɛha hyire yɛ ɔ.”

Petro noa dwirɛ wɔ Kɔneleo awuro

34 # Deut 10.17 Na Petro sele kyɛ, “Nahorɛ nu, manwu kyɛ Nyameɛ nyɛ nyeyemuɛ, 35na mmom maen biala nu, ebiala bɔ osuro ye, ná ɔyɔ bɔ ɔtengyɛ ne, ode ye to nu. 36Ɛmɔse edwirɛ bɔ ɔfa brɛle Yisrael ɔ, mmerɛ bɔ ɔnate Yesu Kristo so ɔbɔle asomdwee nzɛmba ne nwo dawure ne; ye yeɛ ɔte ebiala Awurade ɔ. 37Ɛmɔse edwirɛ bɔ bɛbɔle ye dawure wɔ Yudea amukoraa, bɔ bɛhyɛle ye bo wɔ Galilea, asubɔlɛ bɔ Yahane hane ye nwo dwirɛ ne asi ne: 38kyɛbɔ Nyameɛ fale Sunzum Krongron ne tumi popale Yesu bɔ ofi Nasarɛte; kyɛbɔ ohyinihyini yɛlɛ paa, ɔsale bɛ bɔ abɔnzam hyɛ bɛ so amukoraa anwonyerɛ ɔ, ofikyɛ Nyameɛ boka ye so. 39Yɛte nikyee biala bɔ ɔyɔle wɔ Yisrael maen nu ne Yerusalem mukoraa nwo adanzefoɛ. Bɛbɔle ye mmeamudua nu behuni ye, 40nakoso ye ɛlɛsa ne aso Nyameɛ tingyele ye fili ewue nu, na ɔmaa ɔyele ye nwo ali pefee hyirele. 41Wanye ye nwo ali wangyire mmenia mukoraa, sana yɛ bɔ yɛte adanzefoɛ bɔ Nyameɛ aye yɛ dada nen; bɔ ye wutingyelɛ asi ne, yɛne ye didili na yɛnone ne. 42Na ɔhyɛle yɛ kyɛ yɛbɔ nzɛmba ne dawure yɛhyire mmenia mukoraa, ná yɛli adanzeɛ kyɛ, ye yeɛ Nyameɛ aye ye kyɛ ɔyɛ ateasefoɛ ne awufoɛ ndɛenbualɛniɛ ɔ. 43Ye yeɛ Nyameɛ ngɔmhyɛlɛfoɛ ne amukoraa lili ye nwo adanzeɛ kyɛ ebiala bɔ ode ye di ne, ɔnate ye dumaa nu konya bɔnefakyɛ ɔ.”

Amaenmaensofoɛ nya Sunzum Krongron ne

44Mmerɛ bɔ Petro gu so odwudwo ne, Sunzum Krongron ne wale mmenia mukoraa bɔ betie ye dwirɛ ne aso. 45Na agyidifoɛ bɔ befi bienzuapɛlɛfoɛ nu bɔ bɛne Petro wale ne, ɔyɛle bɛ nwanwa kyɛ bahwie Sunzum Krongron akyɛdeɛ ne bagua Amaenmaensofoɛ mɔ koso so ɔ, 46ɔnate kyɛ bɛtele kyɛ mmenia ne akakyi bɛ temverema bɛ́kã dwudwolɛ foforɛ ná bɛkamvo Nyameɛ ɔ. Na Petro hane kyɛ, 47“Sɔ mmenia hemɔ anya Sunzum Krongron ne kyɛbɔ yɛ koso yɛnyane ne ala. Aso ebie kɔhora kosi bɛ ate kyɛ nnɛmaa bɛfa nzue bɛbɔ bɛ asu anaa?” 48Yiti ɔmaa bɛbɔle bɛ asu wɔ Awurade dumaa nu. Yeɛ bɛsrɛle ye kyɛ oli bɛ nwo berɛ kɔyɛ ɛlɛsa ko.

Currently Selected:

Asomafoɛ 10: EBP

Highlight

Copy

Compare