ZEPANIA 3
3
MOKUNA III.
1 Nā pōʻino o Ierusalema, no ka hewa o ia wahi. 8 Nā ʻōlelo hoʻomaikaʻi i nā haipule. 14 Ua hōʻike ʻia nā mea e ʻoliʻoli ai.
1¶ Auē ka mea e kipi ana, a me ka mea haumia,
Ke kūlanakauhale hoʻokoʻikoʻi.
2ʻAʻole ia i hoʻolohe i ka leo,
ʻAʻole hoʻi i ʻae aku i ke aʻo ʻia mai;
ʻAʻole hoʻi ia i paulele iā Iēhova,
ʻAʻole ia i hoʻokokoke aku i kona Akua.
3ʻO nā aliʻi i loko ona, he poʻe liona uō lākou;
ʻO nā luna kānāwai ona, he poʻe ʻīlio hae o ke ahiahi;
ʻAʻole lākou e hoʻokoe a hiki i ke kakahiaka.
4He poʻe haʻaheo nā kāula ona, nā kānaka hoʻopunipuni;
Ua hoʻohaumia nā kāhuna ona i ke keʻena kapu,
Ua haʻihaʻi lākou i ke kānāwai.
5I waenakonu o lākou ʻo Iēhova ka mea hoʻopono,
ʻAʻole ia e hana i ka pono ʻole;
E hoʻākāka mai ana ia i kona pono ia kakahiaka aʻe, ia kakahiaka aʻe,
ʻAʻole hāʻule;
Akā, ʻo ka mea hana hewa, ʻaʻole ia i hoʻomaopopo i ka hilahila.
6“Ua hōʻoki iho au i nā lāhui kanaka;
Ua hoʻohiolo ʻia nā pā kaua o lākou;
Ua hoʻoneoneo au i ko lākou mau alanui,
I māʻalo ʻole aʻe kekahi i laila;
Ua hoʻohina ʻia nā kūlanakauhale o lākou,
A koe ʻole kekahi, ʻaʻole hoʻi e noho ana kekahi kanaka i loko.
7“ʻŌlelo ihola au, ‘Inā ʻoe e makaʻu mai iaʻu,
A e ʻae mai i ke aʻo ʻia,’
I hōʻoki ʻole ʻia ai kona noho ʻana,
E like me nā mea aʻu e ʻōlelo mua ai nona;
Akā, ua ala lākou i ka wanaʻao, e hoʻohaumia i kā lākou hana a pau.
8¶ “No ia mea, e kali ʻoukou iaʻu,” wahi a Iēhova,
“A hiki i ka lā aʻu e kū aʻe ai i ka waiwai pio;
No ka mea, ʻo kuʻu manaʻo nō e hōʻuluʻulu i nā lāhui kanaka,
E hoʻākoakoa i ko nā aupuni,
E ninini iho i kuʻu inaina ma luna o lākou,
I ka wela a pau o koʻu huhū;
No ka mea, e pau auaneʻi ka honua a pau
I ke ahi o kuʻu lili.
9“A laila au e hāʻawi aku ai i nā kānaka i ka lehelehe maikaʻi,
I kāhea aku ai lākou a pau i ka inoa ʻo Iēhova,
A e hoʻokauā aku ai nāna me ka poʻohiwi hoʻokahi.
10“Mai nā ʻāina mai o ka muliwai ʻo ʻAitiopa,
E lawe mai ana koʻu poʻe haipule, ʻo ke kaikamahine o koʻu poʻe hele liʻiliʻi,
I ʻālana naʻu.
11“Ia lā nō, ʻaʻole ʻoe e hilahila
I kāu hana ʻana a pau,
I nā mea āu i lawehala ai iaʻu;
No ka mea, a laila au e lawe aku ai mai ou aku lā
I kou poʻe e ʻoliʻoli i ka hoʻokiʻekiʻe;
I ʻole ai ʻoe e hoʻokiʻekiʻe hou aku
Ma kuʻu mauna hoʻāno.
12“A e hoʻolilo au i nā kānaka i koe i waena o ʻoukou
I poʻe haʻahaʻa, a me ka ʻilihune,
A e paulele auaneʻi lākou i ka inoa ʻo Iēhova.
13“ʻAʻole e hana ʻino ke koena o kā ʻIseraʻela,
ʻAʻole hoʻi e ʻōlelo hoʻopunipuni lākou;
ʻAʻole nō hoʻi e loaʻa ka elelo wahaheʻe
I loko o ko lākou waha;
Akā, e ʻai auaneʻi lākou, a e moe iho,
ʻAʻole kekahi mea e hoʻoweliweli ana iā lākou.”
14¶ E mele ʻoe, e ke kaikamahine o Ziona,
E hoʻōho aku, e kā ʻIseraʻela, e ʻoliʻoli,
E hauʻoli hoʻi me kou naʻau a pau,
E ke kaikamahine o Ierusalema.
15Ua lawe akula ʻo Iēhova i kou hoʻohewa ʻia ʻana,
Ua kipaku akula i kou poʻe ʻenemi;
ʻO Iēhova ke Aliʻi o kā ʻIseraʻela, ʻo ia nō i waena ou;
ʻAʻole hoʻi ʻoe e ʻike hou i ka hewa.
16Ia lā lā, e ʻōlelo ʻia auaneʻi iā Ierusalema,
“Mai makaʻu ʻoe, e Ziona;
Mai hoʻonāwaliwali i kou mau lima.
17“ʻO Iēhova ʻo kou Akua i waena ou,
He mana kona, e hoʻōla mai ana ʻo ia;
E ʻoliʻoli auaneʻi ʻo ia nou me ka hauʻoli,
E noho mālie ʻo ia i kona aloha,
E hauʻoli ʻo ia nou me ka mele ʻana.
18“E hōʻuluʻulu ana au i ka poʻe e ʻū ana no kāu mau ʻahaʻaina,
I lilo ai lākou nou,
Ka poʻe kaumaha i ka hōʻino ʻia nona.
19“Aia hoʻi, e hōʻauheʻe auaneʻi au i ka poʻe a pau i hoʻopilikia iā ʻoe ia manawa;
A e mālama nō au i ka mea ʻoʻopa,
A e hoʻihoʻi mai ana nō au i ka mea i kipaku ʻia aku;
A e hāʻawi au iā lākou i ka hoʻomaikaʻi ʻia, a me ka inoa kaulana,
Ma nā ʻāina a pau i hoʻohilahila ʻia ai lākou.
20“Ia manawa nō naʻu ʻoukou e alakaʻi mai,
I ka manawa aʻu e hōʻuluʻulu ai iā ʻoukou;
A e hoʻokaulana au i ko ʻoukou inoa no ka hoʻomaikaʻi ʻia i waena o nā kānaka a pau o ka honua,
I kuʻu wā e hoʻihoʻi mai ai i ko ʻoukou pio ʻana, i mua o ko ʻoukou mau maka,” wahi a Iēhova.
Currently Selected:
ZEPANIA 3: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
