ZEKARIA 4
4
MOKUNA IV.
1 Ka hihiʻo no ka ipukukui gula. 11 Na lāʻau ʻoliva ʻelua.
1¶ Hoʻi hou maila ka ʻānela i kamaʻilio me aʻu, a hoʻāla maila iaʻu, e like me ka hoʻāla ʻana i ke kanaka hiamoe.
2Nīnau maila ia iaʻu, “He aha kāu mea e ʻike nei?” ʻĪ akula au, “Ua nānā aku au, aia hoʻi, he ipukukui gula ʻokoʻa, a ma luna o kona wēlau he ipu ʻaila, a ma luna iho o laila nā kukui ʻehiku a me nā ʻohe ʻehiku no ua mau kukui ʻehiku lā e kau ana ma luna o kona wēlau.
3“He ʻelua mau lāʻau ʻoliva hoʻi e kokoke ana i laila, ʻo kekahi ma ka ʻākau, a ʻo kekahi hoʻi ma ka hema o ua ipu ʻaila lā.”
4Nīnau akula hoʻi au i ka ʻānela i kamaʻilio me aʻu, ʻī akula, “He aha ke ʻano o kēia mau mea, e kuʻu haku?”
5ʻĪ maila ka ʻānela i kamaʻilio me aʻu, “ʻAʻole anei ʻoe i ʻike i ke ʻano o kēia mau mea?” ʻĪ akula au, “ʻAʻole, e kuʻu haku.”
6A laila ʻōlelo maila kēlā, ʻī maila iaʻu, penei, “ʻO kēia ka ʻōlelo a Iēhova iā Zerubabela, i ka ʻī ʻana, ‘ʻAʻole ma ka mana, ʻaʻole ma ka ikaika; akā, ma kuʻu ʻUhane,’ wahi a Iēhova o nā kaua.
7‘He aha ʻoe, e ka mauna nui? I mua o Zerubabela, he pāpū; a e lawe mai auaneʻi ʻo ia i ka pōhaku kumu, me ka hoʻokani ʻoliʻoli ʻana, “He aloha! He aloha iā ia!”’”
8A hiki hou maila ka ʻōlelo a Iēhova i oʻu nei, i ka ʻī ʻana,
9“Ua hoʻokumu ihola nā lima o Zerubabela i kēia hale, a na kona mau lima hoʻi e hoʻopaʻa; a e ʻike auaneʻi ʻoe, na Iēhova o nā kaua wau i hoʻouna mai i o ʻoukou lā.
10“Na wai lā i hoʻowahāwahā i ka lā o nā mea liʻiliʻi? E ʻoliʻoli auaneʻi lākou, a e ʻike hoʻi i ka pōhaku kēpau ma ka lima o Zerubabela, ʻo lākou a ʻehiku. ʻO lākou nā maka o Iēhova e hele aʻe ana mai ʻō a i ʻaneʻi ma ka honua a pau.”
11¶ A laila, nīnau akula au, ʻī akula iā ia, “He aha ke ʻano o kēlā mau ʻoliva ʻelua ma ka lima ʻākau o ka ipukukui, a ma ka lima hema ona?”
12Nīnau hou akula au, ʻī akula iā ia, “He aha kēlā mau lālā ʻoliva ʻelua e pili ana me nā ʻohe gula, e hoʻokahe ana i ka ʻaila gula mai loko mai o lāua?”
13Nīnau maila kēlā iaʻu, ʻī maila, “ʻAʻole ʻoe i ʻike i kēia mau mea?” ʻĪ akula au, “ʻAʻole, e ka haku.”
14A laila ʻī maila kēlā, “ʻO kēia nō nā kānaka ʻelua i poni ʻia i ka ʻaila e kū kokoke ana ma ka Haku o ka honua a pau.”
Currently Selected:
ZEKARIA 4: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
