KA BUKE NO RUTA 4
4
MOKUNA IV.
1 Ka nīnau ʻana o Boaza i kekahi hoahānau, a laila, mare lāua me Ruta.
1¶ A laila piʻi akula ʻo Boaza i ka puka pā, a noho ihola i laila; aia hoʻi, hele aʻela ka hoahānau a Boaza i ʻōlelo ai. ʻĪ akula kēia iā ia, “Ē, ʻo mea, e huli mai ʻoe, a e noho iho ma ʻaneʻi.” Huli maila ia a noho ihola.
2Lawe aʻela ia i nā lunakahiko o ke kūlanakauhale he ʻumi, ʻī akula, “E noho mai ʻoukou ma ʻaneʻi”; a noho maila lākou.
3ʻĪ akula ia i ka hoahānau, “ʻO Naomi, ka mea i hoʻi mai, mai ka ʻāina i Moaba mai, ke kūʻai nei ʻo ia i ka ʻāina o ke kaikuaʻana o kāua, ʻo ʻElimeleka.
4“ʻĪ ihola au, e haʻi aku nō au ma kou pepeiao, me ka ʻī ʻana aku, ‘E kiʻi aku ʻoe i mua o ke alo o nā kānaka, a me nā lunakahiko o koʻu poʻe kānaka. Inā i kūʻai ʻoe, e kūʻai nō, a i ʻole ʻoe e kūʻai, e haʻi mai ʻoe iaʻu, i ʻike au; no ka mea, ʻaʻole mea ʻē aʻe nāna e kūʻai, ʻo ʻoe wale nō, a ʻo wau ka mea ma hope ou.’” ʻĪ maila kēlā, “E kūʻai nō au.”
5ʻĪ akula ʻo Boaza, “I ka lā āu e kūʻai ai i ka ʻāina ma ka lima o Naomi, ma o Ruta lā nō kekahi e kūʻai aku ai, ma ka wahine no Moaba, ka wahine a ka mea i make, i mea e mau ai ka inoa o ka mea i make ma kona hoʻoilina.”
6ʻŌlelo maila ka hoahānau, “ʻAʻole hiki iaʻu ke kūʻai noʻu iho, o hoʻolilo auaneʻi au i koʻu hoʻoilina. Nāu nō e kūʻai i koʻu kuleana nou; no ka mea, ʻaʻole hiki iaʻu ke kūʻai.”
7¶ Eia ko ka ʻaoʻao kahiko o kā ʻIseraʻela ma ke kūʻai ʻana, a me ka hoʻonohonoho hou ʻana, i paʻa nā mea a pau. Wehe ke kanaka i kona kāmaʻa, a hāʻawi aʻela i kona hoalauna, i mea e hōʻike ai i waena o kā ʻIseraʻela.
8ʻŌlelo maila ka hoahānau iā Boaza, “E kūʻai ʻoe nou iho”; a wehe aʻela ia i kona kāmaʻa.
9ʻŌlelo aʻela ʻo Boaza i nā lunakahiko, a i nā kānaka a pau, “He poʻe ʻike ʻoukou i kēia lā, ua kūʻai au ma ka lima o Naomi i nā mea a pau o ʻElimeleka a me nā mea a pau o Kiliona, a me Mahelona.
10“A ʻo Ruta nō hoʻi, no Moaba ka wahine a Mahelona, kaʻu i kūʻai nei, i wahine naʻu, i mea e paʻa ai ka inoa o ka mea i make ma kona hoʻīlina, i mea hoʻi e hōʻoki ʻole ʻia ai ka inoa o ka mea i make, mai kona hoahānau aku, a mai kona wahi aku. He poʻe ʻike ʻoukou i kēia lā.”
11ʻĪ maila nā kānaka a pau, ma ka puka pā, a me nā lunakahiko, “He poʻe ʻike mākou. Na Iēhova nō e hoʻolilo mai i ka wahine i hele mai i loko o kou hale e like me Rāhela a me Lea, na lāua ʻelua i kūkulu i ka hale o kā ʻIseraʻela, a e waiwai hoʻi ʻoe ma ʻEperata, a e kaulana nō kou inoa ma Betelehema.
12“E like hoʻi kou hale me ka hale o Pereza, ka mea a Tamara i hānau ai na Iuda, ma ke kauhua a Iēhova e hāʻawi mai ai iā ʻoe na kēia kaikamahine.”
13¶ Lawe aʻela ʻo Boaza iā Ruta, a lilo mai ia i wahine nāna. A i kona komo ʻana i ona lā, na Iēhova i hāʻawi mai i ka hāpai ʻana, a hānau maila ia, he keiki kāne.
14ʻĪ akula nā wāhine iā Naomi, “Ua pōmaikaʻi ʻoe iā Iēhova, ka mea i hoʻonele ʻole iā ʻoe i ka hoahānau nou, i kēia lā, i kaulana kona inoa i loko o kā ʻIseraʻela.
15“Nāna nō e hoʻōla hou aku iā ʻoe, i kona mālama ʻana iā ʻoe, i kou wā e poʻo hina ai; no ka mea, ʻo kāu hūnōna wahine, i hānau mai iā ia, nāna ʻoe i aloha aku, a ua ʻoi aku kona maikaʻi nou, ma mua o nā keiki kāne ʻehiku.”
16Lawe aʻela ʻo Naomi i ua keiki lā, a waiho ihola ma kona poli, a lilo ihola ia i kahu nona.
17Kapa akula kona poʻe hoalauna wahine i kona inoa, ʻī aʻela, “Ua hānau ʻia ke keiki kāne na Naomi”; a kapa aku lākou i kona inoa, ʻo ʻObeda; ʻo ia ka makua kāne o Iese, ʻo ka makua kāne o Dāvida.
18¶ Eia nā hanauna o Pereza: na Pereza ʻo Hezerona;
19na Hezerona ʻo Rama, na Rama ʻo ʻAminadaba;
20na ʻAminadaba ʻo Nahasona, a na Nahasona ʻo Salemona;
21na Salemona ʻo Boaza, a na Boaza ʻo ʻObeda;
22na ʻObeda ʻo Iese, na Iese ʻo Dāvida.
Currently Selected:
KA BUKE NO RUTA 4: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.