NĀ ʻŌLELO AKAMAI A SOLOMONA 9
9
MOKUNA IX.
1¶ Kūkulu aʻela ka naʻauao i kona hale,
Kālai ihola ʻo ia i kona mau kia ʻehiku.
2Kālua ʻo ia i kāna mau mea momona;
Kāwili aʻela ʻo ia i kona waina;
Hoʻomākaukau nō i kāna papa ʻaina.
3Hoʻouna akula ʻo ia i kāna poʻe kauā wahine,
E hea aku ma luna o nā wahi kiʻekiʻe o ke kūlanakauhale,
4“ʻO wai ka mea naʻaupō? E huli mai ia i oʻu nei!”
I ka mea noʻonoʻo ʻole hoʻi, ʻōlelo aʻela ʻo ia iā ia,
5“Inā, e ʻai mai ʻoukou i kaʻu berena,
E inu hoʻi i ka waina aʻu i kāwili ai.
6“E haʻalele i ka poʻe manaʻo ʻole, i ola ʻoukou,
E hele hoʻi ma ke ala o ka naʻauao.”
7¶ ʻO ka mea e aʻo aku i ke kanaka ʻaiā,
E loaʻa iā ia ka hilahila;
ʻO ka mea e aʻo aku i ka mea hewa, e loaʻa iā ia ka palaheʻa.
8Mai aʻo aku i ke kanaka ʻaiā,
O hoʻowahāwahā mai ʻo ia iā ʻoe;
E aʻo aku i ka mea naʻauao,
A e aloha mai ʻo ia iā ʻoe.
9E hāʻawi na ka mea naʻauao,
A e ʻoi mau ka naʻauao;
E aʻo hoʻi i ka mea hoʻopono,
A e māhuahua aʻela kona ʻike.
10ʻO ka mole o ka naʻauao,
ʻO ia ka makaʻu iā Iēhova;
ʻO ka ʻike i ka Mea Hemolele,
ʻO ia ka noʻonoʻo ʻana.
11No ka mea, ma oʻu nei, e māhuahua aʻe ai kou mau lā,
A e nui ai hoʻi nā makahiki o kou ola ʻana.
12Inā e naʻauao ʻoe, e naʻauao nō ʻoe nou iho;
Inā e hoʻowahāwahā ʻoe, ma luna ou wale nō ia mea.
13¶ ʻO ka wahine naʻaupō, he walaʻau kona;
Ua manaʻo ʻole, ʻaʻole ʻo ia i ʻike i kekahi mea.
14Noho nō ʻo ia ma ka puka o kona hale,
Ma ka noho hoʻi ma kahi kiʻekiʻe o ke kūlanakauhale,
15E hea aku i ka poʻe hele ma ke ala,
Ka poʻe hele pololei ma ke alanui;
16“ʻO wai ka mea manaʻo ʻole? E huli mai i oʻu nei”;
I ka mea naʻaupō, ʻōlelo akula ʻo ia iā ia,
17“Ua ʻono nō nā wai i ʻaihue ʻia,
Ua mānanalo hoʻi ka berena ke ʻai malū.”
18ʻAʻole naʻe i ʻike kēlā, ma laila ka poʻe make,
Aia kona poʻe hoa ʻai i lalo loa i ka malu make.
Ka Baibala Hemolele © Partners Development Foundation, 2018.