NĀ ʻŌLELO AKAMAI A SOLOMONA 7
7
MOKUNA VII.
1¶ E kuʻu keiki ē, e mālama ʻoe i kaʻu mau ʻōlelo,
E waiho pū hoʻi i kaʻu kauoha me ʻoe.
2E mālama ʻoe i kaʻu kauoha i ola ʻoe,
A me koʻu kānāwai hoʻi, e like me ke kiʻi ʻōnohi o kou mau maka.
3E hāwele ʻoe ia mau mea ma kou mau manamana lima,
E kākau hoʻi ia mau mea ma ka papa o kou naʻau.
4E ʻī aʻe ʻoe i ka naʻauao, “ʻO ʻoe nō koʻu kaikuahine”;
E kapa aku ʻoe i ka ʻike, he hoalauna;
5I mālama ʻia ʻoe i ka wahine ʻē,
I ka malihini hoʻi i hoʻomalimali mai me kāna ʻōlelo.
6¶ No ka mea, ma ka puka o koʻu hale,
Ma koʻu puka makani, nānā akula au;
7ʻIke ihola au i waena o ka poʻe noʻonoʻo ʻole,
ʻIke ihola hoʻi au ma waena o ka poʻe ʻōpiopio,
I kekahi kanaka uʻi manaʻo ʻole.
8Hele aʻela ia ma ke ala e kokoke ana i kona huina,
Hele aʻela ʻo ia ma ke kuamoʻo e hiki aku ai i kona hale;
9I ke ahiahi, i ka napoʻo ʻana o ka lā,
I ke aumoe, i ka pōʻeleʻele;
10Aia hoʻi, hālāwai pū me ia kekahi wahine,
Ua kāhiko hoʻokamakama ʻia;
Ua maʻalea kona naʻau.
11(He walaʻau kona a me ka hoʻolohe ʻole,
ʻAʻole noho kona mau wāwae ma kona hale iho.
12I kekahi wā ma waho ʻo ia,
I kekahi wā aʻe ma ke alanui,
A hoʻohālua ʻo ia ma nā huina a pau.)
13ʻApo ihola kēlā iā ia a honi ihola,
Me ka maka hilahila ʻole, ʻī akula iā ia,
14“He mau mōhai aloha koʻu;
I kēia lā nō, mōhai akula au i kaʻu mea i hoʻohiki ai.
15“No laila, i hele mai nei au e hālāwai me ʻoe,
E ʻimi hoʻi iā ʻoe, a ua loaʻa iho nei.
16“Hohola ihola au i koʻu wahi moe me ke kapa,
Me ke kapa ʻōniʻoniʻo hoʻi mai ʻAigupita mai.
17“Kōpīpī ihola au i koʻu wahi moe
I ka mura, a me ka ʻaloe, a me ke kinamona.
18“Inā kāua i māʻona i ke aloha a hiki i kakahiaka,
E leʻaleʻa kāua i ke aloha.
19“No ka mea, ʻo ke kāne, ʻaʻole ia ma kona hale,
Ua hele ʻo ia ma kahi lōʻihi ʻē aku.
20“Lawe ʻo ia i ka ʻeke kālā ma kona lima,
A piha ka mahina, a laila, e hoʻi mai ʻo ia i kona hale.”
21Ua paʻa kēlā i ka nui o kāna ʻōlelo maʻalea;
Ua lilo hoʻi ʻo ia i ka malimali ʻana o kona mau lehelehe.
22Ukali koke ʻo ia ma hope ona,
E like me ka hele ʻana o ka bipi i kona wahi e make ai;
E like hoʻi me ka naʻaupō i hoʻopaʻi ʻia mai ma ka lāʻau kūpeʻe;
23A ʻō akula ka pua i kona ake,
E like me ka lele ʻana o ka manu i ke pahele,
ʻAʻole ona ʻike no kona ola ia.
24¶ ʻĀnō lā, e nā keiki, e hoʻolohe mai iaʻu,
E maliu mai ʻoukou i ka ʻōlelo a koʻu waha.
25Mai huli aʻe kou naʻau ma kona ʻaoʻao;
Mai hele hewa ʻoe ma kona alanui.
26No ka mea, manomano ka poʻe i hina iā ia me ka ʻeha,
Nā mea ikaika hoʻi, ua pau iā ia i ka make.
27Ma kona hale ke ala e hiki ai i ka pō,
E iho ana i lalo i ka make.
Currently Selected:
NĀ ʻŌLELO AKAMAI A SOLOMONA 7: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.