NĀ ʻŌLELO AKAMAI A SOLOMONA 30
30
MOKUNA XXX.
1¶ He mau wahi ʻōlelo a ʻAgura ke keiki a Iake. He wānana; na ke kanaka i hōʻike mai iā ʻItiʻela; iā ʻItiʻela lāua me ʻUkala.
2ʻO wau ka mea hūpō loa o nā kānaka,
ʻAʻole oʻu wahi noʻonoʻo kanaka.
3ʻAʻole i loaʻa iaʻu ka naʻauao,
ʻAʻole hoʻi oʻu ʻike i ka Mea Hemolele.
4ʻO wai ka mea i piʻi aʻe i ka lani, a i iho mai hoʻi?
ʻO wai ka mea i hoʻoʻiliʻili i ka makani ma kona lima?
ʻO wai ka mea i hoʻopaʻa i nā wai ma kona ʻaʻahu?
ʻO wai ka mea i hoʻonoho i nā welelau a pau o ka honua?
ʻO wai hoʻi kona inoa, ʻo wai ka inoa o kāna keiki?
E hōʻike mai paha ʻoe.
5¶ Pau loa nā hua ʻōlelo a ke Akua i ka maʻemaʻe;
ʻO ia ka pale kaua i ka poʻe paulele aku iā ia.
6Mai hui aʻe ʻoe i kekahi mea me kāna mau hua ʻōlelo,
O aʻo mai ʻo ia iā ʻoe, a e lilo ʻoe i mea wahaheʻe.
7¶ ʻElua mau mea aʻu i noi aku ai iā ʻoe,
Mai ʻauʻa ʻoe ma mua o koʻu make ʻana.
8ʻO ka lapuwale, a ʻo ka wahaheʻe,
E hoʻokaʻawale aʻe mai oʻu aku nei;
Mai hāʻawi mai iaʻu i ka ʻilihune, ʻaʻole hoʻi i ka waiwai;
E hānai mai iaʻu i ka ʻai kūpono noʻu;
9O hoʻokūkū ʻai au, a hōʻole aku hoʻi,
Me ka ʻī ʻana, “ʻO wai lā ʻo Iēhova?”
O ʻilihune hoʻi au a ʻaihue iho,
A hoʻohiki ʻino i ka inoa o koʻu Akua.
10¶ Mai hoʻopiʻi ʻoe i ke kauā i mua o kona haku,
O hoʻoʻino mai ʻo ia iā ʻoe, a e lilo ʻoe i lawehala.
11¶ ʻO kekahi hanauna, hōʻino nō i ka makua kāne,
ʻAʻole hoʻi i hoʻomaikaʻi i ka makuahine.
12ʻO kekahi hanauna hoʻi, he maʻemaʻe ia i ko lākou maka iho,
ʻAʻole hoʻi i holoi ʻia ka paumāʻele.
13ʻO kekahi hanauna, hoʻokano loa nā maka o lākou!
Hoʻokiʻekiʻe hoʻi nā lihilihi o lākou.
14ʻO kekahi hanauna, he mau pahi kaua ko lākou niho,
He mau pahi hoʻi ko lākou mau kuʻi.
E ʻai ana i ka poʻe ʻilihune mai ka honua aku,
A ʻo ka poʻe nele hoʻi i waena o nā kānaka.
15¶ He mau kaikamāhine ʻelua kā ka omo koko,
E ʻī ana, “E ʻHōmai,’ e ʻHōmai,’ ʻeā.”
ʻEkolu nō mea piha ʻole,
ʻEhā hoʻi, ʻaʻole e ʻōlelo mai, “Ua ana!”
16ʻO ka lua, ʻo ka ʻōpū pā;
A ʻo ka honua i mauʻu ʻole i ka wai;
A ʻo ke ahi, ʻaʻole āna ʻōlelo mai, “Ua nui!”
17ʻO ka maka i hoʻowahāwahā i kona makua kāne,
A hōʻole hoʻi ʻaʻole e mālama i kona makuahine,
E kiko iho ka poʻe koraka o ke awāwa ia mea,
A e ʻai iho nō ka poʻe ʻaeto ʻōpiopio.
18¶ ʻEkolu mau mea kupanaha loa iaʻu,
ʻEhā hoʻi, ʻaʻole au i ʻike iho.
19ʻO ka ʻaoʻao o ka ʻaeto ma ka lewa;
ʻO ka ʻaoʻao o ka nahesa ma luna o ka pōhaku;
ʻO ka ʻaoʻao o ka moku i waena o ka moana;
A ʻo ka ʻaoʻao o ke kanaka me ka wahine puʻupaʻa
20Pēnēia ka ʻaoʻao o ka wahine hoʻokamakama,
ʻAi ihola ʻo ia a holoi i kona nuku,
A ʻōlelo aʻe, “ʻAʻole au i hana hewa.”
21¶ ʻEkolu mau mea e haunaele ai ka honua,
ʻEhā hoʻi e hiki ʻole ai ke hoʻomanawanui:
22ʻO ke kauā ke lilo i aliʻi;
ʻO ka mea lapuwale ke māʻona i ka ʻai;
23ʻO ka wahine huhū wale ke mare ʻia ʻo ia;
A ʻo ke kauā wahine he hoʻoilina o kona haku wahine.
24¶ ʻEhā mau mea liʻiliʻi loa ma ka honua nei,
A ua akamai loa nō naʻe:
25ʻO ka poʻe ʻānonanona, he poʻe ikaika ola lākou,
Hoʻomākaukau nō naʻe i ke kau i kā lākou ʻai;
26ʻO ka poʻe rābita, he poʻe nāwaliwali lākou,
Ma nā pōhaku hoʻi i hana ai i ko lākou mau hale;
27ʻO ka poʻe ʻūhini, ʻaʻole o lākou aliʻi,
Hele papa nō hoʻi lākou.
28ʻO ka moʻo, lālau nō ʻo ia me kona mau lima,
Aia nō ia ma nā hale hanohano o ke aliʻi.
29¶ ʻEkolu mau mea, i maikaʻi ka hele ʻana,
ʻEhā hoʻi i maikaʻi ke hele aʻe.
30ʻO ka liona ka mea ikaika loa o nā holoholona,
ʻAʻole hoʻi ʻo ia e huli aʻe mai ke alo aku o lākou a pau;
31ʻO ka ʻīlio hahai, a ʻo ke kao kāne hoʻi,
A ʻo ke aliʻi, hiki ʻole ke kūʻē iā ia.
32¶ Inā he lapuwale ʻoe i kou hoʻokiʻekiʻe ʻana,
Inā paha he manaʻo ʻino kou, e kau ana ka lima ma ka waha.
33Ma ka hoʻoluliluli ʻana i ka waiū e puka mai ai ka bata,
Ma ka ʻuī ʻana i ka ihu e kahe mai ai ke koko;
A ma ka hōʻoiʻoi ʻana i ka huhū e puka mai ai hoʻi ka hakakā.
Ka Baibala Hemolele © Partners Development Foundation, 2018.